Për investitorin strategjik u kërkua dënimi me 14 vite burgim, ndërsa për Ardit Hasanbegaj, u kërkuan 9 vite burg.

Të dy pavarësisht dënimit që do të marrin përfitojnë ulje të një të tretës nga gjykimi i shkurtuar. Dy të pandehurit akuzohen për sigurim kushtesh dhe mjetesh për të kryer vrasje, grup kriminal dhe armëmbajtje pa leje.

Biznesmeni Pellumb Gjoka po gjykohet bashkë me disa të pandehur të tjerë me procedurë të zakonshme, për vrasjen e Gjin Ndojit në 2020, i njohur edhe me mbiemrin Boriçi.

Seanca e radhës u shty për më 9 mars, kur priten konkluzionet e avokatëve mbrojtës.

The post Dosja Metamorfoza/ SPAK jep pretencën, ja sa vite burg kërkon për biznesmenin Pëllumb Gjoka dhe ish-zyrtarin e Policisë, Ardit Hasanbegaj appeared first on Albeu.com.

Një dokument i rrjedhur në media sugjeron se Prokuroria e Posaçme Kundër Krimit të Organizuar dhe Korrupsionit ndërmori një seri veprimesh hetimore – përfshirë përgjimin ambiental ndaj një anëtari të Gjykatës Kushtetuese, si pjesë e një procedimi për korrupsion pasiv.

Sipas dokumentit, SPAK urdhëroi të kryhej midis datave 10 shkurt dhe 25 shkurt përgjimi në vende publike i anëtarit të Gjykatës Kushtetuese, Gent Ibrahimi, pasi kishte informacione se persona të interesuar kishin ndikuar te ai për mënyrën e formulimit të arsyetimit të vendimit të Gjykatës Kushtetuese ndaj një ankimi të biznesmenit Pëllumb Gjoka.

Sipas dokumentit të rrjedhur në media, arsyetimi në favor të Gjokës nga Gjykata Kushtetuese do të përdorej edhe në mjaft gjykime të tjera të ngjashme, të bazuara në të dhënat e marra nga aplikacioni Sky ECC, pasi vendimmarrja e Gjykatës Kushtetuese është praktikë e detyrueshme për institucionet e tjera të drejtësisë.

SPAK nuk komentoi lidhur me vërtetësinë e kopjes së aktit të publikuar, si dhe as nuk bëri me dije nëse ka hetim për rrjedhjen në media të këtij dokumenti.

“Për momentin nuk kemi koment”, tha SPAK përmes koordinatores për marrëdhëniet me mediat.

Gjyqtari Gent Ibrahimi nuk ishte i arritshëm për koment nëpërmjet telefonit. Ndërkohë, nëpërmjet një njoftimi për shtyp, Gjykata Kushtetuese mohoi se vendimet e saj mund të ndikoheshin në mënyrë të paligjshme.

“Nisur nga debati mediatik i ditëve të fundit për vënien nën përgjim nga Prokuroria e Posaçme të një gjyqtari kushtetues, që lidhet me ushtrimin e veprimtarisë së tij, konsiderojmë me rëndësi të sqarojmë opinionin publik se, në ushtrimin e misionit kushtetues për garantimin e epërsisë së Kushtetutës, ajo udhëhiqet nga parimet e kolegjialitetit, pavarësisë dhe paanësisë, të sanksionuara në ligjin themelor,” tha Gjykata Kushtetuese.

Biznesmeni Pëllumb Gjoka, i shpallur nga qeveria ‘Rama’ si investitor strategjik, u arrestua në korrik të vitit 2023 si pjesë e një organizate kriminale, pasi iu gjetën komunikime në aplikacionin Sky ECC që e lidhin me një sërë veprash penale të rënda, përfshirë vrasje.

Komunikimet e kapura nga autoritetet franceze në aplikacionin Sky ECC kanë shërbyer si bazë e një sërë hetimesh ndaj krimit të organizuar, politikanëve dhe zyrtarëve të lartë të drejtësisë.

Gjoka e ankimoi vendimin që e mban në burg në të tria shkallët e gjykimit, duke kundërshtuar si të paligjshëm ndalimin e tij në bazë të provave të marra nga Sky ECC, por pa rezultat.

Në vijim paraqiti kërkesë në Gjykatën Kushtetuese për shpalljen të papërdorshme të komunikimeve Sky ECC, por me një vendim unanim të datës 30 dhjetor, Gjykata Kushtetuese e rrëzoi kërkesën. /Birn

The post SPAK dyshon se biznesmeni Pëllumb Gjoka u përpoq të ‘ndikonte’ vendimin për “Sky ECC” appeared first on Albeu.com.

Raportohet se në seancën e parë në themel, nuk është paraqitur biznesmeni Pëllumb Gjoka i arrestuar në kuadër të operacionit “Metamorfoza”.

Ai mbrohet nga avokatët Ylli Manjani dhe Gurali Brahimllari.

Prokurori Altin Dumani, njëherazi kreu i SPAK ka kërkuar “vijimin e shqyrtimit gjyqesor dhe viktimat e veprës penale të quhen të njoftuar pasi gjykata ka ezauruar rrugën ligjore”.

Avokati i ish-shefit të policisë, Adrit Hasanbegaj, kërkon shtyrje të seancës për shkaqe proceduriale për të patur kontakt me klientin dhe një mbrojtje efektive.

Ndërkohë nga ana tjetër, avokatët e Pëllumb Gjokës kërkojnë të shtyhet gjyqi në afatin maksimal për të pritur dhe zbardhjen e vendimit të Gjykatës Kushtetuese

Seanca e ardhshme në GJKKO u la më 21 janar 2025.

The post Nis gjyqi në themel për SkyEcc/ Biznesmeni Pëllumb Gjoka nuk paraqitet në seancën e parë, zbardhet kërkesa e kreut të SPAK appeared first on Albeu.com.

Një konglomerat juristësh, deri në nivelet e lartë të Drejtësisë Shqiptare, kanë dhënë ndihmëse përmes vendimeve, ndikimit dhe influencës së tyre në tre shkallët e gjyqësorit Shqiptar, që Behar Bajrit, t`i krijoheshin kushtet ligjore për të dalë nga qelia.

Gazetari Elton Qyno, ka mësuar se në aplikacionin “Sky” flitet për një personazh të njohur të Drejtësisë Shqiptare me emrin “Tani”, i cili 4 ditë pasi Behar Bajri kishte dalë nga burgu shkon në takim me biznesmenin Pëllumb Gjoka, duke u dorovitur financiarisht nga ky i fundit, për ndihmesën që kishte dhënë në operacionin juridik për lehtësimin e kushteve ligjore që ndikuan në lirimin nga burgu të Bajrit.

