Temperaturat ekstreme/ Qeveria e Kosovës merr masa urgjente, kufizon orarin e punës për disa kategori

Për shkak të temperaturave të larta që kanë përfshirë vendin, Qeveria e Kosovës ka marrë masa për kufizimin e orarit të punës nga data 13 korrik deri më 20 korrik 2024.

Sipas vendimit të ministrisë së Shëndetësisë kategoritë që përfitojnë janë gratë shtatzëna, qytetarët me sëmundje kronike dhe punëtorët në sektorin e ndërtimit.

“Varësisht prej temperaturave që mbizotërojnë gjatë muajit korrik dhe gusht 2024, do ndërmerren masa të tjera”, thuhet në njoftim.

VENDIMI I PLOTË I MINISTRISË:

Kufizim i orarit të punës përgjatë temperaturave të larta

Në bazë të rekomandimeve të Institutit Kombëtar të Shëndetësisë Publike të Kosovës, për shkak të rritjes së konsiderueshme të temperaturave në ditët në vijim, me qëllim të mbrojtjes së shëndetit të qytetarëve, Ministria e Shëndetësisë merr vendim që të kufizohet orari i punës nga data 13.07.2024 deri më 20.07.2024 për këto kategori:

1. Nga data 13.07.2024 deri më 20.07.2024 lirohen nga puna gratë shtatzëna.

2. Në rast të pamundësisë së lirimit nga puna sipas paragrafit 1 të këtij vendimi, gratë shtatzëna punojnë nga shtëpitë.

3. Nga data 13.07.2024 deri më 20.07.2024 qytetarët me sëmundje kronike punojnë me orar të shkurtuar deri në 4 orë në ditë.

4. Nga data 13.07.2024 deri më 20.07.2024 ndalohet puna në sektorin e ndërtimtarisë në ambiente të hapura gjatë orarit 11:00 – 17:00 në të gjithë territorin e Republikës së Kosovës.

5. Varësisht prej temperaturave që mbizotërojnë gjatë muajit korrik dhe gusht 2024, ndërmerren masa të tjera.

6. Vendimi hyn në fuqi ditën e nënshkrimit.

Ky vendim është marrë duke pasur parasysh praktikat më të mira për mbrojtjen e shëndetit dhe sigurisë së punëtorëve gjatë periudhave me temperatura të larta.