Alarm për mushkonjat në Maqedoninë e Veriut, 10 masa kundër etheve të Nilit Perëndimor

Autoritetet shëndetësore kanë shpallur epidemi të etheve të Nilit Perëndimor në disa komuna të Shkupit, duke u kërkuar qytetarëve të tregojnë kujdes të shtuar dhe të mbrohen nga pickimet e mushkonjave.

Deri më 11 gusht 2026, në Maqedoninë e Veriut janë evidentuar 26 raste me ethe të Nilit Perëndimor. Prej tyre, 25 janë regjistruar në Shkup, ndërsa një pacient ka humbur jetën.

Ekspertët këshillojnë zbatimin e 10 masave për të zvogëluar mundësinë e infektimit:

1. Eliminoni ujin e ndenjur nga oborri dhe ambientet përreth banesës.

2. Pastroni vazhdimisht ulluqet dhe të gjitha enët ku mund të grumbullohet ujë.

3. Pajisini dyert dhe dritaret me rrjeta mbrojtëse.

4. Aplikoni repelentë që largojnë mushkonjat.

5. Vishni rroba të gjata, mundësisht me ngjyra të çelëta.

6. Mos qëndroni jashtë gjatë agimit dhe muzgut, periudha kur aktiviteti i mushkonjave është më i lartë.

7. Kujdesuni rregullisht për mirëmbajtjen e pishinave, fontanave dhe vendeve të tjera ku ka ujë.

8. Merrni masa mbrojtëse kur kryeni punë në kopsht ose në oborr.

9. Zëvendësoni në mënyrë të rregullt ujin në enët që përdoren nga kafshët dhe shpendët.

10. Kërkoni menjëherë ndihmë mjekësore nëse shfaqen temperaturë, dhimbje koke, lodhje, dhimbje muskujsh, qafë e ngrirë ose çrregullime të vetëdijes.

Infektimi me ethet e Nilit Perëndimor ndodh nëpërmjet pickimit nga mushkonja të infektuara. Pjesa më e madhe e të prekurve nuk paraqesin simptoma, megjithatë, në raste të rralla, sëmundja mund të çojë në komplikime të rënda neurologjike.

Në zonat e konsideruara me rrezik, autoritetet po ndërmarrin masa për kontrollin e mushkonjave dhe kanë intensifikuar mbikëqyrjen epidemiologjike.

Mënyra më e mirë e mbrojtjes mbetet parandalimi, përmes heqjes së ujit të ndenjur, përdorimit të repelentëve dhe shmangies së pickimeve të mushkonjave. /INA/