Akull i prodhuar në kushte të papërshtatshme dhe me baktere, kallëzohen penalisht dy persona në Radovish

Dy banorë të Radovishit janë kallëzuar penalisht pasi dyshohet se prej vitesh prodhonin dhe shisnin akull pa autorizim, në ambiente johigjienike dhe me rrezik për shëndetin. Hetimi ka zbuluar se në akullin e prodhuar kishte baktere, ndërsa uji sigurohej përmes një lidhjeje të paligjshme me rrjetin e ujësjellësit.

SPB Strumicë–NJPP Radovish i ka dorëzuar Prokurorisë Themelore Publike në Radovish kallëzim penal ndaj T.D. (62) dhe S.D. (62), të dy nga Radovishi. Ata dyshohen se në vazhdimësi kanë kryer veprën penale “prodhimi dhe nxjerrja në qarkullim e produkteve të dëmshme ushqimore dhe produkteve të tjera”, të paraparë në nenin 213 të Kodit Penal.

Sipas të dhënave të policisë, të kallëzuarit vepronin si prodhues të paregjistruar të akullit dhe produktin e përgatitnin në kushte të improvizuara e johigjienike. Më pas, akullin e nxirrnin në qarkullim në mënyrë të pasigurt, duke ua shitur personave juridikë dhe fizikë.

Më 16.09.2026, pas sigurimit të një urdhri gjyqësor, policia nga SPB Strumicë–NJPP Radovish, së bashku me një inspektor shtetëror të ushqimit nga Agjencia për Ushqim dhe Veterinari, kontrolloi banesën dhe hapësira të tjera në katër lokacione të përdorura nga dy të dyshuarit.

Në tarracën e pjesës përdhese të shtëpisë ku banonin të kallëzuarit u gjetën ngrirëse të mbushura me një numër të madh qesesh me kuba akulli. Produkti ishte vendosur për shitje në formën e vetëshërbimit, ndërsa pagesat depozitoheshin në një kuti të veçantë.

Kontrolli në bodrum zbuloi katër pajisje për prodhimin e akullit në kube, si dhe një frigorifer-ngrirës tjetër ku ruheshin sasi të mëdha kubash akulli të paketuar në qese për shitje.

Me urdhër të inspektorit shtetëror, specialistë të një laboratori të akredituar për analizimin e ushqimit dhe ujit morën mostra nga uji i përdorur si lëndë e parë, nga akulli i gatshëm i marrë në qeset e tre ngrirëseve dhe nga pajisjet e prodhimit.

Rezultatet e analizave mikrobiologjike dhe kimike treguan se vetëm uji i përdorur përmbushte parametrat e përcaktuar nga Rregullorja për kërkesat për sigurinë dhe cilësinë e ujit të pijshëm. Mostrat e tjera nuk përputheshin me standardet, pasi në to u konfirmua prania e Escherichia coli dhe baktereve koliforme. Sipas autoriteteve, kjo dëshmonte se akulli ishte i pasigurt dhe i dëmshëm për shëndetin e njerëzve, për shkak të ndotjes me baktere me origjinë fekale.

Pas mbërritjes së rezultateve, Agjencia për Ushqim dhe Veterinari vulosi dhe sekuestroi pajisjet e prodhimit, si dhe ngrirëset ku mbahej akulli i gatshëm, me peshë rreth 850 kilogramë.

Gjatë ndërhyrjes u konstatua gjithashtu se prodhimi realizohej përmes tubacioneve të ujit të vendosura në disa pika. Punonjësit e ndërmarrjes publike “Plavaja” në Radovish përcaktuan se uji i përdorur në bodrum nuk kalonte përmes matjes me ujëmatës.

T.D. dhe S.D. janë arrestuar dhe janë mbajtur në Stacionin Policor në Radovish.