19 shoferë u arrestuan brenda një dite për drejtim të pakujdesshëm

Policia ka privuar nga liria 19 drejtues automjetesh në zona të ndryshme të vendit gjatë 24 orëve të fundit. Të gjithë dyshohet se kanë kryer veprën penale “drejtim i pakujdesshëm i automjetit”, të parashikuar në nenin 297-a të Kodit penal.

Në mesin e të ndaluarve janë 10 persona që drejtonin automjetin nën ndikimin e alkoolit: M.R. (24) nga Shkupi dhe rrethina, N.K. (23) nga rrethina e Demir Hisarit, H.T. (20) nga Manastiri, F.A. (24) nga Kumanova, S.I. (33) nga rrethina e Kumanovës, Z.L. (49) nga Sveti Nikolla, G.S. (45) nga Dellçeva, G.Ç. (48) nga Kavadari, 26-vjeçarja K.R. nga Kavadari dhe 34-vjeçarja Z.B.P. nga Velesi.

Gjithashtu, tetë drejtues janë kapur në timon edhe pse nuk e kishin kaluar provimin e vozitjes. Bëhet fjalë për S.V. (47) dhe M.J. (23), nga Shkupi, B.I. (20) nga fshati Draçevishtë, në rrethinën e Shkupit, R.T. (18) nga Gjevgjelia, Z.H. (59) nga fshati Lokveni, rrethina e Prilepit, A.R. (34) nga fshati Reçicë e Sipërme në Tetovë, si dhe dy 16-vjeçarë nga rrethina e Gostivarit.

Një tjetër person, I.B. (39) nga Shkupi, është ndaluar pasi drejtonte automjetin pavarësisht se ndaj tij kishte një ndalim aktiv për drejtimin e automjeteve.

MPB njofton se pas përfundimit të dokumentimit të rasteve do të dorëzohen kallëzimet përkatëse penale. Autoritetet u kanë bërë thirrje pjesëmarrësve në trafik të respektojnë rregullat, të mos drejtojnë automjet pa kaluar provimin e vozitjes, gjatë kohës që kanë masë ndalimi apo nën ndikimin e alkoolit, me qëllim rritjen e sigurisë në komunikacion.