ASH: Qeveria nuk arriti të përmbushë as afatet evropiane

Aleanca për Shqiptarët vlerëson se mesazhi i euroambasadorit Rokas paraqet një provë të qartë se Qeveria nuk ka arritur të prodhojë rezultate konkrete në rrugën e eurointegrimit.

Nga ASH thonë se afatet tashmë kanë kaluar, ndërsa qytetarët vazhdojnë të dëgjojnë vetëm arsyetime, pritje dhe interpretime diplomatike. Sipas tyre, kjo Qeveri premtoi përshpejtim të procesit drejt Evropës, por në vend të kësaj solli stagnim.

“Në vend të hapjes së kapitujve negociues, vendi pret raportin e radhës. Në vend të reformave të vërteta, qytetarëve u ofrohet propagandë. Partnerët shqiptarë në Qeveri kanë përgjegjësi të drejtpërdrejtë për këtë dështim. Ata nuk mund të fshihen pas deklaratave të përgjithshme, sepse premtuan Evropë, ndërsa sot heshtin para bllokadës”, deklarojnë nga ASH.

Aleanca për Shqiptarët kërkon llogaridhënie politike, zbatimin e reformave reale dhe rikthimin e seriozitetit në agjendën evropiane të vendit.

Sipas tyre, rruga drejt Bashkimit Evropian nuk ndërtohet me fjalë, por me punë, vendime dhe guxim politik.