Angellov: Disa vatra mbeten aktive në malin Kitkë, presim që zjarri të vihet nën kontroll deri nesër

Në malin Kitkë vazhdojnë të jenë aktive disa vatra zjarri, ndërsa në operacionin për shuarjen e tyre nga ajri janë përfshirë “Er Traktorët” e Drejtorisë për Mbrojtje dhe Shpëtim (DMSH).

Në terren po veprojnë zjarrfikësit e Shkupit, ekipet e DMSH-së dhe punonjësit e Ndërmarrjes Publike “Pyjet Kombëtare”. Drejtori i DMSH-së, Stojançe Angellov, bëri të ditur se atje ndodhen edhe automjete “Pinzgauer”, të cilat do të angazhohen sapo flakët të dalin nga pylli i dendur dhe të përhapen drejt zonave të mbuluara me bar.

Sipas Angellovit, pritet që zjarri të vihet pjesërisht nën kontroll gjatë ditës së sotme dhe nesër.

“Po ndërmarrim gjithçka që kemi në dispozicion për të kontrolluar këtë zjarr të madh, i cili ka përfshirë një territor të gjerë. Besoj se gjatë ditës së sotme dhe nesër do të arrijmë ta vëmë pjesërisht nën kontroll”, deklaroi ai përmes një videoje të publikuar pasdite.

Angellov njoftoi gjithashtu se gjatë ditës së sotme janë regjistruar më shumë se 20 zjarre në ambiente të hapura dhe se intensiteti i tyre nuk po dobësohet.

“Ka shumë persona të papërgjegjshëm që shkaktojnë zjarre pa dashje. Edhe më shqetësues është fakti se ekzistojnë njerëz keqdashës, të cilët për interesa personale ose për hakmarrje i ndezin zjarret qëllimisht, megjithëse e dinë se veprimet e tyre mund t’i kushtojnë jetën dikujt”, tha Angellov.

Më herët, drejtori i DMSH-së u kërkoi qytetarëve të denoncojnë çdo veprim të dyshimtë. Thirrja iu drejtua në veçanti banorëve në rrëzë të malit Kitkë, konkretisht në zonën pas Draçevës, brenda territorit të Komunës së Studeniçanit.