korridori 8 dhe 10D Archives - Albeu.com

Seanca maratonë për korridoret 8 dhe 10D, vijon dhe sot debat në Kuvendin e Maqedonisë e Veriut

E B — Thu, 18 May 2023 10:48:03 +0000

Kuvendi i Republikës së Maqedonisë së Veriut sot në mesditë duhet të vazhdojë seancën e 115-të, në kuadër të së cilës në mesin e pikave është edhe pakoja e ligjeve për ndërtimin e korridoreve 8 dhe 10-D.

Në të njëjtën kohë në Komisionin Parlamentar për Çështje Evropiane duhet të vazhdojë debati për ndryshimet dhe plotësimet në Ligjin për ndërtim me procedurë të shkurtuar. Në rend dite të këtij Komisioni janë ndryshimet dhe plotësimet në Ligjin për shpronësim dhe Ligjin për përcaktimin e interesit publik dhe emërimi i partnerit strategjik për realizimin e projektit për ndërtimin e Korridorit 8 infrastrukturor (pjesa: Tetovë – Gostivar. – Bukojçani dhe projekti i autostradës Trebenishtë – Strugë – Qafthanë) dhe Korridori 10 d (pjesa e autostradës Prilep – Manastir) në Republikën e Maqedonisë së Veriut, të dyja në procedurë të shkurtuar.

Deputetët dje pasdite në seancën plenare e përfunduan debatin për propozim-ligjin për ndryshimin dhe plotësimin e Ligjit për marrëdhëniet e punës, i cili është pjesë e pakos së ligjeve për ndërtimin e korridoreve, ndërsa votimi do të caktohet shtesë.

Deputetët e opozitës gjatë debatit ishin të mendimit se këto ndryshime ligjore janë kundër sundimi të ligjit, sepse, siç thonë ata, ligji i robëron punëtorët në vend që t’i çlirojë. Sipas tyre, miratimi i ndryshimeve ligjore pas një procedure të shkurtuar nën “vellon” e flamurit evropian është dhunë dhe krim, që dëmton tërësisht procesin integrues të vendit në BE.

Nga ana tjetër, deputetët e mazhorancës thanë se ndryshimet në ligjet për ndërtimin e korridoreve 8 dhe 10d janë në përputhje me Kushtetutën dhe në drejtim të lehtësimit të punës në terren.

“Ndryshimet bëhen për të përfunduar në mënyrë më efikase, efektive dhe më të lirë projektet me interes strategjik. Dhe kjo nuk është vetëm për korridoret aktuale, por edhe për të gjithë projektet e ardhshme strategjike kombëtare të infrastrukturës”, theksoi Zeqiri.

Përfaqësuesi special i Qeverisë së Republikës Federale të Gjermanisë për Ballkanin Perëndimor, Saracin, ka zhvilluar dje në Kuvend takime me përfaqësues të disa partive politike. Ai pardje pati takime me presidentin e shtetit, Stevo Pendarovski dhe me zëvendëskryeministrin Artan Grubi, në të cilat ndër të tjera u diskutua procesi i integrimeve evropiane të vendit dhe zhvillimet aktuale politike në vend.

The post Seanca maratonë për korridoret 8 dhe 10D, vijon dhe sot debat në Kuvendin e Maqedonisë e Veriut appeared first on Albeu.com.

Ligjet për Korridoret 8 dhe 10-D në Maqedoninë e Veriut mbeten të bllokuara në Kuvend

E B — Tue, 25 Apr 2023 05:48:48 +0000

Gjashtë nga tetë ligjet e propozuara kryesisht nga BDI-ja për lehtësimin e procedurave të ndërtimit të Korridorit 8 dhe 10D nuk janë vendosur fare në rend dite në komisionet përkatëse të udhëhequra nga VMRO-DPMNE-ja. Vetëm ligji për lëndët e para minerale mori miratimin e komisionit për çështje ekonomike dhe pritet të votohet së shpejti në plenare kurse ligji për marrëdhënie pune është bllokuar me mijëra amendamente në Komisionin për politikë sociale. Koordinatori i grupit parlamentar të BDI-së akuzon VMRO-DPMNE-në për bllokim, meqë, sipas tij, opozita nuk dëshiron ndërtimin e autostradave dhe realizimin e investimeve kapitale në të mirë të qytetarëve. I pyetur nëse pushteti planifikon të tërheqë ligjet dhe t’i rikthejë ato me yll të BE-së për të shmangur bllokimin, Ademi thotë se angazhimi i tyre për momentin, është vazhdimi i procedurave të nisura.

“I bëjmë thirrje opozitës për arsye se vetëm për dy propozim-ligje diskutohet ndërsa për gjashtë propozim-ligje të tjera të cilat komisione udhëhiqen nga kuadro që vinë nga opozita fare nuk është caktuar seancë dhe bëhet fjalë për shkelje flagrante të detyrimeve të tyre si udhëheqës të komisioneve respektive… Bisedimet e mija, kontaktet e mija janë në drejtim të konvokimit të seancave me deputetët e tjerë, përfshirë edhe opozitën janë në drejtim të konvokimit të seancave duke ua mundësuar deputetëve që të diskutojnë. Pse të mos diskutojnë deputetët?”, u shpreh Arbër Ademi, BDI.

