Pas shitjes së kompanisë për 112 milionë euro, biznesmeni shpërndan 4 milionë euro me punonjësit

Pedro Pestana është vlerësuar për vendimin e marrë pas shitjes së kompanisë së tij teknologjike, Marosa, për shumën prej 112 milionë eurosh.

Pas arritjes së marrëveshjes me kompaninë shumëkombëshe Wolters Kluwer, ai zgjodhi të ndante 4 milionë euro nga përfitimi i tij me punonjësit që kishin ndihmuar në rritjen dhe suksesin e biznesit.

Në total, nga kjo ndarje përfituan 120 punëtorë. Pagesat iu dhanë jo vetëm stafit me vite përvojë në kompani, por edhe atyre që ishin punësuar kohët e fundit, shkruan Mirror, transmeton Klankosova.tv.

“Marosa u ndërtua falë punës së palodhshme të shumë njerëzve. Ndarja e përfitimit nga shitja është një mënyrë për ta vlerësuar kontributin e tyre dhe për t’u kthyer një pjesë të asaj që ndihmuan të krijohej”, deklaroi Pestana.

Biznesmeni theksoi në mënyrë të veçantë rolin e punonjësve të parë, të cilët i qëndruan pranë kompanisë në kohën kur ajo ishte ende një biznes i vogël në zhvillim.

Me këtë hap, Pestana synoi që rezultati financiar i shitjes të mos përfitonte vetëm prej tij, por të ndahej edhe me të gjithë personat që kishin dhënë kontribut në ndërtimin e Marosës, pa marrë parasysh sa gjatë kishin punuar aty.