Tragjedi në Viti, aksidenti i merr jetën të riut Aron Pira

Kryetari i Komunës së Vitisë, Sokol Haliti, i ka përcjellë ngushëllimet e tij familjes Pira pas vdekjes tragjike të të riut Aron Pira, i cili humbi jetën në një aksident.

Haliti deklaroi se Komuna e Vitisë ndan dhimbjen me familjarët, të afërmit, miqtë dhe të gjithë personat që e kanë njohur Aronin në këtë periudhë të rëndë zie.

“E nderuara familja Pira,

Pas humbjes së më të dashurit tuaj, Aron Pira, i cili u nda nga jeta si pasojë e një aksidenti tragjik, në emër të Komunës së Vitisë dhe në emrin tim personal ju përcjell ngushëllimet më të sinqerta e më të thella.

Në këto momente të mbushura me dhimbje, pikëllim dhe mërzi, jemi pranë jush, familjarëve, të afërmve, miqve dhe të gjithë atyre që e njohën Aronin dhe jetuan çaste me të.

Vdekja e papritur e një të riu përbën një dhimbje të jashtëzakonshme për familjen, por edhe për mbarë komunën tonë.

Ju uroj të gjeni forcë për ta përballuar këtë humbje të madhe. Kujtimi i Aronin, i jetës dhe i mirësisë së tij, qoftë gjithmonë i pranishëm në zemrat tuaja.”