Ata po ashtu do të diskutojnë për hapat e tjerë, por vendimi për këto çështje pritet të merret pas disa javësh.

Blloku prej 27 anëtarëve po shikon për mënyrat se si të ulë çmimet e larta të energjisë, pasi Moska reduktoi furnizimet me gaz.

Reduktimi i furnizimeve të energjisë ruse erdhi pasi Moska nisi pushtimin e Ukrainës më 24 shkurt, duke shkaktuar rritjen e çmimeve, që arritën në nivele rekorde në gusht.

Në takimin e ministrave në Luksemburg po ashtu pritet të diskutohet për parimet se si një çmim tavan ndaj gazit do të mund të funksiononte, por edhe për pengesat e mundshme nëse merret një vendim i tillë.

Ditëve të fundit, çmimet e gazit kanë rënë, teksa shtetet po tentojnë të krijojnë furnizime të mjaftueshme për stinën e dimrit.

Megjithatë, disa zyrtarë të BE-së thonë se ende është e nevojshme që të vendoset një çmim tavan, me qëllim që gjatë dimrit mund të ketë rritje të re të çmimeve në Evropë./REL

The post Ministrat e Energjisë të BE-së diskutojnë për çmimin tavan për gazin appeared first on Albeu.com.

Shumica e 27 shteteve të BE-së duan vendosjen e një çmimi tavan për gazin, për shkak të rritjes së çmimeve pas ndaljes së furnizimeve me gaz nga Rusia. Për këtë temë, shtetet e BE-së kanë biseduar për javë të tëra, por ka mospajtime lidhur me detajet se si duhet të bëhet kjo.

Çmimet e gazit dhe elektricitetit janë rritur shumë për shkak se Rusia ka ndërprerë furnizimet në përgjigje të sanksioneve të ashpra që BE-ja ka vendosur ndaj Moskës për shkak të luftës kundër Ukrainës.

Presidentja e Komisionit Evropian, Ursula von der Leyen, ka propozuar një “udhërrëfyes” të masave për të ndihmuar në lehtësimin e krizës, përfshirë edhe vendosjen e mundshme të një çmimi tavan.

Në mesin e ideve të përmendura janë edhe vendosja e çmimit tavan për importet e gazit rus, uljen e çmimit të importeve të tjera të gazit, kufizimin e çmimit të gazit që përdoret për gjenerimin e rrymës dhe vendosjen e një çmimi tavan për transaksionet e gazit midis shteteve të bllokut.

“Të gjithë pajtohen se ne duhet të ulim çmimin e energjisë, por nuk kemi marrëveshje se çfarë instrumente duhet të përdoren për këtë”, tha kryeministri i Polonisë, Mateusz Morawiecki.

Lideri irlandez, Micheal Martin, tha po ashtu se “duhet shumë punë të bëhet” para se të arrihet ndonjë marrëveshje.

Kryeministri i Italisë, Mario Draghi, tha se Komisioni Evropian më vonë gjatë këtij muaji do t’iu prezantojë liderëve të BE-së një pako më të gjerë të masave afatshkurtra për uljen e çmimeve dhe hapa afatgjatë për të ridizajnuar tregun e rrymës.

Teksa takimi në Pragë përfundoi, Franca njoftoi se ka krijuar një fond për Ukrainën, që drejtpërdrejt të blihen armë dhe materiale të tjera nga prodhuesit e armëve.

“Ne po krijojmë këtë fond të posaçëm, që fillimisht ka 100 milionë euro, në mënyrë që të blihen armët që ne veçse kemi dërguar atje dhe ne do të vazhdojmë të veprojmë kështu, të blejnë armë dhe mjete të tjera ushtarake”, tha presidenti francez, Emmanuel Macron.

Ai shtoi se po zhvillohen diskutime, veçanërisht me Danimarkën, që Ukrainës t’i dërgohen topat shumë precizë CAESAR. Deri më tani, Ukraina ka pranuar 18 topa të tillë.

Shefi i diplomacisë së BE-së, Josep Borrell, tha më herët gjatë 7 tetorit, se ai dëshiron që blloku të japë më shumë para dhe mbështetje ushtarake për Ukrainën, përshirë edhe trajnime. Borrell shtoi se propozime konkrete për këto çështje mund të miratohen më vonë gjatë tetorit.

Kancelari gjerman, Olaf Scholz, u zotua se shteti i tij do të japë një kontribut të rëndësishëm në misionin trajnues evropian.

