Tromp për vendimin në Hagë: pritet një zgjidhje kompromisi, me lirime dhe dënime

Nevenka Tromp, ish-hetuese e Tribunalit të Hagës, ka paraqitur pritshmëritë e saj lidhur me vendimin e trupit gjykues të Gjykatës Speciale për ish-krerët e lartë të Ushtrisë Çlirimtare të Kosovës.

Në një intervistë për Radion Evropa e Lirë, Tromp u shpreh se vendimi pritet të marrë formën e një kompromisi, me synimin për t’iu përgjigjur pritjeve si të palës kosovare, ashtu edhe të asaj serbe.

Sipas saj, epilogu do të jetë i tillë që disa prej të akuzuarve do të lirohen, ndërsa të tjerë do të shpallen fajtorë dhe do të dënohen.

Ajo theksoi se mbetet vetëm të shihet se cili do të jetë kombinimi përfundimtar që do të vendoset nga gjykata.

Procesi gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit përfundoi në shkurt. Aktgjykimi ishte parashikuar të shpallej në maj, por paneli gjyqësor vendosi ta shtyjë atë deri më 20 korrik, duke arsyetuar vendimin me “kompleksitetin e rastit”.

Gjykata Speciale ka sqaruar gjithashtu se data 20 korrik nuk do të thotë domosdoshmërisht se aktgjykimi do të shpallet atëherë, teksa ka paralajmëruar edhe mundësinë e një shtyrjeje tjetër.