Cila është lidhja mes diellit dhe humorit tonë? Shkenca jep përgjigjen

E keni vënë re se si disponimi juaj përmirësohet në një ditë plot diell, ndërkohë që shiu duket se ju rëndon shpirtin?

Sipas një studimi të ri, kohëzgjatja e dritës natyrore gjatë ditës ushtron një ndikim më të fuqishëm në emocionet tona sesa elementë të tjerë si temperaturat, cilësia e ajrit apo sasia e reshjeve, raporton Klankosova.tv.

Hulumtuesit kanë konstatuar se gjatë stinëve me ditë më të shkurtra dhe me më pak orë diell, njerëzit shfaqin më shpesh shenja të tensionit psikologjik.

Ajo që duket të jetë vendimtare për gjendjen shpirtërore nuk është thjesht intensiteti i rrezeve diellore, por sidomos shtrirja kohore e intervalit mes agimit dhe muzgut.

Për të mbërritur në këtë përfundim, grupi i studiuesve shqyrtoi të dhëna nga stacione meteorologjike pranë disa universiteteve, bashkë me tregues të ndotjes atmosferike dhe variabla të tjerë të ambientit. Përfundimet nënvizojnë peshën që ka drita e diellit në shëndetin mendor të individëve.