Në takimin që ka pasur personazhi i Drejtësisë me emrin “Tani”, Pëllumbi i thotë Behar Bajrit në aplikacionin “SKY” si më poshtë vijon:“…vëlla e takova “Tanin”, ja dhashë ato.

Me zor ja kam dhanë me 100 bena…i thashë deshti me të dhanë ma shumë, por unë nuk e lashë.

Shumë faleminderit tha…Por nuk deshi me i marë, tu ba be ja kam dhanë, dhe i erdhi shumë mirë, që je kujtua. Duhet vëlla dhe i thashë që ke thana “…ta paça borxh tan jetën…”.

Por ndaj këtij personazhi të Drejtësisë, kreu i SPAK Altin Dumani, nuk ka vepruar as me marrjen e tij në pyetje për sqarimin e këtij episodi, as me kontrollin e shtëpisë, as me sekuestrim telefoni dhe me asnjë nismë tjetër ligjore, duke e lënë rastin jo të domosdoshëm për ta hetuar.

Një pjesë e bisedave dhe negociatave që çuan në kapërcimin e derës së burgut nga i arrestuari i operacionit “Oaz”, Behar Bajri, janë zhvilluar në aplikacionin “SKY”, të cilat tashmë janë zbardhur në dosjen “Metamorfoza”, që SPAK ka çuar për shqyrtim në gjykatë.

Behar Bajri, arrin të dalë nga burgu në 29 qershor 2020, pasi Xhevahir Lita, kishte krasituar akuzat e rënda si “Vrasje me dashje” mbetur në tentativë, “Vrasje me dashje” kryer në bashkëpunim, “Mbajtje pa lejë e armëve dhe municioneve”, Vrasje me dashje”, “Pastrim i produkteve të veprës penale” dhe “Shtrëngim me anë të kanosjes dhe dhunës për dhënien e pasurisë”.

Në këmbë mbeti vetëm akuza e “Organizimit të lotarive të palejuara”, për të cilën Behar Bajri, u dënua në gjykatën e Shkodrës.

Bajri arrin në dalë nga burgu dhe në 4 korrik 2020, bisedon me Pëllumb Gjokën, për një seri planesh.

Por në bisedë e sipër të zhvilluar në aplikacionin “Sky”, mes tyre zhvillohet një bisedë për respektimin financiarisht të një personazhi me emrin “Tani”, që dukshëm sipas përmbajtjes ka ndihmuar Behar Bajrin për të dalë nga burgu.

Pëllumbi i thotë Behar Bajrit: “…vlla e takova dhe Tanin, ja dhashë ato…”. Ndërsa Behari ia kthen shkurtimisht: “…po po… po…po…”.

Sërish Pëllumb Gjoka vijon t’i shkruajë Beharit që kishte vetëm 4 ditë që ka dalë nga burgu: “…me zor ja kam dhanë me 100 bena, i thashë deshti me të dhanë ma shumë, por unë nuk e lashë…Shum shum faleminderit tha…”.

Behari: “Tanit…”!?

Pëllumbi: “Po Tanit…”.

Behari: “Mirë bane…”.

Pëllumbi: “…Nuk deshi me i marrë, tu ba be ja kam dhanë dhe i erdhi shumë mirë që je kujtuar…I thashë që ke thanë tit a paca borxh tan jetën…”.

Por Behari ia kthen Pëllumbit shkurtimisht:  “…shumë mirë vëlla…dhe ishadha nuk bahet se me pas nevojë më ka gati me pas naj hadh…”.

Ndërsa Pëllumb Gjoka, vijon t`i shkruaja Beharit duke i thënë se: “Tani” që ai kishte takuar i ka lënë një porosi për Beharin që mos flasë dhe komunikojë me Senadin,(personazh i njohur në Shkodër) se nuk është në terezi me mënd e kokës.“…më tha me të porositë, mos fol asgja me Senadin se nuk asht në terezi me mend të kresë.

Senadi të don shumë ty, por qysh kur i ka ra infrakti nuk është normal…”,-i thotë në apikacionin “Sky”, Pëllumb Gjoka, Behar Bajrit.

Bajri ia kthen: “…po po, qa mej than…”. Por Pëllumbi vijon sërisht duke shkruar:”…nuk din ca flet Senadi, më porositi me të thanë…”.

Ndërsa Behari ia kthen shkurtimisht: “…po mirë, ma vlla…”.

The post Zbardhen bisedat në “SKY”/ Kush është “Tani” i drejtësisë që u pagua nga Pëllumb Gjoka 4 ditë pas lirimit të Behar Bajrit appeared first on Albeu.com.

Komunikimi nis në mbrëmjen e 8 dhjetorit 2020, kur SPAK nisi operacionin “Asgjë nuk harrohet”, duke u arrestuar Viktor Imerin e Vlorës dhe persona të tjerë, përfshirë dhe Emiljano Shullazin, për ngjarjen e vrasjes së Klodian Saliut, Vajdin Lamaj dhe Artan Arsin.

Behari dhe Gjoka, komentojnë operacionin e SPAK duke u shprehur se: “…Viktor Imeri, paska shkuar me kamt e veta në polici…”.

Më tej, ata vijojnë bisedën duke folur për Dorian Dulin, një personazh ky që Behar Bajri dhe Pëllumb Gjoka e duan të vdekur.

Në bisedat e zhvilluara në aplikacioknin “Sky”, Behar Bajri, shprehet se ka ka ndërtuar një strategji të qartë që ka vetëm një pikësynim, duke treguar se Dorian Duli votimet nuk i ha, pasi i është prerë bileta.

Madje Bajri tregon se kanë për t’u vrarë dhe “Niklaqurët e Tomës, pasi me ta mburret ai”.

“…kam qef t’i çoj deri në fund, por unë e kam nji pikësynim. Dori votimet nuk i han mar vlla, se i asht pre bileta. Dhe Niklaqurët e Tomës kan me u vra, se këta ka Toma dhe me ta mburret Toma. Thjesht jam tu ju ndejt si në autobus. Se Bardhok, e Blert e tan do ti vras veç nëse vdes…”.

