Nxehtësia ekstreme: rreziku më i madh mund të fshihet brenda

Shumëkush e di se temperaturat ekstreme janë të rrezikshme, por ajo që shpesh lihet pas dore është se kërcënimi më serioz mund të jetë brenda ambienteve të mbyllura, sidomos kur ndalon kondicioneri ose, edhe më keq, kur nuk keni fare një të tillë.

Kur sistemi i ftohjes nuk punon, hapësirat e brendshme shndërrohen në “sera”, ku nxehtësia depërton nga dritaret dhe muret, ndërsa ajri i nxehtë mbetet i bllokuar brenda.

Brenda vetëm pak orësh, temperatura në ambientet e mbyllura mund të ngjitet ndjeshëm mbi atë të jashtme, veçanërisht në katet e sipërme dhe në hapësirat që ekspozohen drejtpërdrejt ndaj diellit.

Studimet tregojnë se pjesa më e madhe e vdekjeve nga nxehtësia ekstreme ndodhin brenda ndërtesave.

Sipas ekspertëve, trupi përpiqet të ftohet përmes djersitjes dhe qarkullimit të gjakut në lëkurë, por në kushte me temperaturë dhe lagështi të lartë ky proces dobësohet.

Nëse temperatura e trupit kalon rreth 40 gradë Celsius, funksionet e tij fillojnë të dështojnë, ndërsa temperaturat mbi 42 gradë mund të jenë fatale, raporton The Independent, transmeton Klankosova.tv.

Një tjetër vështirësi është se jo çdo ndërtesë reagon njësoj ndaj të nxehtit. Godinat e reja me izolim të mirë e ruajnë freskinë më gjatë, ndërsa ato me izolim të dobët dhe dritare të thjeshta mund të ngrohen shumë shpejt.

Një studim i zhvilluar në ShBA, që analizoi qindra mijëra ambiente dhe simuloi skenarë me valë të nxehti dhe ndërprerje të energjisë, zbuloi se një pjesë e madhe e ndërtesave mund të arrijnë temperatura të rrezikshme për jetën, jo vetëm për të moshuarit, por edhe për të rriturit e rinj dhe të shëndetshëm.

Për ta ulur rrezikun gjatë valëve të të nxehtit, ekspertët këshillojnë qëndrimin në katet më të ulëta të ndërtesës, mbylljen e perdeve gjatë orëve me diell dhe pirjen e ujit në mënyrë të rregullt.

Ekspertët paralajmërojnë se, me rritjen e temperaturave globale, ndërtesat duhet të projektohen jo vetëm për të kursyer energji, por edhe për të mbrojtur jetën e banorëve gjatë valëve ekstreme të të nxehtit.