A u ndoqën nga një veturë? Hetuesit dyshohet se po shqyrtojnë një pistë të re për vdekjen e tre kosovarëve pranë Bllacës

Vdekja tragjike e tre shtetasve të Kosovës në Maqedoninë e Veriut vazhdon të mbetet e rrethuar nga pikëpyetje. Sipas informacioneve që po qarkullojnë në opinion, autoritetet hetimore po shqyrtojnë një pistë të re lidhur me ngjarjen.

Dyshimet kanë të bëjnë me mundësinë që, përpara aksidentit fatal, vetura ku ndodheshin viktimat të jetë ndjekur nga një automjet tjetër. Megjithatë, kjo pistë nuk është konfirmuar zyrtarisht dhe autoritetet ende nuk kanë paraqitur një përfundim mbi shkaqet e ngjarjes.

Tre kosovarët u gjetën pa shenja jete në automjetin e tyre, i cili ishte përmbysur pranë rrugës, në afërsi të pikëkalimit kufitar Bllacë. Kërkimet nisën pasi familjarët raportuan zhdukjen e tyre.

Gjatë operacionit, policia shqyrtoi pamjet e kamerave të sigurisë dhe kreu kërkime nga toka dhe ajri. Në këtë mënyrë u bë i mundur lokalizimi i veturës së aksidentuar.

Raportimet e publikuara nga mediat dhe diskutimet në emisione televizive kanë shtuar dyshimet se hetuesit po verifikojnë gjithashtu nëse para aksidentit ka pasur lëvizje të dyshimta apo ndjekje nga një veturë tjetër.

Në këtë fazë, as policia dhe as prokuroria nuk kanë konfirmuar pretendimin se viktimat mund të jenë ndjekur. Institucionet po vijojnë të mbledhin prova dhe të analizojnë çdo rrethanë, me synimin për ta zbardhur plotësisht ngjarjen.

Ndërsa hetimet vazhdojnë, pritet që institucionet përgjegjëse të japin informacione të tjera gjatë ditëve në vijim./Klankosovatv