Specialja pritet të japë vendimin më 16 shtator, “Liria ka emër” paralajmëron dy marshime

Gjykata Speciale në Hagë do të shpallë më 16 shtator vendimin për katër ish-drejtuesit e Ushtrisë Çlirimtare të Kosovës, ndërsa organizatorët e platformës “Liria ka Emër” kanë nisur përgatitjet për dy tubime në mbështetje të tyre.

Organizatori i platformës, Ismail Tasholli, bëri të ditur se aktiviteti i parë do të mbahet më 12 shtator në Prishtinë, ndërsa i dyti do të zhvillohet më 16 shtator në Hagë, në të njëjtën ditë kur pritet të jepet verdikti për Hashim Thaçin, Kadri Veselin, Jakup Krasniqin dhe Rexhep Selimin.

Sipas Tashollit, marshimi në Prishtinë do të quhet “Marshi i Lirisë”, ndërsa organizimi në Hagë do të ketë të njëjtën moto dhe përshkrim. Ai tha se aktivitetet po marrin përmasa të mëdha për shkak të përvojës së dy marshimeve të mëparshme, afërsisë së vendimit dhe interesimit të shtuar qytetar për zhvillimet në Hagë.

“Liria ka Emër” ka vlerësuar gjithashtu se bashkëpunimi për këto organizime është më i gjerë se në rastet e mëparshme, çka, sipas Tashollit, mund ta bëjë marshimin e 12 shtatorit më të madhin në historinë e Kosovës, raporton KosovaPress.

Tasholli parashikoi që në rrugët dhe sheshet e Prishtinës të dalin të paktën 200 mijë qytetarë për të shprehur mbështetjen ndaj ish-krerëve të UÇK-së. Ai tha se zakonisht shmang parashikimet me shifra, por beson se pjesëmarrja nuk do të jetë më e ulët se 200 mijë persona dhe mund të jetë edhe më e lartë.

Platforma ka përgatitur edhe një tjetër aktivitet në rast se vendimi ndaj ish-krerëve të UÇK-së do të jetë lirues. Në këtë skenar, motoristët do të organizojnë një marshim nga Aeroporti i Prishtinës drejt qendrës së kryeqytetit, si pjesë e pritjes së tyre.

Organizatori kujtoi se më herët është zhvilluar një marshim me motorë në Hagë. Ai tha se ky aktivitet do të synojë të simbolizojë mirëseardhjen e tyre në Kosovë, ndërsa shtoi se detajet përfundimtare do të varen nga specifikat dhe protokollet përkatëse. Tasholli shprehu bindjen se në këtë rast “krejt Kosova” do të jetë në rrugë për t’i pritur, raporton KosovaPress.

Katër ish-krerët e Ushtrisë Çlirimtare të Kosovës ndodhen në paraburgim në Hagë që nga fillimi i nëntorit të vitit 2020. Gjykata Speciale pritet të shpallë vendimin për ta më 16 shtator.