Krahas të ardhurave janë dhe gjashtë faktorë të tjerë që ndikojnë, konkretisht Cilësia e kohës së punës; Perspektiva dhe siguria në punë; Aftësitë dhe autonomia në punë; Intensiteti i punës; Mjedisi social në punë; Mjedisi fizik i punës. Këto faktorë së bashku japin një panoramë të plotë të kushteve të punës.

Një cilësi më e lartë e punës shoqërohet me më shumë kënaqësi në jetë, angazhim më të madh në punë, besim më të lartë social dhe më pak gjasa që punonjësit të largohen nga puna.

Sipas raportit, ka dallime të ndjeshme në pikët e cilësisë së punës mes vendeve, të cilat pasqyrojnë përbërje të ndryshme të fuqisë punëtore, kuadre institucionale dhe rregullore të ndryshme.

Danimarka, Finlanda, Luksemburgu, Holanda dhe Norvegjia, raportojnë pikët më të larta të cilësisë së punës në shumicën e dimensioneve, ndërsa vendet e Ballkanit Perëndimor raportojnë mesatarisht pikët më të ulëta.

Punonjësit shqiptarë raportojnë pakënaqësitë më të mëdha për të ardhurat, cilësinë e kohës së punë, mjedisin social e fizik, mungesën e perspektivës, ngarkesën në punë ndërsa janë pak më pozitivë në zhvillimin e aftësive të tyre për punë.

Të ardhurat, shqiptarët ndër më të pakënaqurit

Pakënaqësinë më të madhe punonjësit shqiptarë e kanë në lidhje më të ardhurat, ku renditen në fund të listës, së bashku me malin e Zi, Maqedoninë e Veriut, Serbinë, me 53 pikë, nga 58, që është mesatarja europiane, ndërsa Greqia është në fund të listës me 52 pikë.

I njëjti raport gjeti se 39% e punonjësve shqiptarë kanë vështirësi, ose shumë vështirësi për të mbyllur muajin, nga 8% që është mesatarja europiane.

Kjo përqindje është më e larta në Europë dhe ka shumë diferencë me shtetet e tjera. Vendi i dytë pas nesh është Greqia, ku 21% e të anketuarve pohojnë se nuk shtyjnë dot fundin e muajit.

Interesant është që punonjësit e Kosovës, ndonëse është vendi më paga më të ulëta në Europë, nuk janë në fund të listës në treguesin e të ardhurave, duke u renditur me 58 pikë, në nivelin e mesatares së Europës dhe më lart se vende si Franca, Spanja, apo Italia.

Treguesi i të ardhurave (Earnings) mat në çfarë mase puna arrin të sigurojë jetesën e punonjësit. Ai përfshin nivelin e të ardhurave, parashikueshmërinë e tyre dhe sa të drejta perceptohen ato në raport me përpjekjen dhe punën e kryer.

Cilësia e kohës së punës, të parafundit

Një tjetër tregues ku Shqipëria është e parafundit është ai i cilësisë së kohës së punës, me 64 pikë (nga 75 mesatarja europiane), duke lënë pas vetëm Malin e Zi.

Treguesi i cilësisë së kohës së punës (Working time quality) vlerëson cilësinë e kohës së kaluar në punë. Ai fokusohet te kohëzgjatja e orarit të punës, puna në orare jo standarde, fleksibiliteti dhe parashikueshmëria e orareve, si dhe kontrolli që punonjësit kanë mbi kohën e tyre të punës.

Punonjësit shqiptarë punojnë në një mjedis social negativ

Një tjetër tregues ku Shqipëria është e parafundit lidhet me mjedisin social, me 73 pikë, nga 79 mesatarja europiane, duke lënë pas vetëm Malin e Zi.

Mjedisi social (Social environment), lidhet me nevojën e punonjësve për marrëdhënie mbështetëse në vendin e punës, si me kolegët ashtu edhe me drejtuesit. Ai përfshin mungesën e sjelljeve negative sociale dhe cilësinë e menaxhimit.

