25-vjetori i MO-së, diplomatët i japin “dush të ftohtë” Ali Ahmetit

Më shumë se 20 përfaqësues të trupit diplomatik ishin të pranishëm në ceremoninë qendrore kushtuar 25-vjetorit të Marrëveshjes Kornizë të Ohrit. Ngjarja u organizua nga Ministria për Marrëdhënie ndërmjet Bashkësive, e udhëhequr nga ministri Agon Ferati.

Pjesëmarrja e konsiderueshme e diplomatëve tërhoqi vëmendje. Ambasadorë dhe përfaqësues nga mbi 20 misione diplomatike morën pjesë në aktivitetin institucional të mbajtur në Shkup, duke i dhënë përvjetorit një karakter të theksuar ndërkombëtar.

Me zgjedhjen e tyre, diplomatët i dhanë përparësi institucionit kundrejt partisë, shtetit përballë strukturës politike dhe orientimit drejt së ardhmes në vend të figurave të së kaluarës. Thënë shkurt, ata zgjodhën VLEN-in.

Ndërkohë, aktiviteti partiak i BDI-së dhe Ali Ahmetit pati një përfaqësim dukshëm më të vogël nga kori diplomatik.

Kontrasti ishte i dukshëm: faktori ndërkombëtar preferoi një ngjarje institucionale që përcillte mesazhe për të ardhmen dhe brezin e ri, ndërsa manifestimi partiak i BDI-së nuk ngjalli interes të njëjtë te diplomatët.

Në këtë situatë lind natyrshëm pyetja nëse diplomatët po e ndryshojnë qëndrimin e tyre ndaj Ali Ahmetit dhe BDI-së.

Nëse më parë pjesëmarrja e ambasadorëve paraqitej si dëshmi e ndikimit politik të BDI-së, tabloja e sotme rezulton krejt tjetër.

Sinjali politik është i qartë: ndikimi diplomatik nuk përcaktohet nga numri i tubimeve të organizuara, por nga përfaqësimi i institucioneve dhe i vizionit për të ardhmen e vendit.

Prandaj, çështja nuk kufizohet vetëm te mungesa e diplomatëve në aktivitetin e Ahmetit. Pyetja kryesore është se kush po shndërrohet në adresën e tyre të re.