OBSH ngre alarmin për aksesin e kufizuar te vaksinat kundër obezitetit

Organizata Botërore e Shëndetësisë ka paralajmëruar se më pak se një në 10 persona që mund të përfitojnë nga vaksinat kundër obezitetit, si Wegovy, arrijnë t’i sigurojnë ato, teksa ka publikuar udhëzimet e saj të para për këto ilaçe.

OBSH thekson se, në kushtet kur mbi një miliard njerëz në botë jetojnë me obezitet, nevojitet një qasje më e gjerë dhe më e drejtë ndaj medikamenteve GLP-1.

Sipas vlerësimeve, nëse nuk ndërmerren masa, deri në vitin 2030 numri i njerëzve obezë do të kalojë mbi dy miliardë.

Sipas OBSH-së, pengesat kryesore për akses universal në këto injeksione, të cilat mund të ndihmojnë në humbje të ndjeshme në peshë, mbeten çmimet e larta, kapacitetet e kufizuara të prodhimit dhe kufizimet në zinxhirin e furnizimit.

Këto ilaçe tashmë janë përfshirë në listën e barnave “esenciale” të OBSH-së, të cilat vendeve u rekomandohet t’i ofrojnë, shkruan BBC, transmeton Klankosova.tv.

Drejtori i përgjithshëm i OBSH-së, Tedros Adhanom Ghebreyesus, deklaroi: “Udhëzimet tona të reja njohin që obeziteti është një sëmundje kronike që mund të trajtohet me kujdes gjithëpërfshirës dhe gjatë gjithë jetës.

“Ndërsa vetëm ilaçet nuk do ta zgjidhin këtë krizë globale shëndetësore, terapitë me GLP-1 mund të ndihmojnë miliona njerëz të kapërcejnë obezitetin dhe të zvogëlojnë dëmet që lidhen me të.”

OBSH vlerëson se këto ilaçe, që ndonjëherë quhen edhe “skinny jabs”, shënojnë një etapë të re në ndryshimin gradual të mënyrës se si shoqëria e sheh obezitetin: jo më si një “gjendje jetese”, por si një sëmundje kronike komplekse, e parandalueshme dhe e shërueshme.

Sipas saj, këto medikamente mund të përdoren për periudha afatgjata – për gjashtë muaj ose më shumë – por ato duhet të jepen së bashku me këshilla për ushqimin dhe aktivitetin fizik, në mënyrë që pesha e humbur të mund të ruhet.

Megjithatë, OBSH thekson se shumë pak persona në mbarë botën kanë qasje në to. “Shqetësimi ynë më i madh është qasja e barabartë”, tha Tedros.