Zemaj pas votimit në LDK: Ne kërkuam ndryshim, shumica mbështeti vazhdimin e Abdixhikut

Armend Zemaj, deputet i zgjedhur i Lidhjes Demokratike të Kosovës (LDK), ka folur pas përmbylljes së votimit në Kuvendin e jashtëzakonshëm të partisë, ku u trajtua kërkesa për shkarkimin e kryetarit Lumir Abdixhiku.

Ai bëri të ditur se, së bashku me 151 delegatë të tjerë, kishte arritur në përfundimin se LDK-së i duhej një ndryshim në drejtim. Megjithatë, pjesa më e madhe e delegatëve votoi që Abdixhiku ta vazhdojë mandatin.

“Në rendin e ditës sot kishim vetëm një çështje, e cila nuk mori votat e nevojshme. Për shkarkimin votuan 152 delegatë, ndërsa 170 u shprehën kundër. Ky është fati politik i LDK-së. Ne besuam se ndryshimi do të sillte sukses, kurse shumica vlerësoi se rruga duhet të vazhdojë me Abdixhikun. Ky është përfundimi i votimit”, deklaroi Zemaj.

Sipas tij, votimi u zhvillua në mënyrë demokratike, ndërsa organizimi dhe të gjitha procedurat u realizuan në nivelin e duhur.

“Procesi ishte demokratik dhe rezultati duhet pranuar ashtu siç është. Nga ana procedurale, gjithçka ishte organizuar mirë. Pavarësisht kësaj, ky është vendimi i dalë nga votimi. E rëndësishme është se procesi u zhvillua në mënyrë demokratike dhe ne vazhdojmë të jemi të bashkuar, siç po na shihni”, tha Zemaj.

Deputeti i LDK-së njoftoi gjithashtu se mbledhja e grupit parlamentar të partisë do të shërbejë për shqyrtimin e mundësive dhe përcaktimin e hapave që do të ndërmerren pas këtij vendimi.

Pas këtij rezultati, Lumir Abdixhiku mbetet në postin e kryetarit të Lidhjes Demokratike të Kosovës.