Vazhdon të mërkurën seanca konstituive, ende pa siguri për votat e presidentit

Pas një serie takimesh, dukej se palët po afroheshin drejt një ujdie për zgjedhjen e presidentit.

Pas disa bisedimeve mes kryetarit të Lëvizjes Vetëvendosje, Albin Kurti, dhe kreut të Lidhjes Demokratike të Kosovës, Lumir Abdixhiku, u arrit marrëveshje për një kandidat konsensual.

Në takimin e fundit, të zhvilluar më 31 gusht, dy liderët u shfaqën para mediave së bashku me një person të tretë.

Bëhej fjalë për Bekim Sejdiun, i cili u propozua për postin e presidentit.

Marrëveshja mes Kurtit dhe Abdixhikut krijoi përshtypjen se mund të zhbllokonte një pjesë të ngërçit politik, por kjo situatë zgjati vetëm për pak kohë.

Menjëherë pas saj nisën kundërshtimet, ndërsa gjashtë deputetë të LDK-së deklaruan se nuk do ta mbështesin Sejdiun.

Disa prej tyre e kritikuan hapur edhe vetë marrëveshjen e arritur nga dy liderët, duke treguar se ajo nuk kishte siguruar mbështetjen e të gjithë deputetëve të LDK-së.

Për këtë zhvillim reagoi edhe kreu i LDK-së, Lumir Abdixhiku, i cili vijoi të qëndrojë në mbështetje të marrëveshjes me Kurtin.

Pavarësisht kësaj, deklaratat kundërshtuese nga deputetët e LDK-së vazhduan edhe në ditët pasuese.

Nga ana tjetër, përfaqësuesit e LVV-së këmbëngulën për zbatimin e marrëveshjes.

Kandidatura e Bekim Sejdiut nuk u kundërshtua vetëm brenda një pjese të LDK-së. Edhe PDK-ja u shpreh kundër saj.

Kryetari i PDK-së, Bedri Hamza, deklaroi se deputetët e kësaj partie nuk do ta votojnë Bekim Sejdiun për president.

Ndërkohë, PDK-ja dhe Aleanca vijuan kërkesat për konstituimin e Kuvendit.

Përfaqësuesit e tyre shkuan në Kuvend pothuajse çdo 48 orë, prej nga kërkuan që kryetari i LVV-së, Albin Kurti, ta thërrasë seancën konstituive.

Seanca, e cila kishte nisur më herët, ende nuk është përmbyllur.

Vazhdimi i saj pritet të mbahet të mërkurën, më 9 shtator.

Gjatë kësaj seance do të kuptohet nëse Kuvendi do të arrijë të konstituohet, ndërsa mbetet për t’u parë edhe ndikimi që do të kenë zhvillimet pas marrëveshjes së 31 gushtit.