Tre të akuzuarit për sulmin ndaj kanalit të Ibër-Lepencit deklarohen të pafajshëm

Dragisha Viqentijeviq, Jovan Viqentijeviq dhe Igor Dimoviq, ky i fundit në mbrojtje në liri, kanë mohuar akuzat që lidhen me sulmin e 29 nëntorit 2024 ndaj kanalit të Ibër-Lepencit në Varagë të Zubin-Potokut, gjatë paraqitjes së tyre në Gjykatën Themelore në Prishtinë.

Para gjykatës, Jovan Viqentijeviq tha se nuk e pranon fajësinë për akuzat ndaj tij.

“Jo, nuk ndihem fajtor”, u shpreh ai.

Edhe Dragisha Viqentijeviq deklaroi se nuk mban përgjegjësi për veprat penale që i ngarkohen.

“Nuk ndihem fajtor për veprat që më bien në barrë”, tha ai.

Po ashtu, edhe Igor Dimoviq, i cili po mbrohet në liri, u deklarua i pafajshëm.

“Nuk ndihem fajtor për veprën që më vihet në barrë”, tha ai.

Sipas aktakuzës së Prokurorisë Speciale, më 29 nëntor 2024, rreth orës 18:50, në fshatin Varagë të Komunës së Zubin-Potokut, vëllezërit Dragisha dhe Jovan Viqentijeviq kanë vendosur lëndë shpërthyese në segmentin e kanalit të Ibër-Lepencit, një infrastrukturë publike që shërben për furnizim me ujë të pijshëm dhe për nevojat e Korporatës Energjetike të Kosovës në prodhimin e energjisë elektrike.

Në aktakuzën e përpiluar nga prokurori special Bekim Kodraliu thuhet se ata, bashkë me persona të tjerë ende të paidentifikuar, pas një marrëveshjeje paraprake dhe me synim frikësimin serioz të popullsisë, si dhe cenimin e rendit kushtetues dhe sigurisë së Republikës së Kosovës, kanë vendosur brenda kanalit rreth 20 kilogramë eksploziv të llojit Trinitrotoluene (TNT).

Prokuroria pretendon se eksplozivi ishte futur në një çantë, e cila ishte lidhur me litar në një shtyllë betoni, me qëllim që të shkaktohej dëmtim i rëndë i infrastrukturës kritike të furnizimit me ujë dhe energji elektrike.

Sipas aktakuzës, të pandehurit e kanë aktivizuar lëndën shpërthyese duke ndezur një fitil me djegie të ngadalshme, çka solli një shpërthim të fuqishëm dhe dëmtoi rëndë strukturën prej betoni të kanalit të Ibër-Lepencit.

Si rrjedhojë e shpërthimit, sipas Prokurorisë, u ndërpre furnizimi me ujë të pijshëm për banorët e disa komunave veriore dhe qendrore të Kosovës, u pengua furnizimi me ujë për KEK-un dhe u vu në rrezik prodhimi i energjisë elektrike në nivel vendi.

Me këto veprime, thotë Prokuroria, të akuzuarit kanë krijuar rrezik serioz për jetën dhe sigurinë e popullsisë, si edhe kanë dëmtuar infrastrukturën kritike të shtetit. Dëmi material i shkaktuar ndaj ndërmarrjes Ibër-Lepenc vlerësohet në 376 mijë e 774 euro e 70 centë.

Ata ngarkohen se, në bashkëkryerje, kanë kryer veprën penale “Rrezikimi i rendit kushtetues me shkatërrimin apo dëmtimin e instalimeve dhe pajisjeve publike”, në lidhje me veprën penale “Kryerja e veprës terroriste”, sipas dispozitave përkatëse të Kodit Penal të Kosovës.

Në pikën e dytë të aktakuzës, vëllezërit Viqentijeviq përballen edhe me akuzë për armëmbajtje pa leje. Prokuroria thotë se gjatë kontrolleve të kryera nga Policia e Kosovës në banesat e tyre në Zubin-Potok dhe në fshatin Prevllak të kësaj komune, është gjetur dhe sekuestruar një sasi e konsiderueshme armatimi luftarak.