Ajvazi shpjegon arsyet pse prodhimi në Kosovë po kushton gjithnjë e më shumë

Prodhuesit vendorë në Kosovë po hasin vështirësi të shumta që po e dëmtojnë drejtpërdrejt konkurrueshmërinë e tyre. Mes tyre përfshihen hyrja në tregun e lirë të energjisë elektrike, shtrenjtimi i kostove të prodhimit, mungesa e fuqisë punëtore dhe ndryshimet ligjore që, sipas tyre, shpesh kalojnë pa konsultim me bizneset.

Këto qëndrime i shprehu kryetari i Shoqatës së Prodhuesve të Kosovës (OEK), Kushtrim Ajvazi, në “Përballje Podcast”, ku theksoi se sektori i prodhimit gjatë viteve të fundit ka qenë nën presion të vazhdueshëm.

Sipas Ajvazit, ndër problemet më të mëdha ka qenë kalimi i bizneseve në tregun e lirë të energjisë elektrike, një proces për të cilin prodhuesit kishin kërkuar kohë tranzitore dhe konsultim me institucionet.

“Ne kemi paralajmëruar se dalja në tregun e lirë të energjisë do të rriste kostot e prodhimit. Kërkuam dialog dhe zgjidhje, por shqetësimet tona nuk u morën parasysh”, tha Ajvazi shkruan Telegrafi.

Ai nënvizoi se rritja e çmimit të energjisë, por edhe e derivateve, gazit dhe lëndëve të para, i ka vendosur prodhuesit kosovarë në pozitë më pak të favorshme ndaj kompanive të vendeve të rajonit.

“Kur rriten kostot e energjisë, transportit dhe lëndëve të para, produkti ynë bëhet më pak konkurrues. Ndërkohë, shtetet e tjera përdorin politika që e mbështesin industrinë e tyre”, u shpreh ai.

Ajvazi veçoi gjithashtu si sfidë serioze mungesën e fuqisë punëtore, duke e lidhur këtë me emigrimin dhe me vështirësinë për të siguruar punëtorë të kualifikuar.

Ai bëri të ditur se kompanitë prodhuese kanë rritur pagat, por sipas tij kjo nuk ka mjaftuar për ta lehtësuar problemin e mungesës së punëtorëve.

“Sot një nga problemet më serioze është gjetja dhe mbajtja e punëtorëve. Edhe pse pagat në sektorin prodhues janë rritur, sfida mbetet e madhe”, deklaroi Ajvazi.

Sa i përket pagës minimale, ai tha se Shoqata e Prodhuesve nuk e kundërshton rritjen e saj, por insistoi që vendime të tilla të merren në bashkëbisedim me sektorin privat dhe të shoqërohen me politika që mbrojnë konkurrueshmërinë e bizneseve.

“Ne nuk kemi qenë kundër pagës minimale. Kemi kërkuar që vendimet të merren në konsultim me bizneset dhe të analizohen efektet që ato kanë mbi prodhimin”, tha Ajvazi.

Ai shtoi se prodhuesit nuk po kërkojnë privilegje apo subvencione, por politika ekonomike të qëndrueshme dhe një bashkëpunim më të madh me institucionet.

“Qëllimi ynë është të prodhojmë më shumë, të eksportojmë më shumë dhe të krijojmë vende të reja pune. Për këtë na duhen politika të parashikueshme dhe bashkëpunim me shtetin”, përfundoi Ajvazi./Telegrafi/.