Ndërsa më tej, Behari i thotë biznesmenit Pëllumb Gjokës se:

“…por nji ditë, kam me e hëngur Dorin, se ku, e tek, nuk e di. Por ishalla nuk i thehet në dorë atij dhe mos ti ngelin, sikur ja bani shkosin ai (Ardjani). Jam tu prit me i mbyll ito gjyqe se mbyll tesh dhe atëherë ke me nigju se ça ka mu sjell, e mendosh. Deri në datëlidjen teme, njëri do vdesi prej tynve se kujt do t’i bin lapsi nuk e di, por dikush do ikun…do ikun nji nga grupi…”.

Gjoka-Bajri, flasin së bashku duke u shprehur se Dorian Dulit, ka mundësi t’ja heqin licencën e pikave kazinove dhe pikave të basteve, që ka në Shkodër.

Në mbrëmjen e 8 dhjetorit 2020, Pëllumb Gjoka, i shkruan Behar Bajrit duke i thënë se: “…Dorit ka mundësi me ja hek liçencën, por mos i thuaj gja “Bushetës…(Nofka e një personazhi të Politikës Shqiptare)”.

Mirëpo, sipas kontekstin të bisedës që zhvillohet mes këtyre dy personazheve, duket se Behar Bajrit, nuk i intereson shumë heqja e liçencës Dorian Dulit, por arrestimi i tij.

Behari i shkruan Pëllumbit: “…A thu po e arrestojnë Dorin, se më kan than info këta të shtetit. Tesh nji muaj ka si më kanë thënë. A po e arrestojnë Dorin, këtë p*** motren, se nuk po laj vend me mujt me zen…Kishte ken tesh tek ky “Leksi i Druve…”.

“…Se di…” – i thotë Beharit, Pëllumb Gjoka duke shtuar se: “…ka kush mbron Dorin…”.

Behari ia kthen: “…Kush po e mbron Dorin…?”.

Pëllumbi: “…Pse nuk e di ti…?”

Behari: “…Jo nuk e di…por di që Toma Bardhokun e don të vdekur, kyt e di unë…për Bardhokun se Toma e don të vdekun”.

Pëllumbi: “…Nuk po flasim për Bardhokun…”.

Por Behar Bajri ia kthen se: “…jo kyt nuk e di, Ardjani e di ma mir…se tek ai parkohet më shpesh dhe ato që i ke thënë ti ka shkuar Ardjani ja ka thënë fill Tomës…Dhe Ardjani nuk man gja për vedi, fill me fol…”.

Por Pëllumbi ia kthen: “…E di, por nuk ja kam thanë unë…m’i ka thanë Ardjani…”.

Kurse Behar Gjoka i shkruan më tej se: “…a e ke shok apo asht në dy krahët ai?…se nuk e kuptoj hiq punën e tij…Për Benin (Arben Ndoka), s’kam çfarë flas por Ardjani asht me dy fytyra…”.

Sërish Pëllumbi i thotë Beharit se: “…ai (Ardjan Nikulaj) asht shok me mua, por kur e lyp Toma shkon e rrin me Tomën. Sa i jep naj tokë a naj garazh, bahet me Tomën…Po shok më ka prap…”.

Behari: “…Po e di, jama…. …Jo mu mi ka dhanë dy garazhë dhe nji hymje por me të, nuk jam shok. Veç me dit, e me ble e kam, se për mu kurvë ashtë e kurvë do mbetet…dhe nuk ashtë se i veshi këpucët për të as për vota as për asgja…”.

Pëllumbi: “…Unë nuk rri me dy palë njerëz që nuk shkojnë, unë maj një krah…”.

Por Behari ia kthen se: “…kush man dy krahë…? Ti nuk din gja, se ça asht tu sjell dhe flet në ajër…”.

Ndërsa biznesmeni Gjoka vijon t’i shkruajë Behar Bajrit duke i thënë se: “…Po mirë më shpjego ti që mos të rri në ajër unë….Bardhoku i lyp Dorit me u prish me Tomën…Dori thotë nuk prishem me ta, se e kam për gjithçka…”.

Njëherësh Behar Bajri ia kthen se: “…kam qef ti çoj deri në fund, por unë e kam nji pikësynim. Dori votimet nuk i han mar vlla, se i asht pre bileta. Dhe Niklaqurët e Tomës kan me u vra, se këta ka Toma dhe me ta mburret Toma. Thjesht jam tu ju ndejt si në autobus. Se unë votë nuk ka prej meje. Dhe sa për ty nuk jam bukëshkelës dhe nuk rrij kurrë me hasmin tënd as mik nuk e baj kurrë, por janë disa gjara se do ti shpjegoj, se nuk janë ashtu ku ta realizoj, atëherë ke me kuptu. Se Bardhok, e Blert e tan do ti vras veç nëse vdes…”.

Por Behari ia kthen shkurt: “…Hap syt ti për vetin…”.

Ndërsa Behari i thotë: “…unë sytë e hapun i kam tan ditën, i njoh kurvat mirë se kush janë…i haj tan këta kurva. Por ke me i kuptu shumë shpejt dhe nuk të kam cilësu ma pak se vëllai jem dhe nuk të cilësoj ndryshe, por nuk du me të përzi, se këto i kam personale dhe dua ti qoj deri në fund, por nuk dua të dal në s’kenë me ty për asgja. Dhe përsa i përket votive fol ti me kë të duash dhe mua mrapa më ke…se nuk ta kam s’jedh shpinën se nuk jam Ardjani unë. Në muaj të fundit më ke mas vedit, se nuk jam me dy fytyra unë…”.

Pëllumbi ia kthen: “…O vëlla ti e din që unë dua me të pa sipër tanve…”. Unë kur të flas, të flas për të mirë. Me ba me kamngul unë as Ardiani nuk ma sjell shpinën…”.

Ndërsa Behari vijon t’i shkruajë: “…nese të vijn këto kurva…O nuk më intereson Ardjani, të baj qa të dojn të rrin dhe me Dorin, s’ka problem se po fiton prej tejet dhe prej vllasë së tij dhe kështu i mbydhi sytë. Por nji ditë kam me e hëngur Dorin, se ku, e tek, nuk e di. Por ishalla nuk i thehet në dorë atij dhe mos ti ngelin, sikur ja bani shkosin ai. Jam tu prit me i mbyll ito gjyqe se mbyll tesh dhe atëherë ke me nigju se ça ka mu sjell e mendosh. Deri në datëlidjen teme, njëri do vdesi prej tynve se kujt do ti bin lapsi nuk e di, por dikush do ikun…do ikun nji nga grupi…”.

Kurse Pëllumbi ia kthen: “…o vëlla hap prej shitjeve, ishalla…”.

