Studiuesit thonë se një vaksinë e vetme nazale mund të mbrojë nga ftohjet, gripi dhe infeksione të tjera

Sipas studiuesve amerikanë, një vaksinë e vetme në formë spreji nazal mund të ofrojë mbrojtje kundër kollës, ftohjeve dhe gripit, por edhe ndaj infeksioneve bakteriale të mushkërive, ndërsa mund të ndihmojë edhe në lehtësimin e alergjive.

Kjo “vaksinë universale” është testuar deri tani në kafshë nga ekipi i Universitetit të Stanfordit, ndërsa provat klinike te njerëzit mbeten ende për t’u kryer.

Siç raporton BBC, transmeton Klankosova.tv, autorët e studimit thonë se metoda e tyre përfaqëson një “largim radikal” nga mënyra se si janë konceptuar vaksinat për më shumë se 200 vjet.

Njohës të kësaj fushe e kanë cilësuar kërkimin si “vërtet emocionues”, edhe pse ndodhet ende në fazat e hershme, dhe kanë vlerësuar se ai mund të përbëjë një “hap të madh përpara”.

Vaksinat që përdoren aktualisht e përgatisin organizmin për t’u mbrojtur ndaj një infeksioni të vetëm. Për shembull, vaksina kundër fruthit jep mbrojtje vetëm ndaj fruthit, ndërsa ajo kundër lisë së dhenve vetëm ndaj lisë së dhenve.

Në këtë mënyrë ka funksionuar imunizimi që nga fundi i shekullit të 18-të, kur Sir Edward Jenner shpiku vaksinat.

Qasja e paraqitur në revistën Science nuk synon të stërvitë sistemin imunitar. Në vend të kësaj, ajo kopjon mënyrën se si qelizat imune shkëmbejnë sinjale me njëra-tjetrën.

Kjo vaksinë administrohet si sprej nazal dhe i vendos qelizat e bardha të gjakut në mushkëri – të njohura si makrofagë – në një gjendje “alarm të verdhë”, duke i lënë të gatshme të veprojnë pavarësisht llojit të infeksionit që tenton të depërtojë.

Në eksperimentet e kryera te kafshët, ky efekt zgjati për afërsisht tre muaj.

Studiuesit zbuluan se kjo rritje e gatishmërisë solli një ulje prej 100 deri në 1,000-fish të viruseve që kalojnë përmes mushkërive dhe në pjesë të tjera të trupit.

Prof. Bali Pulendran, profesor i mikrobiologjisë dhe imunologjisë në Stanford, tha, transmeton Klankosova.tv, se edhe në rastet kur disa viruse ia dolën të kalonin, pjesa tjetër e sistemit imunitar ishte “e gatshme, e gatshme t’i mbronte këto me shpejtësi marramendëse”.

Ekipi gjithashtu tregoi se vaksina ofron mbrojtje edhe ndaj dy llojeve të baktereve – Staphylococcus aureus dhe Acinetobacter baumannii.