Angellov: Tymi mbi Shkup vjen nga zjarri pranë kufirit me Kosovën, beteja me flakët vazhdon prej tre ditësh

Stojançe Angelov, drejtor i Drejtorisë për Mbrojtje dhe Shpëtim, bëri të ditur se në territorin e Bashkisë së Shkupit është aktiv vetëm një zjarr në hapësirë të hapur. Vatra ka kaluar nga Kosova në anën e RMV-së dy ditë më parë, pranë fshatit Graçan, në komunën e Gjorçe Petrovit.

Sipas tij, flakët nuk paraqesin rrezik për zonat e banuara. Zjarri ka përfshirë kryesisht bar, shkurre dhe dëllinja të ulëta, bimësi që shkakton flakë të fuqishme dhe sasi edhe më të mëdha tymi. Në disa pjesë, ai po përhapet pranë sipërfaqes së tokës, përmes një pylli të përzier.

Angelov sqaroi se të mërkurën, krahas zjarrfikësve të Shkupit, në operacionin për shuarjen e zjarrit u angazhuan edhe dy traktorë ajrorë të Shërbimit Shtetëror të Zjarrfikësve. Dje, të enjten, një helikopter i policisë u erdhi në ndihmë shërbimeve zjarrfikëse të Kosovës, duke ndërhyrë nga ana kosovare, ku intensiteti ishte më i lartë. Bëhet fjalë për të njëjtin zjarr, të përhapur në të dyja anët e kufirit, ndërsa zjarrfikësit e Shkupit vepruan nga territori i Maqedonisë.

Gjatë mbrëmjes së kaluar, era fryu drejt Shkupit, ndaj tymi i zjarrit aktiv si në territorin e Kosovës, ashtu edhe në atë të Maqedonisë, u ndie në disa lagje të kryeqytetit.

Ai theksoi se ky është i njëjti tym që personat e angazhuar çdo ditë në shuarjen e zjarreve në ambiente të hapura e thithin nga afër dhe në një përqendrim pakrahasueshëm më të lartë. Zjarrfikësit e Shkupit qëndruan gjatë gjithë natës në pjesë të vijës së zjarrit, por terreni i vështirë e bëri ndërhyrjen gjatë natës shumë të vështirë ose të pamundur.

Angelov njoftoi se operacioni do të vazhdojë këtë mëngjes me më shumë zjarrfikës. Nga ajri do të angazhohen dy “traktorë ajrorë” të Shërbimit Shtetëror të Zjarrfikësve, një helikopter i policisë dhe një helikopter ushtarak./Telegrafi/