Mos e lini valixhen mbi shtrat: çfarë duhet të dini para nisjes në udhëtim

Një inspektim i shpejtë i dhomës, larja e rrobave me temperaturë të lartë dhe pastrimi i kujdesshëm i valixhes mund t’ju shpëtojnë nga shumë probleme

Me nisjen e sezonit të pushimeve, nga udhëtimet nuk sillni vetëm kujtime të bukura, por ndonjëherë edhe “suvenire” të pakëndshme, si morrat e shtratit. Ekspertët tërheqin vëmendjen se këta insekte të qëndrueshëm mund të gjenden lehtësisht në hotele, autobusë, trena dhe aeroplanë, duke kaluar më pas në valixhe, në veshje dhe përfundimisht në shtëpinë tuaj.

Shumëkush mendon se morrat e shtratit janë shqetësim që lidhet vetëm me akomodimet e lira, por kjo nuk është e saktë. Ato mund të shfaqen edhe në hotele luksoze, pasi zakonisht transportohen nga vetë mysafirët. Për këtë arsye, një objekt i thjeshtë mund të shërbejë si ndihmës i dobishëm gjatë udhëtimit: rolja ngjitëse për heqjen e qimeve nga rrobat.

Ruli ngjitës si armë e fshehtë kundër morrave të shtratit

Sipas ekspertëve, një rul i vogël ngjitës mund të ndihmojë për të hequr morrat e shtratit nga këpucët dhe veshjet, para se ato të futen në valixhe. Kur të ktheheni në dhomën e hotelit, këshillohet që fillimisht të hyni në banjë dhe ta përdorni rulin mbi këpucët, pjesën e poshtme të pantallonave dhe përgjatë qepjeve të rrobave.

Nëse në sipërfaqen ngjitëse dalloni shenja të errëta ose me nuancë të kuqërremtë, mund të jetë tregues i mbetjeve të morrave të shtratit. Në një situatë të tillë, rekomandohet një kontroll më i detajuar i rrobave dhe i bagazhit, transmeton Telegrafi.

Së pari kontrolloni dhomën, e vetëm pastaj hapni valixhet

Një gabim i shpeshtë është që valixhja të vendoset menjëherë mbi krevat sapo të hyni në dhomë. Në vend të kësaj, këshillohet që bagazhin ta mbani përkohësisht në vaskë ose në kabinën e dushit, derisa të verifikoni gjendjen e akomodimit.

Para se ta hapni valixhen, është mirë të kontrolloni dhomën e hotelit, veçanërisht çarçafët, dyshekun dhe pjesën e kokës së krevatit. Kujdes i veçantë duhet t’u kushtohet qepjeve të dyshekut, palosjeve të çarçafëve dhe pjesës së kokës së krevatit, sepse pikërisht aty morrat e shtratit fshihen më shpesh. Disa njerëz përdorin edhe hekurin ose tharësen e flokëve si një truk shtesë, pasi nxehtësia mund t’i nxjerrë nga vendet ku janë fshehur.

Nëse vini re çfarëdo shenje që tregon praninë e morrave të shtratit, duhet të njoftoni menjëherë stafin e hotelit dhe të kërkoni një dhomë tjetër, mundësisht sa më larg asaj ku është konstatuar problemi.

Çfarë duhet të bëni sapo të ktheheni në shtëpi

Edhe në rast se gjatë udhëtimit nuk keni parë morra të shtratit, ekspertët rekomandojnë vigjilencë shtesë pas kthimit në shtëpi. Të gjitha sendet nga valixhja duhen larë në temperaturë më të lartë, përfshirë edhe ato rroba që nuk i keni veshur fare.

Pas kthimit në shtëpi, këshillohet gjithashtu pastrimi i hollësishëm i valixhes, në mënyrë që të shmangni futjen e morrave të shtratit në ambientin e shtëpisë. Vëmendje e posaçme duhet t’u kushtohet zinxhirëve dhe qepjeve, ndërsa rrobat, pas larjes, është mirë të thahen edhe në një program më të ngrohtë në tharëse, për të ulur rrezikun që këta insekte të padëshiruar të hyjnë në shtëpinë tuaj.