Opozita është e vendosur të bllokojë zgjidhjet e propozuara ligjore me dyshimet për keqpërdorime dhe jotransparencë nga ana e pushtetit dhe nuk do të lëshojnë pe deri sa ta shohin marrëveshjen e arritur mes shtetit dhe Behtel-Enkës si realizues. VMRO-DPMNE-ja tashmë ka bërë një kërkesë që deputetët me certifikatë sigurie të kenë qasje te marrëveshja por deri në këto momente nuk kanë marrë përgjigje zyrtare për kërkesën e tyre.

“Sigurisht se një gjë e tillë duhet të mundësohet sipas procedurave që kanë të bëjnë me shikim të dokumenteve të klasifikuara dhe të gjithë deputetët në një procedurë të tillë që kanë interes, pse të mos njoftohen. S’ka asgjë të fshehtë, s’ka asgjë të cilën nuk duhet ta dinë deputetët por ama do të duhet t’i lëmë deputetët që të diskutojnë për propozim-ligjet. Nuk mu përgjigjët, ju vetë e keni parë marrëveshjen? Unë nuk e kam parë për arsye se nuk kam certifikatë për dokumente të klasifikuara”, u shpreh Arbër Ademi, BDI.

Tetë propozim ndryshimet ligjore synojnë të sigurojnë orar të zgjatur të punëve ndërtimore, shkurtim të procedurave administrative të shpronësimit, lehtësimit të procesit të shfrytëzimit të lëndëve të para minerale, të shfrytëzimit të hapësirave pyjore, të procedurave të planifikimit urbanistik si dhe lehtësim të marrjes së lejeve gjatë procesit të ndërtimit. /Alsat.mk

The post Ligjet për Korridoret 8 dhe 10-D në Maqedoninë e Veriut mbeten të bllokuara në Kuvend appeared first on Albeu.com.

Reagime të shumta për marrëveshjen e Korridorit 8 dhe 10D

E B — Thu, 09 Mar 2023 20:37:22 +0000

Reagime të shumta ka ngjallur në rrjetet sociale dhe në media promovimi dhe mënyra e promovimit të nënshkrimit të kontratës për ndërtimin e Korridorit 8 dhe Korridorit 10D. Pavarësisht se kishte dhe të tillë që e vlerësonin projektin si historik, të tjerët kujtuan projektet e parealizuara, keqpërdorimet dhe premtimet boshe. Kolumnisti Arsim Zekolli shprehu kritikat e tij në një shkrim për “Dojçe Vele”.

“Siç pritej, gjelat propagandistë të Ahmetit dhe Grubit mezi prisnin ta paraqesin nënshkrimin si “një të bëmë historike të Aliut dhe Artanit për të mirën e të gjithë shqiptarëve”, mbështetur nga tregimet se bëhet fjalë për lidhje infrastrukturore të Kosovës, Maqedonisë dhe Shqipërisë. Mirëpo, propagandistët e tillë janë mjaft të heshtur kur i pyet se sa dekada do të zgjasë ndërtimi i autostradës Shkup-Bllacë, apo për afatet në të cilat duhet të përfundojë asfaltimi i rrugicave në Serovë. Megjithatë, ndoshta disa vite më parë, një përpjekje e tillë për ta portretizuar projektin thjesht fitimprurës të ndërtimit të autostradave, me ngjyrat kuqezi të patriotizmit shqiptar, do të kishte qenë më i suksesshëm. Por jo në këtë Maqedoni të qindra premtimeve të parealizuara nga Ahmeti, Grubi, Osmani”, dekalaroi Arsim Zekolli, kolumnist.

Kritik ishte dhe njohësi i zhvillimeve Fejzi Hajdari në një shkrim në Facebook.

“Korridori 8, kurrë, ama kurrën e kurrës, gjithçka mund të jetë ama “historik” asnjëherë. Gjithkush që mendon se është “historik”, ose është SuperNaiv ose do të përfitojë politikisht. Si mund të jetë “historik” projekti i cili filloi në vitin 2012, kurse në vitin 2023 shpallet “historik”!!! Ndoshta historik mund të jetë për ata, që e kanë promovuar dhe shpresojnë se edhe mund të plaçkisin nga ky projekte, sikurse edhe nga shumë projekte tjera. Zaten, tek ne, në projekte vidhet ne mënyrë të sofistikuar, pikërisht atëherë kur projekti i filluar dështon, e me pastaj fillojnë “Anekse” mbi “Anekset” dhe shumë mundësi të tjera për korrupsion galopant dhe mallvaerzime financiare…”, u shpreh Fejzi Hajdari, njohës i zhvillimeve.

Përveç opinionistëve, Marrëveshja kritikohet edhe nga opozita. Kreu i VMRO-DPMNE-së, Mickoski, thotë se mungesa e projektit është bazë për dyshime.

“Projekti që kap një pjesë të Korridorit 8 dhe Korridorit 10D nuk ekziston, gjegjësisht do të bëhet ndërkohë. Parashtrohet pyetja nga ka dalë shuma prej 1.3, 1.4 miliardë kurse në disa raste edhe 1.7 miliardë euro negociohen kur nuk ekziston projekti. Pse është kjo e rëndësishme; sepse ata janë para publike, janë para të qytetarëve, qytetarët duhet t’i fusim në borxh, të fusim në borxh edhe fëmijët e palindur që dikush të mundet t’i vjedhë ato, duke e mos e ditur pse dhe me çfarë paguajmë” tha Hristijan Mickoski, kryetar i VMRO-DPMNE-së.

Në rrjetet sociale, kritika kishte dhe për lojën sportive me të cilën festuan ministrat e BDI-së pas finalizimit të marrëveshjes./alsat

The post Reagime të shumta për marrëveshjen e Korridorit 8 dhe 10D appeared first on Albeu.com.