Tragjedia në Komoran, tre të plagosur po trajtohen në QKUK, njëra paciente operohet

Familja Raka u përball me një tragjedi mëngjesin e sotëm, pasi Rea, vajza e tyre 24-vjeçare, humbi jetën në një vetaksident në Komoran. Ngjarja ndodhi në orët e mëngjesit, derisa familja po kthehej nga Aeroporti i Tiranës.

Nga aksidenti mbetën të lënduar rëndë edhe tre pjesëtarë të tjerë të familjes, të cilët u transportuan për trajtim në Qendrën Klinike Universitare të Kosovës.

QKUK-ja ka bërë të ditura hollësi për gjendjen shëndetësore dhe trajtimin e tyre.

Të plagosurit fillimisht u pranuan në Emergjencë. Pas kryerjes së ekzaminimeve të nevojshme, njëra paciente u dërgua në sallën operative të QE, ku ndërhyrja u realizua nga ekipet e Kirurgjisë Abdominale, Urologjisë dhe Anestezionit.

Pas përfundimit të operacionit, pacientja u transferua në MIQ, ku po vazhdon trajtimin.

Dy të lënduarit e tjerë kanë pësuar dëmtime të rënda trupore, por aktualisht ndodhen në gjendje stabile. Njëri po merr trajtim në Klinikën Torakale, ndërsa tjetri është hospitalizuar në Ortopedi.