Zjarri në hotelin e Vlorës, identifikohen gjashtë të lënduarit, mes tyre edhe persona nga Kosova

Gjashtë personat që u lënduan nga zjarri i fuqishëm, i cili përfshiu gjatë orëve të para të mëngjesit hotelin “Brooklyn” në Lungomaren e Vlorës, janë identifikuar. Të dëmtuarit janë kryesisht të rinj të moshave nga 20 deri në 30 vjeç.

Personat e lënduar janë Ndorina Rexhepi, 25 vjeç; Arlinda Rexhepi, 27 vjeç; Erza Grainca, 21 vjeç; Aldo Kasimi, 30 vjeç; Ana Dyrmishi, 25 vjeç; dhe Luan Saliu, 21 vjeç.

Flakët shpërthyen rreth orës 04:05 brenda hotelit, i cili ndodhet në lagjen “10 Korriku”. Dyshimet janë se vatra e zjarrit u krijua në restorant dhe më pas u përhap në pjesë të tjera të godinës, duke i detyruar pushuesit të kërkonin mënyra për t’u larguar.

Në përpjekje për t’i shpëtuar zjarrit, disa nga personat që ndodheshin në hotel u hodhën nga ballkonet. Si pasojë, ata pësuan fraktura dhe dëmtime të tjera në trup.

Policia bëri të ditur se pesë të lënduar u dërguan në Spitalin e Djegieve në Tiranë për trajtim të specializuar, ndërsa një person tjetër po trajtohet në Spitalin Rajonal të Vlorës. Dy prej tyre kanë marrë djegie të konsiderueshme në trup.

Verifikimet e para, ku përfshihet edhe shqyrtimi i pamjeve të regjistruara nga kamerat e sigurisë, tregojnë se ngjarja ka qenë aksidentale. Paraprakisht dyshohet se zjarri u shkaktua nga djegia e prizës elektrike të një frigoriferi që ndodhej në ambientet e restorantit.

Nën drejtimin e Prokurorisë, grupi hetimor po vazhdon veprimet për të dokumentuar plotësisht ngjarjen dhe për të sqaruar rrethanat në të cilat ajo ndodhi.