Rrustemi: Mospranimi i LDK-së për koalicion me LVV-në e dërgoi vendin në zgjedhje

Adnan Rrustemi, deputet i zgjedhur i Lëvizjes Vetëvendosje, ka thënë se Lidhja Demokratike e Kosovës u detyrohet qytetarëve një sqarim për arsyet pse nuk e pranoi formimin e qeverisë me LVV-në pas zgjedhjeve të vitit 2025.

Ai u shpreh se vendi përfundoi në zgjedhjet e 28 dhjetorit si pasojë e refuzimit të LDK-së për t’u bërë pjesë e një koalicioni qeverisës me LVV-në.

Po ashtu, Rrustemi vlerësoi se rezultati i LDK-së në zgjedhjet e 7 qershorit ishte më i dobët krahasuar me atë që kishte marrë në zgjedhjet e 9 shkurtit 2025.

“Në zgjedhjet e 28 dhjetorit kemi shkuar për shkak të refuzimit të LDK-së për të ardhur në takime dhe për të hyrë në bashkëqeverisje me LVV-në. LDK duhet t’ua sqarojë qytetarëve pse nuk ka ardhur në qeveri me LVV-në në vitin 2025. Pas 28 dhjetorit kjo nuk ka qenë më e nevojshme, megjithatë ne kemi ofruar bashkëpunim për shkak të zhbllokimit të procesit të zgjedhjes së presidentit të Kosovës. Diskutime ka pasur pafund, por nuk ka pasur vullnet. LDK është më e dobët se sa ishte në zgjedhjet e 9 shkurtit 2025”, ka deklaruar Rrustemi.

I pyetur se kur LVV do të nisë bisedimet me partitë opozitare, ai tha se fillimisht do të shqyrtohet nëse ato kanë reflektuar dhe nëse janë të gatshme të heqin dorë nga bllokadat politike.

“Do t’i fillojmë bisedimet me partitë politike opozitare me shpresë që kanë reflektua dhe do të shofim natyrisht edhe qëndrimet e tyre përveqëse atyre publike dhe do të shohim se opozita a është në kërkim të arsyeve të reja për bllokada tjera apo vërtetë ka reflektua dhe ka vendosur me hequr dorë prej bllokadës dhe me i dhënë vendit institucione….nuk është problemi që ne i donim tri pozitat, por është normale që një program politik qeverisës që i ka fitua zgjedhjet aq më tepër një sistem si i yni që është i rrallë rezultati mbi 50% vetëm VV-ja e ka mbrri, madje në kohën e presidentit historik të Ibrahim Rugovës nuk kishte një rezultat pra 50%”, tha ai ndër të tjera.

Lidhur me dialogun Kosovë–Serbi, Rrustemi deklaroi se Partia Demokratike e Kosovës vazhdon ta cilësojë si të gabuar qasjen e Qeverisë Kurti në këtë proces.

“PDK e konsideron të gabuar qasjen e Kurtit në dialogun me Serbinë. Ata e kanë thënë vazhdimisht dhe vazhdojnë ta deklarojnë publikisht se dialogu aktual po zhvillohet gabimisht dhe se është dashur të vazhdohej me qasjen që ka qenë para vitit 2020. Ne mendojmë të kundërtën. Vlerësojmë se deri në vitin 2020 dialogu në Bruksel ka qenë i konceptuar gabimisht, ku Kosova nuk ka qenë palë e barabartë. Që nga viti 2021, kur kemi ardhur në qeveri, është ndërprerë ai cikël i koncepteve të mëparshme për dialogun me Serbinë”, u shpreh Rrustemi.