Mjedis më i rëndë fizik në Europë për Shqipërinë dhe Kosovën

Edhe për mjedisin fizik, Shqipëria renditet e parafundit në Europë (70 pikë nga 81 mesatarja e BE-së), duke lënë pas vetëm Kosovën.

Treguesi i mjedisit fizik (Physical environment) mat ekspozimin ndaj rreziqeve fizike dhe kërkesave fizike në vendin e punës.

Pa perspektivë

Edhe për perspektivën në punë, punonjësit shqiptarë renditen nga fundi, me 72 pikë, kundrejt mesatares europiane prej 75 pikësh, duke lënë pas Sllovakinë, Bosnjë dhe Hercegovinën, Maqedoninë e Veriut, Rumaninë, Çekinë dhe Malin e Zi dhe Kosovën (që është e fundit në Europë për mungesën e perspektivës në punë).

Treguesi i perspektivës (Prospects), lidhet me nevojën e punonjësve për siguri dhe kontroll mbi të ardhmen. Ai përfshin perspektivat e karrierës, sigurinë e vendit të punës, cenueshmërinë dhe statusin e punësimit, duke qenë se këta faktorë ndikojnë në aksesin ndaj mbrojtjes sociale.

Ngarkesë e lartë në punë

Punonjësit shqiptarë mendojnë se kanë një intensitet relativisht të lartë në punë, me 60 pikë, nga 67 që është mesatarja europiane, duke lënë pas Norvegjinë, Kosovën, Malin e Zi, Maltën dhe Qipron.

Treguesi i Intensiteti të punës (Work intensity) i referohet ritmit me të cilin kryhet puna gjatë orarit të punës. Ai merr në konsideratë ngarkesën dhe kërkesat emocionale të punës, si dhe kufizimet që ndikojnë në ritmin e punës. Këto kufizime mund të vendosen nga klientët, menaxherët ose objektivat e prodhimit. Sa më shumë kufizime të ketë, aq më e vështirë bëhet të punohet me ritmin e preferuar dhe aq më i lartë është rreziku i përplasjes së prioriteteve.

Punonjësit shqiptarë besojnë në aftësitë e veta në punë

Më mirë Shqipëria renditet në treguesin e aftësive të punës, me 55 pikë, shumë afër mesatares së BE-së prej 57 pikësh, duke lënë pas shumë shtete si Spanja, Mali i Zi, Portugalia, Greqia, Italia. Por edhe në këtë tregues Kosova është shumë mbi ne (60 pikë).

Treguesi i aftësive dhe autonomisë (Skills and discretion) lidhet me nevojën e punonjësve për të përdorur dhe zhvilluar aftësitë e tyre në punë, si dhe për t’u zhvilluar përmes përvojës profesionale. Ai përfshin aspektet njohëse të punës, mundësitë për zhvillim, lirinë në vendimmarrje, pjesëmarrjen në organizatë dhe trajnimet.

Anketa

Anketa Europiane për Kushtet e Punës 2024, e publikuar në prill të këtij viti ofron një panoramë të plotë të cilësisë së punës në Europë, duke analizuar karakteristikat e fuqisë punëtore, vendet e punës, cilësinë e punës dhe cilësinë e jetës në punë.

Anketa është një instrument i rëndësishëm për politikëbërësit, pasi nxjerr në pah rolin e cilësisë së punës në arritjen e një rritjeje të qëndrueshme dhe gjithëpërfshirëse në Europë.

Gjetjet e anketës bazohen në 36,644 intervista ballë për ballë, të zhvilluara në 35 vende. Çdo intervistë zgjati rreth 45 minuta, duke ofruar një pasqyrë unike mbi gjendjen e punës në Europë.

Kjo anketë është zhvilluar në mënyrë të rregullt që nga viti 1990, duke ofruar një seri të krahasueshme të të dhënave për kushtet e punës në Europë në intervale pesëvjeçare./Monitor

The post Studimi/ Cilësia e punës, punonjësit shqiptarë ndër më të pakënaqurit e Europës! Ja 7 arsyet appeared first on Albeu.com.

