Rugova pret së shpejti një kandidat konsensual për president: Ka emra më të përgatitur se unë

Ukë Rugova, deputet i Lidhjes Demokratike të Kosovës, ka shprehur bindjen se së shpejti do të dalë një emër konsensual për postin e presidentit.

Ai tha se shpreson që kjo të ndodhë brenda kësaj jave, ndërsa foli edhe për mundësinë që vetë të propozohej si figurë konsensuale për këtë detyrë.

“Besoj që shpejt do të kemi një emër të një presidenti konsensual. Uroj që të jetë gjatë kësaj jave, ashtu siç e tha edhe kongresisti DeGuardi, dhe besoj që si popull kemi mjaft emra të përgatitur për të qenë president. Unë nuk jam, atë e vendos dikush tjetër, por vet nuk jam në këtë fazë. Ne jemi në shërbim të popullit të Kosovës dhe jemi të gatshëm për të gjitha, por jo në këtë fazë. Besoj që ka emra të tjerë më të mirë e më të përgatitur për t’i shërbyer në këtë fazë Kosovë”, deklaroi Rugova.

Çështja e zgjedhjes së presidentit është prej kohësh pjesë e diskutimeve ndërmjet Lidhjes Demokratike të Kosovës dhe Lëvizjes Vetëvendosje.

Në fazën fillestare të bisedimeve, LDK-ja kishte kërkuar që posti i kreut të shtetit t’i jepej kësaj partie si një balancë demokratike. Kjo kërkesë, megjithatë, ishte kundërshtuar nga Lëvizja Vetëvendosje dhe drejtuesi i saj, Albin Kurti.

Kurti ka deklaruar se LDK-së i kishte propozuar tri ministri dhe pozitën e zëvendëskryeministrit, por oferta ishte refuzuar. Pas mbledhjes së grupit parlamentar të partisë më të vjetër në vend, Abdixhiku bëri të ditur se LDK-ja nuk do të përfshihet në asnjë marrëveshje, por do të ndihmojë në zgjedhjen e një presidenti konsensual, me synimin që vendi të mos shkojë në zgjedhje.

Në takimin e fundit mes Kurtit, Abdixhikut, Vjosa Osmanit dhe Lutfi Hazirit, palët deklaruan se kishin arritur pajtim për profilin që duhet të ketë presidenti i ardhshëm i vendit.