Uashingtoni sanksionon Gjykatën e Hagës, Rubio: Do t’ia paralizojmë funksionimin

Administrata e presidentit amerikan Donald Trump njoftoi të premten vendosjen e sanksioneve të reja ndaj Gjykatës Penale Ndërkombëtare (GJPN), në një përshkallëzim të përplasjes me këtë institucion të drejtësisë ndërkombëtare.

Sipas masave të shpallura, synohet kufizimi i veprimtarisë së gjykatës, e cila është kritikuar nga administrata Trump për hetimet dhe procedurat e nisura ndaj zyrtarëve amerikanë dhe izraelitë.

Sekretari amerikan i Shtetit, Marco Rubio, tha se presidenti Trump nuk do të pranojë ndjekjen penale të shtetasve amerikanë nga Gjykata Penale Ndërkombëtare.

“Do t’i ndalojmë transaksionet me këtë gjykatë që vepron jashtë rregullave, do t’ia heqim burimet dhe do ta paralizojmë aftësinë e saj për të funksionuar”, deklaroi Rubio.

Masat mund të shtrihen përtej zyrtarëve të gjykatës dhe të prekin edhe kompanitë që i ofrojnë shërbime, mes tyre ato financiare, të sigurimeve dhe teknologjisë, shkruan Reuters.

Zëvendësprokurorja e GJPN-së, Nazhat Shameem Khan, e kundërshtoi vendimin amerikan, duke e cilësuar atë si një përpjekje për të dëmtuar sundimin e ligjit ndërkombëtar dhe pavarësinë e një institucioni gjyqësor.

Khan deklaroi se, pavarësisht presionit, gjykata do të vijojë punën për të gjitha çështjet, hetimet dhe procedurat penale që ka në shqyrtim.

Tensionet mes Shteteve të Bashkuara dhe Gjykatës Penale Ndërkombëtare janë rritur veçanërisht pas urdhërarresteve të lëshuara për kryeministrin izraelit Benjamin Netanyahu dhe ish-ministrin e Mbrojtjes Yoav Gallant.

Urdhërarrestet lidhen me dyshimet për krime lufte dhe krime kundër njerëzimit në Rripin e Gazës. SHBA-ja ka kundërshtuar gjithashtu hetimet e mëparshme të gjykatës ndaj veprimeve të pjesëtarëve të ushtrisë amerikane në Afganistan.

E krijuar në vitin 2002, Gjykata Penale Ndërkombëtare ka kompetencë të ndjekë penalisht personat përgjegjës për gjenocid, krime lufte dhe krime kundër njerëzimit. Shtetet e Bashkuara nuk janë pjesë e saj.

Ndërkohë, gjykata po shqyrton mënyra për të kufizuar pasojat e sanksioneve, përfshirë zëvendësimin e disa shërbimeve teknologjike dhe gjetjen e alternativave për shërbimet bankare.

Përplasja e fundit ka nxitur shqetësime lidhur me ndikimin e presionit politik mbi drejtësinë ndërkombëtare dhe aftësinë e institucioneve gjyqësore për të vepruar në mënyrë të pavarur.