BALFIN Group dhe Flying Tiger Copenhagen planifikojnë 87 dyqane në Rumani, Bullgari dhe Kroaci

Rumania, Bullgaria dhe Kroacia janë tre tregjet e Bashkimit Evropian ku BALFIN Group dhe Flying Tiger Copenhagen do të shtrijnë bashkëpunimin e tyre strategjik. Me këtë zgjerim, marka daneze hyn në një etapë të re të zhvillimit të saj në Evropën Qendrore dhe Juglindore.

Marrëveshja e re parashikon hapjen e 87 dyqaneve në këto tre vende përgjatë pesë viteve të ardhshme. Nisja e aktivitetit në Rumani dhe Bullgari është planifikuar për vitin 2027, ndërsa hyrja në Kroaci për fillimin e vitit 2028.

Vendimi për ta zgjeruar partneritetin mbështetet në ecurinë e suksesshme të Flying Tiger Copenhagen në Shqipëri, Kosovë, Maqedoninë e Veriut dhe Serbi. Në këto tregje, rrjeti i ngritur nga bashkëpunimi mes dy kompanive pritet të numërojë 20 dyqane deri në fund të vitit 2026. Ndërkohë, për fillimin e vitit 2027 është parashikuar hyrja në Bosnjë-Hercegovinë dhe Mal të Zi. Përvoja e fituar dhe rezultatet e forta në vendet ku operojnë tashmë kanë nxitur shtrirjen e bashkëpunimit në tre tregje të tjera evropiane.

Për të dyja kompanitë, kjo marrëveshje shënon një etapë të rëndësishme në realizimin e strategjive të rritjes. BALFIN Group konsolidon në këtë mënyrë pozicionin e tij si grup ndërkombëtar investimesh që vepron në 13 shtete, ndërsa vijon strategjinë për krijimin e partneriteteve afatgjata me marka ndërkombëtare lider.

Nga ana e Flying Tiger Copenhagen, bashkëpunimi i konsoliduar me BALFIN Group shërben si mbështetje për zgjerimin global dhe si një themel i qëndrueshëm për zhvillimin e markës në tre tregje të rëndësishme të Bashkimit Evropian.

Presidenti i BALFIN Group, Samir Mane, tha se arritjet me Flying Tiger Copenhagen dëshmojnë qëndrueshmërinë e partneritetit dhe hapësirën për rritje të mëtejshme. Sipas tij, prania në Rumani, Bullgari dhe Kroaci e ngre bashkëpunimin në një tjetër nivel, duke e çuar markën në tre tregje të rëndësishme të Bashkimit Evropian. Mane theksoi gjithashtu se marrëveshja shpreh angazhimin e BALFIN Group për partneritete afatgjata dhe për zhvillimin e markave ndërkombëtare të suksesshme, me një prani gjithnjë më të gjerë në Evropë.

Julius Schmidt, Drejtor Menaxhues për rajonin IMEA në Flying Tiger Copenhagen, e cilësoi hyrjen në Rumani, Bullgari dhe Kroaci si vazhdim të natyrshëm të bashkëpunimit me BALFIN Group, pas rezultateve të forta në tregjet ku të dyja kompanitë janë tashmë të pranishme. Ai nënvizoi rëndësinë e këtyre vendeve për strategjinë e rritjes në Evropë dhe potencialin e madh që ato ofrojnë për konceptin e Flying Tiger Copenhagen. Schmidt shprehu kënaqësinë për vijimin e partneritetit mbi bazën e arritjeve të përbashkëta, me synimin që përvoja e veçantë e blerjeve të markës të arrijë te më shumë klientë në rajon.

Shtrirja në këto vende do ta konsolidojë më tej praninë rajonale të Flying Tiger Copenhagen. Njëkohësisht, ajo do t’u japë të dyja kompanive një bazë më të gjerë për të zhvilluar mundësi të reja rritjeje në tregjet e Evropës.

Profili i BALFIN Group

I themeluar nga Samir Mane në Vjenë në vitin 1993, BALFIN Group sot ushtron aktivitet në Austri, Shqipëri, Kosovë, Bosnjë-Hercegovinë, Kroaci, Maqedoninë e Veriut, Zvicër, Mal të Zi, Holandë, Moldavi, Serbi, Kanada dhe Shtetet e Bashkuara të Amerikës.

Me rreth 5.000 të punësuar, Grupi ka investime të shpërndara në një sërë fushash, mes të cilave shërbimet financiare, pasuritë e paluajtshme, tregtia me pakicë, menaxhimi i aseteve, hoteleria, logjistika, arsimi, energjia dhe argëtimi. Që nga viti 2023, nismat e tij sociale janë përmbledhur nën Fondacionin Mane, me qëllim që kontributi për fuqizimin e komuniteteve të jetë më efektiv.

BALFIN Group mund ta ndiqni përmes faqes së tij zyrtare në internet, si edhe në Facebook, LinkedIn dhe Instagram.

Profili i Flying Tiger Copenhagen

E themeluar në vitin 1995 në Kopenhagë, Flying Tiger Copenhagen është një markë daneze e tregtisë me pakicë me mbi 1.100 dyqane në më shumë se 45 tregje në të gjithë botën. Identiteti i saj ndërthur dizajnin danez me kreativitetin dhe çmimet e përballueshme. Asortimenti rinovohet vazhdimisht me produkte të krijuara për t’i dhënë përditshmërisë më shumë argëtim, krijimtari dhe gëzim.

Produktet e Flying Tiger Copenhagen përfshijnë lodra, artikuj kancelarie, aksesorë shtëpie, artikuj kuzhine dhe produkte për festa. Të dizajnuara me kujdes, ato synojnë të sjellin befasi dhe frymëzim në çastet e zakonshme të ditës.

Marka vazhdon të zgjerohet, duke e çuar përvojën e saj të veçantë të blerjeve te një numër gjithnjë më i madh klientësh në botë. Kjo ecuri mbështetet në praninë e fortë në Evropë, Azi dhe Lindjen e Mesme, si dhe në rrjetin që po rritet në kontinentet amerikane.

Informacione të mëtejshme gjenden në www.flyingtiger.com; markën mund ta ndiqni edhe në LinkedIn.