Por sërish Behari vijon: “…o vëlla, Bardhokun do vras të parin i her, se i kam planifikuar tana nëse nuk më del në shteg deri në fund të Janarit…”. (Në fakt Bardhok Pllanaj u ekzekutua nga klani “Bajri” në 4 Prill në “Dobraç”). Veç Ardjanit mos i thuaj se pin i gotë, e nuk din ça flet…se ta blen Toma shumë…”.

Pëllumbi: “…Joooo, nuk flas unë, ca më duhet me fol…”.

Ndërsa Behari ia kthen: “…i kyt muj ta po vij e të takoj një natë për qejf e rrijmë, se nuk jam tu lëviz kërkund…”.

“…po hajde të rrimë e flasim, po hap sytë…”- i thotë Pëllumbi, Behar Bajrit.

Ndërsa ky i fundit ia kthen se: “…jam tu nejt veç këtej në qytet ku rrim, po nuk flej gjumë unë jo, i njoh këto kurva. Dhe hala nuk i kam vesh këpucët si me pa këta sa dorën e rand e kam, veç jam tu ble dhe tu pa terren. Kyt vit ta hajn…në janar e mrapa atë herë do të ndryshojë loja, ok…Natën…”.

Pëllumbi: “…shumë mirë je aty, flasim kur të takojm, natën e hap sytë…”.

The post Zbardhen bisedat në “SKY”/ Behar Bajri-Pëllumb Gjokës: Njëri do vdesë, se kujt do t’i bie lapsi s’e di… appeared first on Albeu.com.

Në një dalje për mediat, koordinatori Rajonal për Tiranën në PD, Klevis Balliu, theksoi se qeveria nuk po i jep BKH-së dhe SPAK-ut dosjen e Gjokës, ku Rama ka firmosur për Gjokën si investitor.

Deklarata:
Shefi i drejtësisë së re Edi Rama kërkon të mbrojë deri në fund partnerin e pushtetit të vet, urdhëruesin e vresjeve, trafikantin Pëllumb Gjoka. Sipas burimeve mediatike Rama refuzon t’i dorëzojë Byros kombëtare të hetimit dhe SPAK dosjen e Pëllumb Gjokës si investitor strategjik që e ka firmosur si të tille Edi Rama.

Jo vetem kaq, por për ta çuar mbrojtjen e trafikantit Gjoka deri në fund, Edi Rama refuzon t’i heqë edhe statusin e investitorit strategjik. Vetëm në një narko-shtet trafikantët mund të licensohen si një investitor strategjik, vetëm një narko-kryeministër mund të firmosë për një porositës vrasjesh, që ky të lincensohet si investitor strategjik.

E në fakt në qoftë se nuk do të ishte për Prokurorin Belge, Pellumb Gjoka do të njihej sot si hero i zhvillimit të turizmit shqiptar, pavarësisht se e fitoi këtë status falë aktivitetit të tij kriminal, me dokumenta toke false dhe pa asnjë dëshmi për burimin e financimit prej 52 milionë eurosh, dhe Rama ishte ai që i dha nje pjesë të pyllit të Velipojës për të ndërtuar ‘Silver Sand’.

Në fakt një drejtësi e vërtetë sot duhet të hetonte Ramen që ka shpallur investitorë strategjikë kriminelë të këtij kalibri, por në narko-shtet nuk ka drejtësi. Narkoshtet drejtësia është një fjalë boshe që shërben për të mbrojtur krimet e krye-pushtetarit. Pushteti i Ramës është pushteti i Gjokave. Me Ramën kriminelët hyjnë në parlament, me Ramen kriminelët u bënë deputetë, u bënë drejtorë, me Ramën kriminelët u bënë investitorë strategjik dhe kështu u krijua narko-shteti.

Burimi i të gjitha aferave korruptive dhe mafioze ka një kokë, ka një emër dhe ai është Edi Rama, vetëm hetimi dhe arrestimi i narko-kryeministrit mund të godiste narko-shtetin që Shqiperia të shpetojë nga kthetrat e krimit të organizuar.

Partia Demokratike, u deklaron qytetarëve që ne nuk do të reshtim kurrë së përballuri me krimin e organizuar dhe ju garantojmë që njësoj si më parë do të cojmë pas hekurave cdo kriminel, cdo trafikant, cdo bandë. Lufta kundër krimit të organizuar për qeverinë e ardhshme të Parties Demokratike është një prioritet jetik për zhvillimin e vendit.

The post Klevis Balliu: Qeveria nuk i jep BKH-së dhe SPAK-ut dosjen e Pëllumb Gjokës si investitor strategjik appeared first on Albeu.com.

“…është dikush që bëhet me një legen që më jep informacion mua, ta s’qaroj kur të takoj. Po ai legeni ngeli duke folë për ty, e ke parasysh të ka bërë padrino…”,-i thotë Hasanbegaj, Pëllumb Gjokës.

Mes shumë bisedave që janë zhvilluar në “Sky” mes Gjokës dhe Ardit Hasanbegaj, ky i fundit e informon Pëllumb Gjokën se ka vënë disa numra në përgjim, të cilët mendohen se janë në përdorim nga Ibrahim dhe Muhamed Lici, dy vëllezërit në Shkodër që ishin piketuar për tu vrarë.

“…Ishalla të mbajë këtë numër ai motër q***, edhe mbarojmë punë. Ai tjetri që kemi çuar për përgjim e ka ai i vogli, është konfirmuar. Po flet rrallë, shumë rrallë…”,-i thotë Pëllumb Gjokës, Ardit Hasanbegaj.

Ndërkohë në 20 Gusht 2020, Hasanbegaj informon Pëllumb Gjokën se kishte pyetur një Suad Lici nga Velipoja, pasi ai ishte paraqitur në polici për të bërë një kallëzim penal.

Në atë kohë mësohet se Suad Licit, i kishin vendosur një gjobë financiare dhe ai kishte bërë denoncim në polici, për ta ndjekur problemin me shtet.

“…Ore po një Suad Lici, ka në Velipojë? Suadin e kam pyetur…”, i shkruan Pëllumbit, zv/drejtori i policisë Shkodër Ardit Hasanbegaj.

Pëllumbi ia kthen “…jo në Velipojë…”.

Ndërkohë, Hasanbegaj vijon duke i thënë si më poshtë vijon:

“…Mos është kasap? A ka kështu thertore? Të kuptoj, të sqaroj unë..jo jo qënka një Lici tjetër, ngatëroj emër. Është dikush që bëhet me një legen, që më jep informacion mua. Të s’qaroj unë kur të takoj. Po ai legeni ngeli duke folë për ty. E ke parasysh, të ka bërë padrino. Por pashë që kishte komunikim me një mbiemër Lici dhe thashë ç’ne ky me këta…”.

