Rrustemi: Kandidatura e Sejdiut ishte një mundësi e humbur, por zgjidhja për presidentin ende është e arritshme

Bekim Sejdiu, i konsideruar si një nga mundësitë e fundit për tejkalimin e ngërçit rreth zgjedhjes së presidentit, ka hequr dorë nga kandidatura. Ai bëri të ditur se vendimin e mori pasi nuk siguroi mbështetjen e nevojshme nga partitë politike, duke e bërë edhe më të vështirë procesin për zgjedhjen e kreut të shtetit.

Deputeti i Lëvizjes Vetëvendosje, Adnan Rrustemi, deklaroi se partia e tij do të vijojë të kërkojë një kandidat të pranueshëm për të gjitha palët, me synimin që Kosova të mos shkojë në zgjedhje të reja.

Në një intervistë për Ekonomia Online, Rrustemi tha se vendimi i Sejdiut respektohet, por sipas tij, tërheqja e profesorës përbën një mundësi të humbur për vendin. Ai kujtoi se Sejdiu e kishte bërë publike arsyen e largimit dhe se kishte njoftuar për këtë kryeministrin Albin Kurti dhe kryetarin e LDK-së, Abdixhikun.

Rrustemi u shpreh se kandidatura e Sejdiut ishte propozuar si figurë konsensuale dhe jashtëpartiake pas marrëveshjes së arritur mes LVV-së dhe LDK-së, e cila ishte rezultat i negociatave të vështira. Sipas tij, vendimi lidhet edhe me refuzimin e 6 deputetëve të LDK-së për ta mbështetur apo zbatuar marrëveshjen. Ai shtoi se një president i tillë do t’i jepte fund krizës politike që lidhet me këtë çështje.

Deputeti i LVV-së e cilësoi tërheqjen e Sejdiut si një goditje për procesin, veçanërisht pas kundërshtimit që, sipas tij, 6 deputetë të LDK-së i kanë bërë marrëveshjes. Megjithatë, ai theksoi se kjo nuk do ta ndalë Vetëvendosjen të kërkojë një kandidat për president dhe të përpiqet të shmangë zgjedhjet e katërta radhazi, të cilat i konsideroi të panevojshme, të kushtueshme dhe të dëmshme.

Rrustemi tha se nuk ka informacion nëse do të organizohet një ftesë e re për partitë opozitare për të diskutuar rreth presidentit. Ai theksoi se LVV-ja i ka ftuar në vazhdimësi subjektet politike, ndërsa sipas tij, LDK-ja është përgjigjur, kurse PDK-ja dhe Aleanca jo.

Ai nënvizoi se zgjedhja e presidentit kërkon konsensus dhe se asnjë subjekt nuk duhet ta përdorë këtë proces si arsye për të penguar funksionimin e institucioneve. Sipas Rrustemit, për zgjedhjen e presidentit nevojitet mbështetja e 2/3 të deputetëve të Kuvendit të Kosovës, ndaj kjo nuk mund të arrihet nga një parti e vetme.

Rrustemi konfirmoi se kërkimi për një figurë konsensuale do të vazhdojë, por shtoi se procesi kërkon gatishmëri dhe vullnet politik edhe nga partitë e tjera opozitare. Ai u bëri thirrje partive dhe deputetëve që të marrin përgjegjësi politike e kushtetuese për ruajtjen e stabilitetit institucional dhe të mos e kthejnë zgjedhjen e presidentit në pjesë të përplasjes mes pozitës dhe opozitës.

Sipas tij, një kandidat mbipartiak dhe jashtëpartiak do të ishte zgjidhja më e përshtatshme për Kosovën dhe do të mundësonte tejkalimin e krizës aktuale politike.

Gjatë intervistës, Rrustemi foli edhe për çështjen që Partia Demokratike e Kosovës ka dërguar në Gjykatën Kushtetuese lidhur me konstituimin e Kuvendit.

Ai tha se pret që Gjykata Kushtetuese të konfirmojë vazhdimin e funksionimit të institucioneve qendrore. Rrustemi kujtoi se PDK-ja kishte kërkuar publikisht konstituimin e Kuvendit, por pasi ky proces u realizua, doli kundër tij dhe e dërgoi çështjen në Gjykatën Kushtetuese.

Deputeti i LVV-së deklaroi se pret që gjykata të vlerësojë se konstituimi i Kuvendit ishte i pashmangshëm pas certifikimit të rezultateve të zgjedhjeve dhe se puna e institucioneve duhet të vazhdojë. Ai shtoi se nuk pret që çështja juridike të ndikojë në bisedimet e mundshme për zgjedhjen e presidentit, ndonëse tha se mbetet të shihet se si do të zhvillohet situata.

Rrustemi e përshkroi zgjedhjen e presidentit si një proces kryesisht politik, i cili varet nga vullneti i subjekteve parlamentare. Ai tha se, nëse partitë opozitare tregojnë vullnet për të gjetur një marrëveshje, është i bindur se zgjidhja do të arrihet.

Megjithatë, ai paralajmëroi se procesi do të vështirësohet nëse partitë e tjera e shohin çështjen e presidentit si mjet për ta penguar qeverisjen e Vetëvendosjes dhe për ta çuar vendin drejt zgjedhjeve, gjë që, sipas tij, duket se është synimi i tyre.