Shfaqnin imazhe të agresorëve serbë, ministri i Brendshëm i Kosovës për heqjen e banderolave: Simboli i vetëm i Beogradit në vendin tonë, ambasada

Ministri i Punëve të Brendshme, Xhelal Sveçla, ka njoftuar se këtë të enjte në Zveçan janë hequr banderolat me simbole dhe imazhe të diktatorëve e agresorëve serbë, të vëna ilegalisht.

Sveçla ka thënë se simboli i vetëm i Serbisë brenda shtetit të Kosovës do të jetë ambasada e saj në Prishtinë.

“Sot në Zveçan janë larguar billbordet ilegale me simbole dhe imazhe të diktatorëve e agresorëve të cilat janë të papranueshme në Republikën e Kosovës”, ka shkruar ministri në Facebook.

Ai shtoi se Republika e Kosovës është e përcaktuar qartë për vlerat demokratike dhe orientimin euro-atlantik të saj ndërkaq si institucione mbesim të përkushtuar për rend e ligj dhe zbatim të kushtetushmërisë në çdo pjesë të vendit tonë.

“Këto billborde e imazhe të fashistëve e agresorëve si Vladimir Putin dhe kundërshtarëve të shtetit tonë, nuk do të gjejnë vend në shtetin tonë”, ka shtuar Sveçla.

Në banderolë në mesin e disa figurave ishte vendosur edhe fotografia e presidentit të Serbisë, Aleksandar Vuçiç dhe homologut të tij rus, Vladimir Putin.