Mungesa e vitaminës D: Shenjat që mund të kalojnë pa u vënë re

Duke qenë se mungesa e vitaminës D është e përhapur në Evropë, ia vlen të njihen edhe disa shenja më pak të dallueshme që mund të lidhen me të.

Vitamina D, e quajtur shpesh “vitamina e diellit”, mund të shkaktojë më shumë probleme sesa thjesht plogështi kur është në nivele të ulëta. Disa simptoma dallohen lehtë, ndërsa të tjera mund të ngatërrohen me pasojat e një jave të ngarkuar, orarit të zënë apo gjumit të pamjaftueshëm.

Një analizë e gjerë, e bazuar në të dhënat e mbi 55,000 personave nga vende të ndryshme të Evropës, zbuloi se përqindja e mungesës ndryshon sipas pragut të përdorur për ta përcaktuar atë. Me kriterin më të rreptë, mungesë serioze kishte rreth 13 për qind e pjesëmarrësve. Ndërsa kur përfshiheshin edhe nivelet e pamjaftueshme, përqindja arrinte afërsisht 40 për qind.

Rëndësia e vitaminës D për shëndetin

Sipas Klinikës së Cleveland-it, vitamina D është ndër vitaminat e nevojshme për shëndetin e organizmit. Ajo ndihmon në ruajtjen e ekuilibrit të kalciumit në gjak dhe në kocka, si dhe në formimin e mirëmbajtjen e masës kockore.

Kjo vitaminë i mundëson trupit të përthithë kalciumin dhe fosforin, dy minerale të domosdoshme për kocka të forta e të shëndetshme. Në rastet kur mungesa është e rëndë ose zgjat për një kohë të gjatë, organizmi mund të mos marrë sasi të mjaftueshme kalciumi nga ushqimi. Si pasojë, niveli i kalciumit në gjak mund të bjerë, duke sjellë dobësi të muskujve, dhimbje barku, lodhje dhe ndryshime të humorit, transmeton Klankosova.tv.

Te të rriturit, mungesa e rëndë mund të shkaktojë osteomalaci, çrregullim që i bën kockat të buta dhe të dobëta. Ajo mund të shtojë gjithashtu rrezikun e osteoporozës dhe të frakturave.

Shenjat që mund të shpërfillen lehtë

Lodhja, dhimbjet e kockave, dobësia, dhembjet ose ngërçet muskulore, si dhe luhatjet e humorit, përfshirë depresionin, janë disa nga shenjat e mundshme të mungesës së vitaminës D. Megjithatë, te shumë persona nuk shfaqet asnjë simptomë e dallueshme, ndaj mungesa mund të zbulohet vetëm përmes matjes së nivelit në gjak.

Arsyet kryesore të mungesës

Mungesa e vitaminës D lidhet kryesisht me dy shkaqe. Njëri është marrja e pamjaftueshme përmes ushqimit ose ekspozimi i kufizuar ndaj rrezeve të diellit. Tjetri ka të bëjë me vështirësitë e trupit për ta përthithur ose përdorur këtë vitaminë. Nivelet e saj mund të ndikohen edhe nga disa sëmundje, operacionet për humbje peshe dhe disa lloje ilaçesh.