Antitrupat njerëzorë ofrojnë mbrojtje të fuqishme kundër virusit të fruthit, tregon studimi

Një ekip studiuesish ka identifikuar një grup antitrupash njerëzorë që synojnë virusin e fruthit, neutralizojnë veprimin e tij dhe pengojnë infeksionin në një model kafshësh. Zbulimi mund të ndihmojë në zhvillimin e trajtimeve të ardhshme kundër sëmundjes.

Fruthi është një sëmundje shumë ngjitëse, e cila shoqërohet me temperaturë, kollë dhe skuqje me njolla. Pas miratimit të vaksinës kundër fruthit, shytave dhe rubeolës (MMR) në vitet 1960, numri i rasteve u ul ndjeshëm. Në vitin 2000, virusi u shpall i eliminuar në Shtetet e Bashkuara.

Megjithatë, vitet e fundit janë shoqëruar me një rënie të vaksinimit, çka ka sjellë shtim të shpërthimeve të fruthit si në Shtetet e Bashkuara, ashtu edhe në pjesë të tjera të botës.

Erica Ollmann Saphire, biologe strukturore dhe imunologe në Institutin La Jolla për Imunologji, tha në një njoftim për shtyp se po rritet numri i personave që nuk mund të vaksinohen ose që nuk e kanë përfunduar vaksinimin. Sipas saj, pikërisht këta njerëz do të rrezikonin pasojat më të rënda, madje edhe vdekjen, nëse do të infektoheshin me virusin e fruthit.

Për këtë arsye, Saphire dhe kolegët e saj u përqendruan në përcaktimin e epitopëve, pra pjesëve të veçanta të virusit që njihen nga antitrupat e nxitur prej vaksinës, si dhe në kërkimin e një trajtimi të posaçëm për pacientët më të rrezikuar. Për këtë punë raporton revista shkencore “The Scientist”, transmeton Klankosova.tv.

Në studimin e botuar në revistën “Cell Host & Microbe”, studiuesit identifikuan një panel antitrupash njerëzorë të marrë nga pacientë të vaksinuar me MMR. Disa prej tyre u lidhën me proteinën e bashkimit të virusit të fruthit, të njohur si F, ndërsa të tjerët me proteinën e ngjitjes H, të dyja të pranishme në sipërfaqen virale. Antitrupat ndaluan infeksionin në një model kafshësh. Fakti që u vu re si mbrojtje para infektimit, ashtu edhe efekt terapeutik, mund të udhëheqë krijimin e trajtimeve të reja.

Shumica e antitrupave të prodhuar pas vaksinimit drejtohen kundër proteinës H. Megjithatë, edhe një pjesë e antitrupave anti-F veprojnë si frenues të fuqishëm të virusit, ndonëse mënyra e plotë e ndërveprimit të tyre ende nuk është përcaktuar.

Në një kërkim të mëparshëm, Saphire dhe bashkëpunëtorët përdorën mikroskopinë krio-elektronike për të shqyrtuar antitrupa kimerikë miu-njeri që synonin proteinën F. Kjo teknikë u mundësoi të kuptonin më qartë mënyrën se si këta antitrupa lidhen me virusin e fruthit.

Kur virusi kontakton një qelizë njerëzore, ai ndryshon formën për t’u bashkuar me membranën e qelizës dhe më pas për ta infektuar atë. Katër antitrupa të miut synonin forma të ndryshme të proteinës F; tre prej tyre lidheshin me epitopet para bashkimit, duke penguar ndryshimin strukturor dhe, rrjedhimisht, hyrjen e virusit në qelizë.

Në punimin e ri, ekipi hetoi nëse e njëjta mënyrë veprimi gjendej edhe te antitrupat njerëzorë. Studiuesit analizuan gjakun e një pacienti të vaksinuar më herët dhe veçuan 52 antitrupa anti-H dhe 46 antitrupa anti-F. Përmes imazherisë tredimensionale, ata hartuan epitopet strukturore të proteinave virale dhe mënyrën se si ato ndërvepronin me antitrupat njerëzorë. Në këtë proces u përcaktuan katër vende kryesore në proteinën H dhe pesë në proteinën F. Sikurse në studimin e mëparshëm, antitrupat treguan edhe aftësi neutralizuese.

“Këta antitrupa rezultuan jashtëzakonisht të fuqishëm”, deklaroi bashkautori i studimit, Dawid Zyla, studiues postdoktoral në grupin e Saphire.

Gjatë provave në një model paraklinik me minj, studiuesit vunë re se administrimi i panelit para ekspozimit ndaj fruthit ose brenda 24 deri në 48 orësh pas infektimit e ulte ngarkesën virale deri në 500-fish. Antitrupat mbrojtës drejtoheshin ndaj epitopëve të ndryshëm dhe jo-konkurrues, duke sugjeruar se mund të shërbejnë si një trajtim i fuqishëm për pacientët.

Nevojiten studime të mëtejshme për t’i çuar këto rezultate drejt përdorimit klinik, por kërkuesit besojnë se gjetjet hapin rrugë të reja për ndërhyrje profilaktike ose terapeutike kundër fruthit. /Klankosova.tv