Kjo dhe shumë biseda të tjera tregojnë se ndikimin që kishte Pëllumb Gjoka, tek administrata e Policisë së Shkodrës, të cilët informonin në mënyrë të rregullt Gjokën jo vetëm për kallëzimet dhe njerëzit që pyeteshin për hetime të ndryshme, por informacionet shkonin dhe deri tek rrjeti i informatorëve të Policisë së Shtetit.

The post Përgjimet në “SKY”/ Si nxirreshin emrat e informatorëve të policisë tek Pëllumb Gjoka: Ai legeni ngeli duke fol për ty, të ka bërë padrino appeared first on Albeu.com.

Deri më tani ,nuk dihet gjendja e tij dhe se çfarë ka ndodhur në ambientet e burgut që biznesmeni theu këmbën.

Mësohet se; Gjoka ka thyer këmbën gjatë kohës që ishte duke u marrë me aktivitete sportive në paraburgimin 313 dhe sot është dërguar në një spital privat, për të kryer ndërhyrjen kirurgjikale.

Gjoka është marrë zyrtarisht për “Vrasja me paramendim”, në dëm të viktimës Gjin Ndoj (Boriçi), finalizuar në datën 09.08.2020, në qytetin e Shkodrës, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.

“Sigurimi i kushteve dhe i mjeteve materiale për të kryer vrasje”, në dëm të shtetasit Kleant Musabelliu, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale.

“Korrupsioni aktiv i gjyqtarit, prokurorit dhe i funksionarëve të tjerë të drejtësisë”, kryer në bashkëpunim.

“Mbajtja pa leje dhe prodhimi i armëve, armëve shpërthyese dhe municionit”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.

The post Ҫfarë ka ndodhur? I arrestuar për “Metamorfozën”, biznesmeni Pëllumb Gjoka thyen këmbën në burg appeared first on Albeu.com.

Një pjesë e bisedave dhe negociatave që çuan në kapërcimin e derës së burgut nga i arrestuari i operacionit “Oaz”, Behar Bajri, janë zhvilluar në aplikacionin “SKY”, të cilat tashmë janë zbardhur në dosjen “Metamorfoza” që SPAK ka çuar për shqyrtim në gjykatë.

Nga bisedat e zhvilluara mes Pëllumb Gjokës dhe prokurorit të Shkodrës Xhevahir Lita, problem për këtë të fundit është pushimi i tre akuzave për vrasje të ngritura kundër Behar Bajrit nga Krimet e Rënda.

Bëhet fjalë për ngjarjen e ndodhur në 29 qershor 2002, ku 15-vjeçarja Fabjola Hyseni, bashkëjetuese e Behar Bajrit, është raportuar si e vetëvrarë brenda në banesë me tre plumba, ku mësohet se njërin prej tyre, e ka pothuajse pas shpine me kënd drejtimi nga poshtë-lart.

Në atë periudhë Behar Bajri, i arrestuari kryesor për këtë ngjarje dhe i dyshuari nga prokuroria si personi i dyshuar për këtë vrasje, ka mohuar në mënyrë kategorike se e ka kryer këtë krim kundër gruas së tij.

Krimet e Rënda, pretendonin se me të njëjtën pistoletë tip “TT” që është qëlluar në vitin 2002, 15-vjeçaria Fabjola Hyseni, është qëlluar në 7 shkurt 2001 Arben Tuzi, ngjarje kjo e ndodhur në rrugën “Qemal Stafa” në Shkodër, ku ka mbetur i plagosur dhe miku i tij, Lulzim Molla.

Arma e krimit është gjetur pikërisht në banesën e Behar Bajrit, shumë pranë trupit të pajetë të vajzës 15-vjeçare, Fabiola Hyseni.

Lita e shikon si problem këtë pjesë për pushim akuzash pasi duhet të vijë akti-ekspertimit balistik i armës nga Tirana. Por nga ana tjetër Pëllumb Gjoka e siguron 1 milion për qind se nuk ka gjë ajo arma dhe nuk lidhen të dyja ngjarje pasi sipas tij, e ka bërë 100 herë Anton Martini dhe nuk ka dalë gjë.

Xhevahir Lita, lidhur me sa i thotë Pellumb Gjoka, i dërgon përgjigjet: “…tani ia ka bërë Edi dhe sot ia ka kthy përgjigjen e pashë dhe unë…po po mire, ajo dosje u dhi…”.

Në 18 qershor 2020 Pëllumb Gjoka i kërkon Xhevahir Litës që në 19 qershor të dorëzojë kërkesën për zëvendësimin e masës së sigurimit për Behar Bajrin.

Por Xhevahir Lita e orienton që kërkesën duhet ta bëjë avokati, pasi nuk e dëgjon “ajo”, duke e pasur fjalën për Edlira Cufin me të cilën sipas Litës nuk merret kush.

Pas kësaj kanë lënë takim së bashku, që të takohen të dy tek shtëpia e Xhevahir Litës, i cili e ka orientuar Pëllumb Gjokën që të shkojë nga porta e varrezave të Dëshmorëve.

Pas këtij takimi në datën 20 qershor 2020, ditë të shtune, Xhevahir Lita ka njoftuar Pëllumb Gjokën se e ka dorëzuar kërkesën për zëvendësim mase sigurimi për Behar Bajrin, duke dërguar mesazh si më poshtë: ”…e lashë, i thashë bëj çar të duash…”

Dhe në vijim i dërgon mesazh: “…ai do e rrëzojë kërkesën time…më tha tërhiqe ti kërkesën…i thashë jo jooo bëj çar të duash…me arsyetimin se po e paragjykojmë…”.

Kërkesa për zëvendësimin e masës së sigurisë nga “arrest në burg” në “detyrim paraqitje” tek oficeri i policisë gjyqësore Çlirim Halili është bërë nga Lita në datën 19 qershor 2020, i cili pa pyetur aspak prokuroren tjetër Cufi, ka krasitur akuzat dhe lënë në këmbë vetëm veprën penale të “organizimit pa lejë të basteve sportive” për të pandehurin Behar Bajri.

Gjatë vazhdimit të kësaj dite, në orën 20:35:43, Xhevahir Lita shpreh shqetësim dhe i dërgon Pëllumb Gjokës mesazhet:

“…ajo nga Tirana ka ardhë me të futurë…a ke bërë gjë se nuk po shoh pozitivitet…ai që më the mua se po shkojë takoj, I ka bërë bisht i kishte thënë atij shokut tim ka problem…”.