Sidomos për fuqinë blerëse, me pagën e një ore në Shqipëri mund të blesh gjysmën në krahasim me vendet e rajonit, si Serbia, Bosnjë Hercegovina, Maqedonia e Veriut, apo Mali i Zi.

Të dhënat janë bërë të ditura në një raport të fundit të Eurostat, që krahason pagën për orë në euro dhe të matur sipas fuqisë blerëse (PPS) në vendet e Bashkimit Europian dhe ato kandidate për vitin 2022. (të dhënat për Kosovën mungojnë).

Punonjësit shqiptarë, sipas të dhënave, paguhen m 2.47 euro në orë, në krahasim me punonjësit serbë, që marrin gati dyfishin, në 4.43 euro në orë, apo në Bosnjë me 4 euro. Të dhënat për Malin e Zi nuk janë përditësuar, por ata paguheshin 3.42 euro për orë që në vitin 2014 dhe maqedonasit 2.2 euro po në 2014-n.

Femrat në Shqipëri paguhen 2.63 euro në orë, ndërsa meshkujt 2.39 euro, sipas statistikave të Eurostat.

Sipas standardit të fuqisë blerëse (PPS), që i bën të dhënat më të krahasueshme për shkak se eliminon diferencat mes çmimeve, Shqipëria renditet serish e fundit me pagën orare prej 4.62 PPS, përkundrejt 7.6PPS në Serbi dhe 8.7 PPS në Bosnjë. Maqedonia e Veriut e kishte këtë tregues 5.2 që në 2018-n (kur në Shqipëri ishte 3.2) dhe Mali i ZI 6.2 që në 2014-n.

Europa

Sipas të dhënave të tetorit 2022, paga bruto mesatare për orë pune, e shprehur në euro, tregon dallime të mëdha mes vendeve të Bashkimit Evropian. Paga më e lartë mesatare bruto për orë u regjistrua në Danimarkë me 29.8 euro, e ndjekur nga Luksemburgu (24.0 euro), Belgjika (23.8 euro), Irlanda (20.3 euro), Gjermania (19.4 euro), Finlanda dhe Suedia (me 19.3 euro secila) si dhe Holanda (19.0 euro), referon Eurostat.

Në anën tjetër, pagat më të ulëta mesatare bruto për orë u regjistruan në Bullgari (4.1 euro), Rumani (5.6 euro), Hungari (5.7 euro), Portugali (6.2 euro), Kroaci (6.8 euro) dhe Poloni (6.9 euro).

Në shkallë të përgjithshme, paga mesatare më e lartë për orë në një vend të BE-së ishte 7.4 herë më e lartë se ajo më e ulëta.

Sipas fuqisë blerëse, paga mesatare bruto për orë në nivel kombëtar, në tetor 2022, ishte 3.3 herë më e lartë në vendin me pagën më të lartë krahasuar me atë më të ulët, kur shprehet në standarde të fuqisë blerëse (PPS), një njësi që eliminon ndryshimet e niveleve të çmimeve mes vendeve.

Pagat më të larta mesatare bruto për orë, të shprehura në PPS, u regjistruan në Danimarkë (22.4 PPS), Belgjikë (21.3 PPS), Luksemburg (18.4 PPS), Gjermani (17.3 PPS) dhe Irlandë (17.0 PPS). Në anën tjetër të shkallës, pagat më të ulëta mesatare bruto për orë u regjistruan në Bullgari (6.7 PPS), Portugali (7.4 PPS), Hungari dhe Letoni (8.9 PPS secila), Kroaci (9.4 PPS), Sllovaki (9.7 PPS), Greqi (9.8 PPS) dhe Rumani (9.9 PPS).

The post Punonjësit shqiptarë kanë rrogat më të ulëta për orë në Europë, Eurostat publikon shifrat appeared first on Albeu.com.

Më shumë se gjysma (54%) e shqiptarëve raportojnë se kryejnë llogaritje të thjeshta me numra, për shembull, duke shtuar, duke zbritur, duke shumëzuar ose duke pjesëtuar, si pjesë e punës së tyre kryesore, vuri në dukje Anketa Europiane për Aftësitë dhe Vendet e Punës.

