Haxhiu apel grave: Mos i shtyni kontrollet për kancerin e gjirit

Ushtruesja e detyrës së presidentes së Kosovës, Albulena Haxhiu, mori pjesë sot në aktivitetin “Race for the Cure Kosova”, ku theksoi domosdoshmërinë e kontrolleve periodike dhe zbulimit në kohë të kancerit të gjirit.

Përmes një reagimi, Haxhiu u kërkoi grave të mos e vonojnë vizitën mjekësore. Ajo nënvizoi se mesazhi i përcjellë nga kjo garë duhet të mbërrijë edhe te gratë që nuk patën mundësi të merrnin pjesë, transmeton Klankosova.tv.

Sipas saj, kujdesi për familjarët, frika nga përgjigjja e analizave dhe vështirësitë në sigurimin e shërbimeve shëndetësore janë disa nga arsyet që mund t’i bëjnë gratë ta shtyjnë kontrollin.

“Kur flasim për kancerin e gjirit, koha merr një peshë tjetër dhe ne kemi përgjegjësi që gratë të mos e humbin atë duke pritur apo duke u përballur me pengesa që mund dhe duhet t’ua lehtësojmë”, ka shkruar Haxhiu.

Ajo u bëri thirrje grave që të kontrollohen në kohë dhe t’ua përcjellin të njëjtin apel edhe grave të tjera.

“Rëndësi ka që asnjë grua të mos mbërrijë vonë”, është shprehur Haxhiu.