Në këtë datë flasin Gjoka dhe Lita, për një çështje tjetër gjyqësore dhe Pëllumb Gjoka, mundohet ti japë shpjegim për ecurinë e kësaj çështje, duke i dërguar mesazhet:

“…Lazri ka kërkuar kohë… Ka marr raport Lindita… Në trupë është Aleksi që ka marrë raport… Lindita që mori raport…”, Xhevahir Lita ndërkohë i ka thënë që trupa nuk është formuar ende.

Ndërkohë Xhevahiri vijon të shfaqë shqetësim lidhur me një akt-ekspertimi që pritet nga Tirana dhe se nuk është tek pritshmëritë e tij pasi sipas tij ka qenë i pakuptueshëm, bëhet fjalë për një akt-ekspertimi balistik krahasues.

Në orën 21:03:43 Xhevahir Lita dërgon mesazh: “…akti i ekspertimit që nuk kuptohej e kanë bërë të kuptueshëm…” dhe “… Që gëzhojat janë të qitura nga e njëjta armë?…”

Pëllumbi i thotë: “Nuk është e vërtet… Vetëm nëse e kanë manipuluar… sepse sistemi bën krahasimin automatik të gëzhojave…Si shënjat e gishtave…”.

Xhevahiri i përgjigjet: “…shko nesër e shikoje…ka mbaruar…na e ka dërguar përgjigjen me Whatcap…”.

Pellumb Gjoka i shpjegon se këto prova i ka bërë 100 herë Anton Martini (ish drejtues i Prokurorisë Shkodër 2016-2019).

Ai në orën 21:07:55 dërgon mesazhet: “… Lere ça thonë… Isoj si thon tani, keni përgjime që gjujtsi është Safeti e shoferi Ameri… Nxitsi Behari…… Muhabete pazari o vlla… Po ti kishin ja kishin plas me koh… O vlla i është bërë kërkesë disa herë policisë shkencore, për përgjigjen dhe nuk u dha asnjëherë… Un e di privatisht që nuk kanë lidhje gëzhojat…1 milion për qind…”.

Xhevahir Lita lidhur me sa i thotë Pellumb Gjoka, i dërgon përgjigjet: “…tani ia ka bërë Edi dhe sot ia ka kthy përgjigjen e pashë dhe unë…po po mirë ajo dosje u dhi…”.

Pëllumb Gjoka i dërgon mesazh Litës, ku i konfirmon se përgjigja aktit të ekspertimit balistik të armës është siç ka thënë ai.

Lidhur me këtë moment ku flitet për aktin balistik të pistoletës tip “TT”, është pyetur nga SPAK i arrestuari Xhevahir Lita, ku ndër tjera ka deklaruar:

“… Behar Bajri, hetohej lidhur me tre vrasje të ndodhura disa vite më parë, ku ndër tjera edhe vrasjen e ish-të fejuarë së tij. Nga të treja vrasjet që hetohej Behar Brajoviq, dy kishin ndodhur vite më parë dhe ishin dosje të pezulluara të cilat nuk kishin prova mjaftueshëm, por në rastin e vrasjes së ish të fejuarës, ndodhej një akt- ekspertimi balistik, që ishte i administruar në dosje por i palosur në pjesën e konkluzionit dhe nuk konstatohej se çfarë konkluzioni ishte dhënë, kjo ishte vendimtare në zgjidhjen e çështjes së Behar Brajoviq. Duke qenë se kjo ishte vendimtare, bashkë me prokuroren Cufi, i kemi kërkuar Institutit të Policisë Shkencore që të na sillte kopjen e aktit, i cili pasi është administruar kemi proceduar me njoftimin e akuzës Behar Brajoviq, duke i njoftuar akuzën për “organizimin e paligjshëm të lojërave të fatit”, pasi për vrasjet nuk provohej përgjegjësia, kjo është e dokumentuar edhe në aktet e procedimit penal. Lidhur me dyshimet për vrasjet, ne vendosëm ndarjen e çështjeve dhe pezullimin e hetimeve….”.

Pëllumb Gjoka dhe Xhevahir Lita kanë lënë të takohen bashkë. Xhevahir Lita është i interesuar të dijë se çfarë ka thënë Lindita Hoxha, gjyqtare në gjykatën e Apelit Shkodër.

Pëllumb Gjoka, i ka kërkuar Xhevahir Litës që Behar Brajoviq (Bajri) mos të hetohet për 2 vrasjet, se përndryshe “ngel” në burg. Pëllumbi i ka kërkuar Xhevahir Litës që të diskutoj “Lazrin”, pasi më 15 Qershor shqyrtohet në Gjykatën e Apelit kërkesa për zëvendësim mase, pas njoftimit të akuzës që i është bërë Behar Brajoviq.

Xhevahir Lita, e ka s’qaruar në orën 20:39:31 duke dërguar mesazh: “…o vlla nesër është për atë që nuk është këtu Daci ka mbaru punë…”.

Në 22 qershor 2020, Pëllumb Gjoka pyet Xhevahir Litë nëse ka ndonjë të re. Në orën 19:03:30 Xhevahir Lita dërgon mesazh: “…atë (gjyqtarin) duhet me e heq se nuk e bën…duhet me kërku perjashtimin…”.

Më pas kanë diskutuar lidhur me përjashtimin e gjyqtarit dhe se si do veprojnë. Xhevahir Lita i tregon se kërkesën ja ka dërguar edhe me e-mail dhe ja ka argumentuar. Pëllumb Gjoka e pyet nëse do takohet nesër me gjyqtarin dhe Xhevahir Lita i kthen përgjigje se atë do e takoj dikush tjetër.

Referuar këqyrjes së fashikullit gjyqësor lidhur me vendimin Nr. 307 (2006) datë 29 qershor 2020, rezulton se është zhvilluar seanca e datës 24 qershor 2020, për zëvendësimin e masës së sigurimit të kërkuar nga Prokuroria Shkodër për Behar Brajoviq (Bajri).

Në këtë seancë nuk kanë qenë të pranishëm Behar Brajoviq (Bajri) dhe avokati mbrojtës Alban Bengasi dhe për këtë arsye, seanca është shtyrë për në 29 qershor 2020.

Më 24 qershor 2020, Pëllumb Gjoka ka pyetur nëse Xhevahir Lita është takuar me gjyqtarin që do shqyrtoi çështjen.

Xhevahir Lita i është përgjigjur: “…po më tha me ka çmënë Pllumi…me ka fut 100 veta…”.

