Vjosa Osmani akuzon Serbinë: Vazhdon të fshehë varrezat masive dhe synon zhdukjen e Kosovës

Ish-presidentja e Kosovës, Vjosa Osmani, ka reaguar ndaj zhvillimeve të fundit për varrezën masive në Kalludër të Zubin Potokut. Ajo e akuzoi Serbinë se ende po e mban të fshehur të vërtetën për personat e zhdukur me dhunë gjatë luftës së fundit në Kosovë.

Përmes një reagimi publik, Osmani deklaroi se Serbia vazhdon të “flejë mbi varreza masive” dhe nuk po i zbulon vendndodhjet e rreth 1,600 personave që vijojnë të konsiderohen të zhdukur.

Osmani përmendi edhe 23 intelektualët nga Mitrovica, të rrëmbyer prej forcave serbe në prill të vitit 1999. Ajo theksoi se familjarët e tyre, së bashku me qytetarët e Mitrovicës, kanë kaluar 27 vjet në ankth, pa marrë përgjigje për fatin e të afërmve të tyre.

Sipas saj, angazhimi që këta intelektualë dhanë në arsim, shëndetësi dhe veprimtari atdhetare do të kujtohet përherë nga qytetarët e Mitrovicës.

Duke iu referuar zbulimit të varrezës masive në Kalludër, ku ekzistojnë dyshime se ndodhen eshtrat e intelektualëve të zhdukur, Osmani vlerësoi se lajmi u sjell njëfarë lehtësimi familjeve. Megjithatë, ajo nënvizoi se ky rast rikthen njëkohësisht kujtimin e dhimbshëm të krimeve të kryera gjatë luftës.

Ajo tha gjithashtu se Kosova kufizohet me një shtet i cili, sipas saj, vazhdon të mos heqë dorë nga synimi për zhdukjen e shqiptarëve të Kosovës.

Në përmbyllje të reagimit, Osmani kërkoi unitet kombëtar përballë vuajtjes së familjeve që vazhdojnë të kërkojnë të zhdukurit, si dhe ndaj sfidave që, sipas saj, mbeten ende të pranishme.

Osmani përfundoi se, përballë familjeve që kërkojnë ende njerëzit e tyre më të dashur dhe një armiku që vazhdon të flejë mbi varrezat masive të fëmijëve shqiptarë të vrarë në luftë, dallimet mes qytetarëve nuk duhet të kenë asnjë rëndësi.