Vëllezërit Sylaj transferohen në Burgun e Sigurisë së Lartë në Dyz pas vrasjes së Arlinda Zekajt

Albert Sylaj, personi kryesor i dyshuar për vrasjen e Arlinda Zekajt më 25 tetor 2026, si dhe Jeton Sylaj, ish-bashkëshorti i viktimës, i cili u arrestua pas kallëzimit të bërë nga ajo po atë ditë, janë dërguar në Burgun e Sigurisë së Lartë në Dyz.

Burimet e Kallxo.com bëjnë me dije se dy vëllezërit janë sistemuar në pavijone të ndara brenda këtij institucioni.

Viktima Arlinda Zekaj humbi jetën nga goditjet me sëpatë në banesën e saj në fshatin Vitomiricë të Pejës, në mbrëmjen e 25 tetorit 2026.

Autor i dyshuar i krimit është ish-kunati i saj, Albert Sylaj.

Pas dy ditësh kërkime intensive, Policia e Kosovës e arrestoi Sylajn në Deçan më 27 tetor në orët e vona të mbrëmjes.

Gjykata i ka caktuar atij masën e paraburgimit prej 30 ditësh.

Edhe Jeton Sylajt iu vendos paraburgim njëmujor, nën dyshimet për mosbindje ndaj urdhrave gjyqësore, ndërsa ndaj tij ekziston edhe një aktakuzë për kërcënime ndaj ish-bashkëshortes së tij të ndjerë.

Në dokumentet e Prokurorisë për kërkesën e paraburgimit, thuhet se Albert Sylaj e ka privuar nga jeta ish-kunatën e tij si hakmarrje e pamëshirshme, pasi ajo kishte denoncuar vëllanë e tij për dhunë në familje.

Sipas përshkrimit të ngjarjes nga Prokuroria, pas kthimit të viktimës nga stacioni policor, ku kishte raportuar dhunën e ushtruar nga ish-bashkëshorti, i pandehuri Albert Sylaj, i revoltuar nga ndalimi i vëllait të tij Jeton, mori sëpatën dhe hyri në dhomën e gjumit ku ndodhej viktima.

Prokuroria thekson se Arlinda Zekaj u përpoq të fshihej pas derës, por i pandehuri e goditi atë në disa pjesë të trupit, me theks të veçantë në kokë, duke i shkaktuar vdekjen në vend.

Sipas dosjes hetimore, krimi u krye në prani të djalit të mitur të viktimës, fëmijëve të mitur të autorit dhe nënës së tij.

Prokuroria ka renditur në kërkesën e saj edhe rreziqet që paraqet lirimi i të pandehurit.

Ajo vë në dukje se Albert Sylaj u fsheh nga autoritetet nga data 25 deri më 27 tetor 2026, si dhe se ekziston mundësia që ai të ndikojë tek dëshmitarët ose të fshehë prova.

Sipas Prokurorisë, nëse lihet i lirë, i pandehuri paraqet rrezik për përsëritje të veprës penale, pasi ka në dosjen e tij katër dënime të formës së prerë.

Prokuroria gjithashtu thekson se asnjë masë alternative nuk garanton praninë e të pandehurit gjatë procedurës penale.

Inspektorati Policor i Kosovës ka propozuar pezullimin e Agron Hasanajt, drejtor i Stacionit Policor në Pejë, bashkë me dhjetë zyrtarë të tjerë të zinxhirit komandues.

Në mbrëmjen e 28 tetorit 2026, emisioni MAT i Klan Kosovës transmetoi një regjistrim audio të një bisede mes Arlinda Zekajt dhe policit Faruk Muçolli.

Në këtë incizim, Arlinda Zekaj dëgjohet t’i thotë policit: “Faruk të lutem. Të lutem, unë vrahem… Nuk ka lidhje, po ju keni me u përgjigj”.

Përgjigjja e Faruk Muçollit ndaj saj ishte: “Unë ty personalisht më s’kam me të pranu. S’e kam obligim me u marrë me ty…, se jemi lodhë”.

Pezullimet kanë prekur edhe Prokurorinë e Pejës.

Këshilli Prokurorial i Kosovës vendosi më 29 tetor 2026 pezullimin nga detyra të kryeprokurores së Prokurorisë së Pejës, Lumturije Vuçetaj, dhe zëvendëskryeprokurores, e cila njëkohësisht ishte koordinatore për dhunën në familje, Arlinda Nallbani-Gacaferri.

Kolektivi për Mendim dhe Veprim Feminist organizoi protesta më 28 dhe 29 tetor 2026, duke kërkuar shkarkimin, ndjekjen penale dhe burgosjen e përgjegjësve në krye të institucioneve të drejtësisë.