Kjo përqindje është më pak se mesatarja e 5 vendeve të Ballkanit Perëndimor (WB5 60%) dhe BE-së (76%),

Të dhënat e anketës tregojnë se burrat kanë më shumë gjasa se gratë (57% kundrejt 51%) që të kryejnë llogaritje të thjeshta, si dhe punëtorët më të rinj (66% e atyre të moshës 25-34-vjeç kundrejt 33% e atyre të moshës 55-64).

Detyra të tilla janë gjithashtu më të zakonshme tek ata me arsim të nivelit të lartë (70%), krahasuar me 58% të atyre me arsim të mesëm dhe 31% të atyre me arsim të nivelit të ulët.

Në mënyrë të ngjashme, përqindja e atyre që punojnë në profesione të kualifikuara që i përgjigjen kësaj pyetjeje në mënyrë pozitive, është shumë më e lartë (74%) sesa tek ata me profesione që lidhen me punë manuale (54%), gjysmë të kualifikuar (47%) dhe elementare (31%).

Rreth 9% e të anketuarve shqiptarë thonë se kanë përdorur matematikë më të avancuar, algjebër ose statistikë, për shembull llogaritje, regresione, simulime, që është më e ulët se në BE (16%) dhe në 5 vendet e tjera të Ballkanit Perëndimor (11%).

Përdorimi i matematikës së avancuar, ka më shumë gjasa te punëtorët më të rinj (10% dhe 14% e të anketuarve të moshës 25-34 dhe 35-44), sesa midis moshave më të vjetra (2% midis atyre të moshës 55-64 vjeç).

Përdorimi i matematikës së avancuar, kërkohet gjithashtu më shumë tek ata që punojnë në sektorin publik, arsim apo shëndetësi (12%) dhe shërbime (10%), për dallim nga ata që punojnë në industri apo bujqësi (6%).

Sipas anketës, shumica e punonjësve kryejnë aktivitete për zgjidhjen e problemeve në punën e tyre kryesore.

Afro gjashtë në dhjetë (58%) shqiptarë raportojnë se kryejnë aktivitete të zgjidhjes së problemeve të paktën shpesh si pjesë e punës së tyre kryesore , që është mbi mesataren e WB5 (52%).

Gratë kanë pak më shumë gjasa ta bëjnë këtë sesa burrat (61% kundrejt 56%).

Përfshirja në aktivitetet e zgjidhjes së problemeve është gjithashtu më e lartë në mesin e atyre që punojnë në sektorin publik, arsim apo shëndetësi (70%) dhe shërbime (62%), për dallim nga ata që punojnë në bujqësi ose industri (48%)./ MONITOR

The post Punonjësit shqiptarë përdorin matematikë elementare në punë, shumë më pak se rajoni dhe BE appeared first on Albeu.com.

Mundësitë për punësim, sidomos për disa kategori si mjekë, infermierë e teknologji informacioni, nxitën shumë shtetas që të emigronin drejt ekonomisë më të madhe të Europës me dokumente të rregullta punësimi.

Të dhënat e Eurostat treguan se pas vitit 2016 u shënua një rritje e shpejtë e lejeve të qëndrimit të dhëna nga Gjermania për shtetasit shqiptarë. Rekordi u arrit në vitin 2019, me 12 mijë lekë, duke u renditur të tretët pas Italisë së Greqisë.

Por, pas vitit 2019, ritmi i dhënies së lejeve të qëndrimit ka rënë dukshëm. Në 2020-n, ato ranë në 8,300. Ndërsa tkurrja në atë vit reflekton pasojat e mbylljes si rrjedhojë e pandemisë, tendenca ka rezultuar më e fortë edhe në 2021-n. Sipas Eurostat, në vitin 2021, Gjermania dha rreth 4500 leje për shtetasit shqiptare, pothuajse përgjysmim në raport me vitin e mëparshëm dhe niveli më i ulët që nga viti 2016.