Pëllumb Gjoka, i ka kërkuar që ta takojnë bashkë gjyqtarin dhe Xhevahir Lita i kthen përgjigje në orën 18:09:30 i dërgon mesazhet:

“…ai më tha me ka çmene ti thua ta takojme bashkë…ku të takon ai ty… më ka thënë me ia çu ca dokumente ia kam bërë gati do ja jap nesër…”.

Pëllumb Gjoka në orën 18:11:46 ka pyetur Xhevahir Litën nëse i ka ofruar para gjyqtarit, Xhevahir Lita i është përgjigjur që jo.

Në orën 18:19:12 Pëllumb Gjoka i dërgon mesazhet: “… Daci është tu plasë… Dhe me të sjell ato t’ja japësh…” (ku përemrin “ato” i referohet dhënies së parave në këmbim të lirimit të Behar Brajoviq).

Lidhur me këtë moment të përshkruar më lart, më datë 12 Prill 2024, është pyetur nga ana e SPAK në cilësinë e deklaruesit gjyqtari Sokol Shehu, i cili ka qenë gjyqtar i seancës paraprake në çështjen e Behar Brajoviq e personave të tjerë, ndër tjera ai deklaron se:

“….unë nuk kam patur asnjë komunikim me Xhevahir Litën lidhur me shqyrtimin e kërkesës së prokurorisë për zëvëndësimin e masës së sigurimit të Behar Brajoviq. Me Xhevahir Litën kam komunikuar vetëm kur caktoja seanca gjyqësore dhe i njoftoja datën…..”.

I pyetur nëse njihet me Pëllumb Gjokën ai deklaron se:

“…Këtë shtetas nuk e njoh. Hera parë që e kam dëgjuar ka qenë kur u arrestua nga SPAK dhe doli në media….”.

Sokol Shehu është pyetur edhe nëse është kontaktuar nga persona të tjerë për llogari të Pëllumb Gjokës për tu interesuar për Behar Brajoviq, ai deklaron se:

“…Në asnjë moment nuk më është afruar askush të më pyesë për shqyrtimin e kërkesës apo për t’u interesuar për Behar Brajoviq. As Pëllumb Gjoka dhe asnjë person tjetër….”

Më datë 29 qershor 2020 Pëllumb Gjoka ka dërguar mesazh tek Lita: “…Ma në fund…”

Xhevahir Lita i shprehet: “…ke rënë rehat tani…”

Dhe Pëllumb Gjoka ja ka kthyer: “… Te dali Daci i her…”.

Në vazhdim Xhevahir Lita ka dërguar mesazhet: “…iku ai muhabet…tani thuaj meru vete se ka punë përsëri…”.

Në orën 16:48:45 Pëllumb Gjoka dërgon mesazhet: “… Vlla ka me të pru njëni 500. 000…Jepi sa të dojn… Nuk ja ban ma burgun… Pranoje se të ka ba ftesë Daci i vogël….”.

Për ndryshimin e masës së sigurisë së Behar Bajrit janë dhënë apo ofruar një shumë parash.

Në orën 15:34:10 poseduesi i SKY U2BA3G komunikon me Pëllumb Gjokën dhe e pyet nëse Behar Bajri, ka shkuar në Shkodër, dërgon mesazhet:

“…Ça po bën …Arriti shpi…Apo nuk shkoj Shkodër…E mirë… Kush e priti këtu…Apo polici… Ou menova me shok se po e çojn me polici… Ok se do ketë pas civila menoj… Vërdall… Po pin noi got lop tani…”.

Behar Bajri është liruar nga burgu në 29 qershor 2020 me vendimin Nr.307 të marrë në orën 10:00, duke caktuar detyrim paraqitje dy herë në javë të hënën dhe të enjte.

Një ditë më pas, në 30 qershor prokurori i çështjes Xhevahir Lita merr kontakt me të pandehurin e tij, Behar Brajoviq alias Bajri, i cili ka në përdorim Sky@EÇ TIV9E3, ku në orën 16:51:35 Behar Brajoviq i ka dërguar mesazhe Xhevahir Litës si më poshtë:

“…Daci vogel jam…ta paqa borgj vlla…ta po rrim nej dit gjejm nej vend e rrim…tiranë jam…”.

Xhevahir Lita e pyet se çfarë po bën dhe se ku ndodhet. Po ashtu ai orienton “dacin” se si do veprohet më tej, duke dërguar mesazhet si më poshtë:

“…ok ke me u paraqitë të hënën…në prokurori…të hënën në orën 10…”.

Në orë 17:03:31 prokurori Xhevahir Lita dërgon Pëllumb Gjoka mesazhet: “…po bëni qef me Dacin më duket…eheeeee…a ju a ju… jeni të qetë tani…”.

Në këtë datë Behar Bajri është liruar nga Burgu dhe ndodhej me masën e sigurimit “detyrim paraqitje”.

The post Bisedat në SKY/ Si iu hoqën 3 akuza për vrasje Behar Bajrit, Pëllumb Gjoka: Anton Martini e bëri 100 herë, s’doli gjë… appeared first on Albeu.com.

Njoftimi:

Prokuroria e Posaçme kundër Korrupsionit dhe Krimit të Organizuar, ka përfunduar hetimet paraprake të procedimit penal nr. 09, të vitit 2023, dhe ka paraqitur më datë 26.04.2024, në Gjykatën e Posaçme të Shkallës së Parë për Korrupsionin dhe Krimin e Organizuar, kërkesën për dërgimin e çështjes në gjyq, në ngarkim të të pandehurve si më poshtë:

1.I pandehuri Pëllumb Gjoka, i akuzuar për kryerjen e veprave penale :

“Vrasja me paramendim”, në dëm të viktimës Gjin Ndoj (Boriçi), finalizuar në datën 09.08.2020, në qytetin e Shkodrës, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 78/2, 28/4, 333/a/1 dhe 334, të Kodit Penal.

“Sigurimi i kushteve dhe i mjeteve materiale për të kryer vrasje”, në dëm të shtetasit Kleant Musabelliu, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/1 dhe 334, të Kodit Penal.

“Sigurimi i kushteve dhe i mjeteve materiale për të kryer vrasje”, në dëm të shtetasve Dorian Duli dhe Ibrahim Lici, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/2 dhe 334, të Kodit Penal.

“Korrupsioni aktiv i gjyqtarit, prokurorit dhe i funksionarëve të tjerë të drejtësisë”, kryer në bashkëpunim, parashikuar nga nenet 319 dhe 25, të Kodit Penal.

