Serbia drejt hapjes së Klasterit 3 me BE-në, Gunther Fehlinger i del kundër: Brukseli të mos shpërblejë obstruksionin

Komisioni Evropian pritet t’u dërgojë vendeve anëtare të Bashkimit Evropian një rekomandim me shkrim, ku vlerësohet se Serbia i ka përmbushur kushtet për hapjen e klasterit 3 në negociatat për anëtarësim. Sipas burimeve të besueshme në Bruksel, të cituara nga REL-i, do të propozohet që ky grup kapitujsh të hapet gjatë muajit korrik.

Ky zhvillim vjen në një periudhë delikate politike, pasi raportet mes Beogradit dhe Kosovës mbeten të acaruara, ndërsa qasja e politikës së jashtme serbe ndaj Rusisë vazhdon të ngjallë dyshime në Bruksel.

Për këtë arsye, shtrohet dilema nëse ecja përpara e Serbisë në procesin negociues është në përputhje me kriteret dhe vlerat që udhëheqin anëtarësimin në BE, si dhe çfarë sinjali u jep ky hap vendeve të tjera të rajonit që synojnë integrimin evropian.

Pikërisht për këtë temë, në një deklaratë për “Bota sot”, foli eksperti austriak dhe kryetari i Komitetit Austriak për Zgjerimin e NATO-s, Gunther Fehlinger.

Ai kritikoi qasjen e Bashkimit Evropian dhe vendimin e tij në raport me procesin e anëtarësimit të Serbisë, duke paralajmëruar se një veprim i tillë cenon besueshmërinë e politikës së zgjerimit të BE-së.

“Bashkimi Evropian duhet të pezullojë menjëherë çdo përparim të mëtejshëm në negociatat e anëtarësimit të Serbisë. Hapja e Klasterit 3 në këtë moment do të shpërblente obstruksionin në vend të reformave dhe do të minonte besueshmërinë e procesit të zgjerimit të BE-së”.

Fehlinger theksoi se Komisioni Evropian duhet ta lidhë çdo hap të mëtejshëm të Serbisë në këtë proces me njohjen e Kosovës.

Po ashtu, ai renditi edhe një sërë kushtesh të tjera që, sipas tij, Beogradi duhet t’i përmbushë.

“I bëj thirrje Këshillit Evropian që çdo përparim i mëtejshëm në negociatat e anëtarësimit të Serbisë të kushtëzohet me njohjen paraprake të Republikës së Kosovës nga Serbia dhe më pas me përmbushjen e këtyre kushteve:

• Të njohë Republikën e Kosovës dhe të vendosë marrëdhënie normale diplomatike.

• Të zbatojë plotësisht të gjitha zotimet e marra në kuadër të Marrëveshjeve të Brukselit dhe Ohrit.

• Të harmonizojë 100% politikën e saj me Politikën e Përbashkët të Jashtme dhe të Sigurisë të BE-së, përfshirë sanksionet kundër Rusisë.

• T’i japë fund çdo mbështetjeje politike, financiare dhe të sigurisë për strukturat destabilizuese në veri të Kosovës.

• Të bashkëpunojë plotësisht për vënien para drejtësisë të përgjegjësve për sulmin në Banjskë.

• Të ndalojë retorikën nacionaliste nxitëse dhe kërcënimet ndaj vendeve fqinje.

• T’i japë fund bashkëpunimit strategjik ushtarak dhe të sigurisë me Rusinë, i cili është i papajtueshëm me politikën e jashtme të BE-së.

• Të zvogëlojë varësinë e tepruar nga Kina në sektorët strategjikë të infrastrukturës dhe sigurisë.

• Të forcojë pavarësinë e gjyqësorit dhe sundimin e ligjit në përputhje me standardet e BE-së.

• Të garantojë lirinë e vërtetë të mediave dhe të përmirësojë mbrojtjen e gazetarëve të pavarur.

• Të sigurojë zgjedhje të lira dhe të ndershme në përputhje me standardet ndërkombëtare demokratike.

• Të luftojë korrupsionin dhe krimin e organizuar përmes reformave të matshme dhe të verifikuara në mënyrë të pavarur.

• Të respektojë sovranitetin dhe integritetin territorial të të gjitha shteteve fqinje, përfshirë Kosovën.

• T’u japë fund politikave që kontribuojnë në paqëndrueshmërinë rajonale dhe të mbështesë në mënyrë aktive pajtimin në të gjithë Ballkanin Perëndimor.

• Të dëshmojë një angazhim të qëndrueshëm ndaj vlerave evropiane përmes veprimeve konkrete dhe jo vetëm deklaratave”.

Në përfundim, eksperti austriak u shpreh se pa njohjen e Kosovës dhe pa plotësimin e të gjitha këtyre kritereve, Serbisë nuk duhet t’i hapet asnjë kapitull i ri negociues.

Sipas Fehlinger, Bashkimi Evropian duhet të vlerësojë reformat dhe demokracinë, e jo obstruksionin dhe nacionalizmin.

“Bashkimi Evropian duhet të rikthejë parimin se zgjerimi bazohet në meritë dhe jo në akomodim gjeopolitik. Derisa Serbia ta njohë Kosovën dhe të dëshmojë respektimin e qëndrueshëm të këtyre kushteve, nuk duhet të hapet asnjë klaster i ri negociues.

Evropa duhet të shpërblejë reformat, demokracinë, paqen dhe harmonizimin me vlerat evropiane – jo obstruksionin, nacionalizmin dhe paqartësinë strategjike”, përfundoi Gunther Fehlinger për “Bota sot”.