Rron Gjinovci akuzon Edi Ramën se po mban anën e Serbisë

Analisti Rron Gjinovci ka reaguar ndaj qëndrimit të kryeministrit shqiptar Edi Rama për Serbinë, duke e akuzuar atë se po e mbështet Beogradin edhe në çështjen që lidhet me Ratko Mlladiqin.

Kritika e Gjinovcit lidhet me deklaratën e Ramës se Serbia nuk duhet të izolohet, por të përfshihet në tryezën e diskutimeve. Sipas kryeministrit, Serbisë duhet t’i bëhet e qartë se nuk mund të organizojë një funeral shtetëror për një “kasap”.

“Edhe në rastin e Mlladiqit, Edi Rama e mbështetë Serbinë. Thotë nuk duhet me izolu po duhet me ftu në tryezë e mi kallxu që s’bon me bo ashtu”, shkroi Gjinovci.

Rama është shprehur: “Serbia është një lloj kafshe shumë interesante dhe e çuditshme në xhunglën e Ballkanit Perëndimor. Çfarë është më mirë? Ta kesh në tryezë dhe t’i thuash: ‘S’mund të bësh funeral shtetëror për një kasap’, apo ta lësh aty, në ujëra të pasigurta, dhe të krijojë një situatë skizofrenike mes Evropës, Kinës, Amerikës dhe Rusisë?”