300 mjekë specializantë do të punësohen në Maqedoninë e Veriut

Ekzekutivi ka dhënë dritën jeshile për angazhimin e 300 specializantëve nga sektori privat në spitalet dhe qendrat shëndetësore shtetërore, me afat përfundimtar vitin 2026.

Ministria e Shëndetësisë bën të ditur se masa ka për qëllim të ndalojë largimin e mjekëve të rinj jashtë vendit, të adresojë vakancat e theksuara në pozicionet specialistike dhe të rrisë aftësitë e klinikave, spitaleve dhe qendrave shëndetësore.

Një tjetër objektiv kyç është shpërndarja më e barabartë e stafit mjekësor në të gjithë territorin dhe reduktimi i listave të pritjes për qytetarët.

Ministri i Shëndetësisë, Klekovski, e cilësoi këtë si një investim strategjik për të ardhmen e shëndetësisë dhe për rritjen profesionale të brezit të ri të mjekëve, duke nënvizuar se synimi kryesor mbetet që ata të zhvillojnë karrierën e tyre brenda Maqedonisë. Procesi i rekrutimit do të udhëhiqet nga kërkesat konkrete të institucioneve publike shëndetësore, duke i dhënë përparësi atyre zonave që përballen me mungesën më të madhe të specialistëve.