Sulmohet infermierja B.S. në Viti, institucionet komunale dënojnë dhunën ndaj punonjësve shëndetësorë

Komuna e Vitisë, Drejtoria për Shëndetësi dhe Mirëqenie Sociale (DSHMS), si dhe Qendra Kryesore e Mjekësisë Familjare (QKMF) në Viti, kanë reaguar me dënim të ashpër pas sulmit fizik ndaj infermieres B.S., të ndodhur teksa ajo po ushtronte detyrën profesionale.

Në reagimin e përbashkët, institucionet komunale kanë nënvizuar se dhuna kundër punonjësve të shëndetësisë është e patolerueshme, pasi rrezikon sigurinë në ambientin e punës, cenon dinjitetin e profesionistëve dhe pengon funksionimin e rregullt të sistemit të kujdesit shëndetësor.

“Nuk mund të pranohet dhuna ndaj personave që çdo ditë u shërbejnë qytetarëve. Detyra e punonjësve shëndetësorë është të ofrojnë përkujdesje, ndihmë dhe përkrahje, jo të jenë objekt sulmesh”, kanë deklaruar institucionet komunale.

Mbështetje e plotë i është ofruar infermieres së sulmuar dhe gjithë personelit të QKMF-së. Komuna e Vitisë i ka dëshiruar B.S. shërim të shpejtë dhe kthim sa më parë në vendin e punës.

Po ashtu, organeve kompetente u është kërkuar të ndërmarrin të gjitha masat e domosdoshme ligjore për trajtimin e rastit, në mënyrë që personat përgjegjës të përballen me pasojat e parashikuara nga legjislacioni në fuqi.

Komuna e Vitisë, DSHMS-ja dhe QKMF-ja u kanë bërë thirrje qytetarëve që të tregojnë respekt ndaj profesionistëve shëndetësorë, ndërsa kanë ritheksuar angazhimin për të garantuar një mjedis të sigurt si për stafin, ashtu edhe për qytetarët.