Besar Durmishi ngre alarmin për incidente të mundshme në protestën e BDI-së që mbahet sonte në Tetovë

Ministri i Ekonomisë dhe Punës, Besar Durmishi, ka bërë të ditur se ekzistojnë sinjale shqetësuese për mundësinë e ndodhive incidentale gjatë protestës së paralajmëruar për sonte në Tetovë.

Në një reagim publik, ai u shpreh se gjatë mbrëmjes së kaluar dhe përgjatë ditës së sotme kanë marrë informacione për, siç i cilësoi, “skenare të errëta” që po përgatiten ndaj Tetovës.

“Sipas këtyre informacioneve, persona të caktuar që do të vijnë sot në Tetovë do të përpiqen të shkaktojnë incidente, me demolimin e objekteve publike, përleshje me Policinë ose incidente ndëretnike në lagjet e Tetovës”, ka deklaruar ministri.

Sipas Durmishit, prapa veprimeve të tilla qëndron synimi për të prodhuar tensione artificiale dhe për të deformuar faktet, si edhe përgjegjësinë.

Ai bëri të ditur gjithashtu se institucionet lokale dhe ato qendrore janë në komunikim dhe koordinim të pandërprerë për të penguar çdo skenar të tillë. Njëkohësisht, u bëri apel qytetarëve të tregohen vigjilentë dhe të mos bëhen pjesë e, siç tha ai, “devijimeve nga disa të infiltruar me qëllime të errëta politike”.

Ministri nënvizoi, megjithatë, se e drejta për të protestuar mbetet e garantuar dhe se institucionet do të kujdesen për ta mbrojtur atë.

“Megjithëse nuk ka sens të protestosh në Tetovë për një vendim që ka marrë Gjykata Kushtetuese në Shkup, e drejta për protestë është e garantuar dhe ne do ta mbrojmë këtë të drejtë”, thuhet në reagimin e tij.

Nga ana tjetër, policia ka bërë të ditur se protesta e organizuar nga Bashkimi Demokratik për Integrim është paraqitur në polici nga Bajram Rexhepi, i cili figuron zyrtarisht si organizator.