Në total, që nga viti 2008 deri në 2021-n, Gjermania ka dhënë rreth 53 mijë leje qëndrimi për shtetasit shqiptarë, ose 7% të totalit nga shtetet e BE-së, duke u renditur e treta. Në vend të parë renditet Italia, që ka dhënë 372 mijë lejë qëndrimi gjithsej, ose rreth 48% të totalit. Greqia vijon më pas me 258 mijë leje, ose 33% të totalit.

Mbretëria e Bashkuar është e katërta, me rreth 20 mijë, por të dhënat e këtij shteti nuk raportohen që nga viti 2019, si rrjedhojë e daljes së vendit nga Bashkimi Europian.

Në total, që nga viti 2008, kur Eurostat raporton të dhënat, shtetet e BE-së kanë dhënë për shqiptarë gjithsej 756 mijë shtetas shqiptarëë. Nga institucionet ndërkombëtare, numri i lejeve të qëndrimit për shtetasit e një vendi llogaritet si emigracion. Kjo shifër është gat isa 30% e popullsisë që vlerësohet që jeton aktualisht në Shqipëri.

Të dhënat e Eurostat tregojnë se vetëm në vitin 2021 janë dhënë 55.2 mijë leje qëndrimi për shtetasit shqiptarë në një nga vendet e BE-së./Monitor/

The post Punonjësit shqiptarë nuk janë më të preferuarit e Gjermanisë, përgjysmohen leje e qëndrimit appeared first on Albeu.com.

Organizata Ndërkombëtare e Punës (ILO) në publikimin për pagat në nivelin e varfërisë verifikoi se, gati 17 për qind e të punësuarve në Shqipëri me pagë paguhen në intervalin 3.2-5.5 USD në ditë.

Shqipëria u rendit në vendin e 62 në mesin e 117 vendeve të botën për nivelin e varfërisë në punë. Gjithashtu vendi ynë numëron rreth 2 për qind të punësuarve që marrin nga 1.9-deri në 3.2 dollarë në ditë.

Të dhënat e institucionit ndërkombëtar që merret me treguesit e punësimit tregojnë se, në vitin 2021, gjithsej 19 për qind e të punësuarve në vend paguhen më pak se 5.5 USD në ditë ose rreth 130 dollarë në muaj.

Zakonisht kategoritë e punonjësve në varfëri punojnë në sektorët e bujqësisë dhe shërbime. Puna e tyre është e përqendruar në sezone dhe me paga shumë të ulëta.

Megjithëse kjo kategori punonjësish numërohet si e punësuar, të ardhurat e tyre nga puna janë nën kufirin e varfërisë relative 5.5 USD në ditë.

Teksa varfëria në botën e zhvilluar shpesh shoqërohet me papunësinë, varfëria ekstreme që ekziston në pjesën më të madhe të botës në zhvillim është kryesisht një problem i personave të punësuar në këto shoqëri. Për këta punëtorë të varfër, problemi është zakonisht ai i cilësisë së punësimit, shpjegon ILO.

Prandaj, ulja e varfërisë në përputhje me Objektivat e Zhvillimit të Qëndrueshëm kërkon rritjen e mundësive të punësimit dhe të të ardhurave të të varfërve që punojnë, atyre njerëzve që janë të punësuar, por nuk janë në gjendje të ngrenë veten dhe familjet e tyre mbi pragun e varfërisë.

Për shkak të strukturës së ekonomisë, puna në vendin tonë ka vlerë të ulët. Sipas statistikave kombëtare gati gjysma e punonjësve në vendin tone paguhet në nivelin e pagës minimale. Kjo ndodh pasi rreth 40 për qind e të punësuarve janë në sektorin bujqësor që kanë fitime shumë të ulëta nga puna.

Pagat në Shqipëri janë rritur me ritme të ulëta gjatë dekadës së kaluar, ndërkohë që karakterizohen nga një informalitet i lartë. Përveçse mijëra persona punojnë në informalitet total, deklarimi i pjesshëm i pagës për efekt tatimi është një fenomen i përhapur në vendin tonë./Monitor/

The post 19% e punonjësve me pagë në Shqipëri paguhen nën kufirin e varfërisë 5.5 USD në ditë appeared first on Albeu.com.