Bozhinovska: Investimet e sotme në energji do të përcaktojnë pozicionin e vendit në të ardhmen

Ministrja e Energjetikës, Minierave dhe Burimeve Minerale, Sanja Bozhinovska, deklaroi se planifikimi i infrastrukturës energjetike bëhet me perspektivë shumëvjeçare, në një kohë kur rrjedhat e energjisë po riformësojnë hartën e Evropës.

Gjatë prezantimit të Studimit të parë Kombëtar për Hidrogjenin, ajo tha se ky dokument shkon përtej trajtimit të hidrogjenit si burim i ri energjie. Sipas saj, studimi shërben si një orientim për zhvillimin e infrastrukturës së nevojshme për prodhimin, transmetimin dhe përdorimin e hidrogjenit të pastër.

Bozhinovska vlerësoi se pozicioni i Maqedonisë, mes Greqisë dhe Serbisë, si dhe lidhja e saj me tregjet e Evropës Qendrore, i krijon mundësi vendit të marrë një rol të ri në rrjetin pan-evropian të hidrogjenit. Për ta shfrytëzuar këtë mundësi, theksoi ajo, nevojiten lidhje fizike, rregulla të përafruara, institucione të qëndrueshme dhe bashkëpunim rajonal afatgjatë.

Ministrja iu referua edhe takimeve të zhvilluara në SHBA, përfshirë atë në Shtëpinë e Bardhë, ku u firmos Memorandumi për bashkëpunim në fushën e energjetikës. Ajo përmendi gjithashtu takimin katërpalësh ministror të mbajtur në Athinë më 15 maj, ku u vendos që Maqedonia dhe Serbia të përfshihen në zgjerimin e Korridorit Vertikal të Gazit.

Sipas Bozhinovskës, interkonektorët me Greqinë dhe Serbinë nuk po ndërtohen vetëm për të diversifikuar furnizimin me gaz natyror. Ato po projektohen gjithashtu si linja që mund të përshtaten për transportin e hidrogjenit.

Pjesa e interkonektorit me Greqinë që kalon në territorin maqedonas, nga Negotina deri në kufi, është 67 km. Në total, projekti deri në Nea Mesimvria do të shtrihet në 123 km. Kapaciteti i parashikuar arrin deri në 2,8 miliardë metra kub gaz në vit, shifër që tejkalon nevojat e brendshme dhe i siguron Maqedonisë mundësinë për të shërbyer si vend tranziti.

Bozhinovska foli edhe për projektin e tranzicionit të drejtë në REK Bitola. Në kuadër të tij po përgatitet centrala e re kogjenerative “REK Bitola 1”, e mbështetur me 2,4 milionë dollarë nga Banka Botërore. Impianti do të funksionojë me gaz natyror, ndërsa parashikohet që në të ardhmen të mund të përshtatet për përdorimin e hidrogjenit.

Ajo bëri të ditur se reformat në sektorin energjetik kanë marrë vlerësim pozitiv nga Komisioni Evropian. Ndër masat e përmendura janë krijimi i sistemit për menaxhimin e tranzicionit të drejtë dhe miratimi i planit trevjeçar për rinovimin e ndërtesave të administratës qendrore.

“Nga një shtet i varur nga një pikë hyrëse, Maqedonia po shndërrohet në një vend të lidhur me më shumë drejtime dhe burime. Nga një vëzhgues i zhvillimeve rajonale, po bëhemi pjesëmarrës aktivë. Kjo është infrastruktura që po ndërtojmë sot dhe roli energjetik që po krijojmë për nesër”, përfundoi ministrja Bozhinovska.