Presidenti ukrainas, Voldymyr Zelensky, iu adresua samitit të liderëve përmes video-lidhjes. Ai bëri thirrje që Evropa të ofrojë më shumë sisteme ajrore në mënyrë që të mbrohet infrastruktura energjetike ukrainase nga sulmet ruse.

“Rusia e solli luftën në tokën tonë…. dhe vetëm falë faktit që populli ukrainas e ndaloi këtë pushtim të Rusisë, Rusia nuk mund ta sjellë këtë luftë të njëjtë në pjesë të tjera të Evropës, veçanërisht në shtetet e Baltikut, Poloni dhe Moldavi”, tha Zelensky.

Ai bëri thirrje për presion ndërkombëtar në mënyrë që trupat ruse të tërhiqen nga centrali bërthamor i Zaporizhjës, teksa kërkoi edhe ndihmë për mbledhjen e fondeve për rindërtimin e Ukrainës./rel

The post Liderët e BE-së pa marrëveshje për çmimin tavan ndaj gazit rus appeared first on Albeu.com.

Rusia tashmë ka ndërprerë pjesërisht apo plotësisht furnizimet me gaz për 13 vende anëtare të BE-së, të cilat përdorin energjinë ruse për të ngrohur shtëpitë, për të prodhuar rrymë dhe për të mbajtur në funksion fabrikat.

Shefja e Komisionit Evropian, Ursula von der Leyen, u ka thënë gazetarëve më 7 shtator se “ne do të propozojmë çmim tavan në gazin rus” përveç masave tjera.

Ajo ka përmendur edhe shkurtimet e detyruara të energjisë elektrike përgjatë pikut të përdorimit.

“Ne duhet të ndalim të ardhurat e Rusisë, të cilat i përdor (presidenti rus, Vladimir) Putin për të financuar këtë luftë mizore në Ukrainë”, ka thënë von der Leyen.

Putin, në anën tjetër, ka paralajmëruar kundërpërgjigje.

“Ne nuk do të ofrojmë asgjë nëse situata është në kundërshtim me interesat tona”, ka thënë Putini në një Forum ekonomik në Vlladivostok.

“Ne nuk do të dërgojmë gaz, naftë, thëngjill, apo naftë për ngrohje – ne nuk do të dërgojmë asgjë”, ka thënë Putin.

Para shpërthimit të luftës në Ukrainë, BE-ja e ka siguruar 40 për qind të energjisë nga Rusia.

Ministri çek i Industrisë, Jozef Sikela, u ka thënë senatorëve çekë më herët gjatë ditës se vënia e çmimit tavan në gazin rus nuk është zgjidhje për krizën aktuale.

Sipas tij, ministrat e Energjisë së BE-së nuk duhet të diskutojnë diçka të tillë, në një takim që do ta zhvillojnë këtë javë.

Çekët udhëheqin aktualisht Presidencën e BE-së.

Presidenti rus, Vladimir Putin, ka urdhëruar pushtimin e Ukrainës më 24 shkurt.

Ai e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

The post BE synon çmim tavan për gazin rus, Putin paralajmëron dimër të ftohtë appeared first on Albeu.com.

Kufiri do të ndihmojë në luftimin e inflacionit duke i dhënë një goditje aftësisë së Moskës për të financuar luftën në Ukrainë, thotë Sekretarja e Thesarit e SHBA-së, Janet Yellen.

Çmimi tavan i naftës është “projektuar në mënyrë specifike” për të reduktuar të ardhurat ruse dhe aftësinë e saj për të “financuar luftën e saj të agresionit”, sipas marrëveshjes.

Dokumenti i plotë nga ministrat e financave të G7 thotë gjithashtu se ai është krijuar për të kufizuar “ndikimin e luftës së Rusisë në çmimet globale të energjisë, veçanërisht për vendet me të ardhura të ulëta dhe të mesme”.

Sipas dokumentit, kjo do të funksionojë duke “lejuar vetëm ofruesit e shërbimeve të vazhdojnë të bëjnë biznes në lidhje me naftën ruse në det dhe produktet e naftës të shitura me ose nën kufirin e çmimit”.

Kjo do të arrihet, thotë dokumenti, duke parandaluar kompanitë e transportit detar të transportojnë naftën ruse përmes detit, nëse ajo nuk është blerë me çmim nën kufirin.

Nuk ka ende asnjë detaj se në çfarë niveli do të vendoset kufiri, por dokumenti thotë se kjo “do të komunikohet publikisht në një mënyrë të qartë dhe transparente”./albeu.com

The post Ministrat e financave të G7 bien dakord për t’i vënë çmim tavan naftës ruse appeared first on Albeu.com.