“Mbajtja pa leje dhe prodhimi i armëve, armëve shpërthyese dhe municionit”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 278/1, 28/4, 333/a dhe 334, të Kodit Penal.

2.2. I pandehuri Behar Brajoviq, i akuzuar për kryerjen e veprave penale :

“Vrasja me paramendim”, në dëm të viktimës Gjin Ndoj (Boriçi), finalizuar në datën 09.08.2020, në qytetin e Shkodrës, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 78/2, 28/4, 333/a/1 dhe 334, të Kodit Penal.

“Sigurimi i kushteve dhe i mjeteve materiale për të kryer vrasje”, në dëm të shtetasit Kleant Musabelliu, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/1 dhe 334, të Kodit Penal.

“Sigurimi i kushteve dhe i mjeteve materiale për të kryer vrasje”, në dëm të shtetasve Dorian Duli dhe Ibrahim Lici, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuara nga nenet 80, 28/4, 333/a/1 dhe 334, të Kodit Penal.

“Korrupsion aktiv i gjyqtarit, prokurorit dhe i funksionarëve të tjerë të drejtësisë”, kryer në bashkëpunim, parashikuar nga nenet 319 dhe 25, të Kodit Penal.

“Mbajtja pa leje dhe prodhimi i armëve, armëve shpërthyese dhe municionit”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 278/1, 28/4, 333/a dhe 334, të Kodit Penal.

3.I pandehuri Edmond Preka, i akuzuar për kryerjen e veprave penale :

“Vrasja me paramendim”, në dëm të viktimës Gjin Ndoj (Boriçi), finalizuar në datën 09.08.2020, në qytetin e Shkodrës, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 78/2, 28/4, 333/a/2 dhe 334, të Kodit Penal.

“Sigurimi i kushteve dhe i mjeteve materiale për të kryer vrasje”, në dëm të shtetasit Kleant Musabelliu, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/2 dhe 334, të Kodit Penal.

“Prodhimi dhe mbajtja pa leje e armëve luftarake dhe e municionit”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 278/1, 28/4, 333/a/2 dhe 334, të Kodit Penal.

4.4. I pandehuri Astmer Bilali, i akuzuar për kryerjen e veprave penale :

“Sigurimi i kushteve dhe i mjeteve materiale për të kryer vrasje”, në dëm të shtetasve Dorian Duli dhe Ibrahim Lici, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuara nga nenet 80, 28/4, 333/a/2 e 334, të Kodit Penal.

5.5. I pandehuri Ardrit Hasanbegaj, i akuzuar për kryerjen e veprave penale :

“Sigurimi i kushteve dhe i mjeteve materiale për të kryer vrasje”, në dëm të shtetasve Dorian Duli dhe Ibrahim Lici, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuara nga nenet 80, 28/4, 333/a/2 e 334, të Kodit Penal.

6. 6. I pandehuri Oltian Bistri, i akuzuar për kryerjen e veprave penale :

“Korrupsioni pasiv i personave që ushtrojnë funksione publike”, “Zbulimi i akteve ose të dhënave sekrete” dhe “Pastrimi i produkteve të veprës penale ose veprimtarisë kriminale”, parashikuar nga nenet 259, 295/a dhe 287/2, të Kodit Penal.

7.7. I pandehuri Xhevahir Lita, i akuzuar për kryerjen e veprave penale :

“Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, e kryer 2 (dy herë), dhe “Zbulimi i akteve ose të dhënave sekrete”, parashikuar nga nenet 319/ç dhe 295/a, paragrafi 2, të Kodit Penal.

Në kuadër të hetimeve të këtij procedimi penal, janë sekuestruar si produkt i veprës penale, ndër të tjera, disa pasuri të paluajtshme, të cilat i janë bashkëngjitur akteve të dërguara për gjykim si më poshtë:

1.3 (tre) pasuri të paluajtshme të llojit “Pyll”, me sipërfaqe totale prej 390 000 m2, si më poshtë :

1.1.Pasuria e llojit Pyll, me sipërfaqe 113.500 m2, e ndodhur në Pulaj-Plazh, Velipojë, Shkodër;

1.2. Pasuria e llojit Pyll, me sipërfaqe 61.470 m2, e ndodhur në Pulaj- Plazh, Velipojë, Shkodër;

1.3. Pasuria e llojit Pyll, me sipërfaqe 215.030 m2, e ndodhur në Pulaj-Plazh,Velipojë, Shkodër;

1.5 (pesë) pasuri të paluajtshme të llojit ndërtesa, me vlerë blerje sipas kontratave
980 300 Euro, si më poshtë :

2.1. Sipërfaqe ndërtimore e llojit apartament, me sipërfaqe totale të apartamentit përfshirë edhe sipërfaqet e përbashkëta 400 m2, me një çmim në total prej 200 000 (dyqind mijë) Euro, e ndodhur në Tiranë.

2.2. Sipërfaqe ndërtimore e llojit apartament, me sipërfaqe totale të apartamentit përfshirë edhe sipërfaqet e përbashkëta 400 m2, me një çmim në total prej 200 000 (dyqind mijë) Euro, e ndodhur në Tiranë.

2.3. Njësia dyqan, me sipërfaqe ndërtimore 125 m2, me një çmim në total prej 300 000 (treqind mijë) Euro, e ndodhur në Tiranë.

2.4. Njësia dyqan me sipërfaqe ndërtimore 95 m2, me një çmim në total prej 230 000 (dyqind e tridhjetë mijë) Euro, e ndodhur në Tiranë.

2.5. Sipërfaqe ndërtimore e llojit apartament banimi, me sipërfaqe totale 110.6 m2, me çmim shitje 50 300 Euro (pesëdhjetë mijë e treqind) Euro, e ndodhur në Tiranë.

Ndërkohë, për personat e tjerë nën hetim, bashkëpunëtorë në kryerjen e veprave penale të mësipërme, për të cilët nuk janë ekzekutuar akoma masat e sigurimit të miratuara nga Gjykata e Posaçme e Shkallës së Parë për Korrupsionin dhe Krimin e Organizuar, për fakte të tjera kriminale, si dhe për persona të tjerë të përfshirë në aktivitete kriminale, që kanë rezultuar gjatë veprimeve hetimore të kryera në këtë procedim penal, është vendosur ndarja e çështjes penale dhe vazhdojnë të jenë ende në fazën e hetimeve paraprake.

The post Dosja “Metamorfoza”/ SPAK mbyll hetimet për biznesmenin Pëllumb Gjoka dhe anëtarët e tjerë të grupit kriminal appeared first on Albeu.com.