Ahmeti: Çlirimtarët nuk mund të dënohen në emër të shqiptarëve

Ali Ahmeti, kryetar i BDI-së, deklaroi gjatë protestës së zhvilluar në Shkup në mbështetje të çlirimtarëve se populli shqiptar nuk mund të dënojë ata që luftuan për çlirimin e tij.

Sipas tij, protestat dhe aktivitetet në mbështetje të çlirimtarëve do të shtrihen në të gjithë Kosovën, si dhe në hapësirat e Maqedonisë ku jetojnë shqiptarë.

“Tubimi i sotëm në Sheshin Skënderbeu është vetëm hapi i parë. Shqiptarët në Maqedoni, së bashku me shqiptarët e Kosovës, do të shprehin pakënaqësinë dhe revoltën e tyre, sepse çlirimtarët nuk mund të dënohen në emër të popullit shqiptar”, u shpreh Ahmeti.

Ai theksoi se kjo çështje nuk duhej të kishte nisur që nga publikimi i aktit të cilin e cilësoi si të turpshëm dhe që lidhet me Dik Marti.

Ahmeti tha se përballë përpjekjeve për të njollosur të gjithë popullin shqiptar nevojitet angazhim i madh institucional. Sipas tij, institucionet e Kosovës dhe Shqipërisë duhet të zhvillojnë aktivitete të fuqishme diplomatike për t’ua shpjeguar kancelarive evropiane, të cilat financojnë Gjykatën Speciale, të gjithë situatën dhe për të arritur shpalljen e çlirimtarëve si të pafajshëm.