A mund të pimë ujë gjatë vakteve?

Ideja se uji duhet shmangur gjatë ngrënies, sepse gjoja hollon acidin e stomakut, vështirëson tretjen dhe shkakton fryrje, është mjaft e përhapur. Megjithatë, të dhënat shkencore nuk i mbështesin këto pretendime. Për shumicën e njerëzve të shëndetshëm, pirja e ujit gjatë vakteve është e padëmshme dhe mund të jetë pjesë normale e ushqyerjes.

Sipas Klinikës Mayo, uji nuk ndikon te lëngjet tretëse dhe as nuk i hollon ato në një nivel që do ta pengonte procesin e tretjes, transmeton Klankosova.tv.

Kur ushqimi mbërrin në stomak, aty nis prodhimi i lëngjeve tretëse dhe shpërbërja mekanike e përmbajtjes. Uji i konsumuar në këtë fazë përzihet me ushqimin, ndërsa stomaku vazhdon të prodhojë acid dhe të kryejë funksionin e tij tretës.

Një sasi prej 200 mililitrash ujë mund të shkaktojë një ndryshim të përkohshëm të vlerës së pH-it në stomak, sipas një studimi, por ky ndikim zgjat pak dhe nuk e pengon tretjen.

Uji është gjithashtu i dobishëm për disa etapa të tretjes. Ai kontribuon në formimin e pështymës, mbështet qarkullimin e lëngjeve në trup dhe ndihmon në zbutjen e jashtëqitjes, duke mundësuar parandalimin e kapsllëkut.

Edhe në kontrollin e oreksit uji mund të ketë ndikim. Meqenëse nuk përmban kalori, ai mund të shtojë përkohësisht ndjesinë e ngopjes gjatë ushqimit. Për këtë arsye, një gotë ujë në drekë është alternativë më e mirë se pijet e ëmbëlsuara, sidomos për ata që synojnë të kufizojnë kaloritë. Studimet kanë treguar se uji i pirë gjatë vakteve mund të rrisë përkohësisht ngopjen, por kjo, e vetme, nuk siguron rënie në peshë në periudhë afatgjatë.

Ndjesia e fryrjes nuk shfaqet njësoj te të gjithë. Disa persona mund të ndiejnë rëndesë ose parehati nëse konsumojnë menjëherë shumë lëngje, veçanërisht kur hanë një vakt të bollshëm. Kjo, megjithatë, nuk do të thotë se uji dëmton tretjen. Klinika Mayo u sugjeron atyre që ndihen tepër të ngopur nga uji gjatë vakteve të pijnë më pak në atë moment dhe ta konsumojnë pjesën tjetër të lëngjeve në intervale përgjatë ditës.

Edhe lloji i pijes mund të ndikojë në përjetimin e fryrjes. Uji i thjeshtë nuk është i njëjtë me pijet e gazuara, të cilat te personat e ndjeshëm mund ta shtojnë këtë ndjesi. Një studim arriti në përfundimin se uji i gazuar, në krahasim me ujin e zakonshëm, nuk ndryshonte ritmin e përgjithshëm të zbrazjes së stomakut, por ndikonte në mënyrën se si shpërndahej përmbajtja brenda tij.

Nuk ekziston një udhëzim i përgjithshëm që përcakton nëse uji duhet pirë vetëm para ose vetëm pas ushqimit. Nëse etja shfaqet gjatë vaktit, nuk ka arsye që uji të shmanget. Për njerëzit e shëndetshëm, disa gllënjka ose një gotë ujë gjatë ngrënies janë krejtësisht të pranueshme. Më e rëndësishme është marrja e mjaftueshme e lëngjeve gjatë gjithë ditës, jo respektimi i një momenti të caktuar për të pirë.

Persona që vuajnë nga sëmundje të zemrës, veshkave ose mëlçisë mund të kenë udhëzime të posaçme për kufizimin e lëngjeve. Në këto raste, sasia ditore e ujit duhet përcaktuar në përputhje me këshillën e mjekut.

Pra, uji i konsumuar gjatë vakteve nuk përbën kërcënim për tretjen. Besimi se ai neutralizon acidin e stomakut dhe pengon punën normale të sistemit tretës nuk mbështetet nga rekomandimet moderne mjekësore. Nëse nuk ju shkakton shqetësim, mund të pini ujë gjatë ushqimit pa frikën se do të dëmtoni tretjen.