Rama në Detroit për vendimin e Hagës: Nuk pranoj “varrosjen për së gjalli” të katër ish-krerëve të UÇK-së

Në takimin me shqiptarët në Detroit të SHBA-së, kryeministri i Shqipërisë, Edi Rama, reagoi ndaj vendimit të fundit të Dhomave të Specializuara të Kosovës në Hagë. Katër ish-drejtues të UÇK-së u dënuan me 81 vite burg në total, ndërsa Rama deklaroi se nuk mund ta pranojë këtë si “varrosje për së gjalli” të tyre.

Ai e përshkroi situatën si një nga momentet më të rënda për shqiptarët, duke e cilësuar atë edhe si “një mort për së gjalli”. Rama sqaroi se qëndrimi i tij nuk synon të vërë në diskutim vetë vendimin e gjykatës, por mënyrën se si ai ndikon te një popull i tërë.

Duke iu referuar zhvillimeve të para disa ditëve në Hagë, kryeministri tha se nuk kishte si t’i shmangej asaj që ndodhi. Ai e krahasoi situatën me një gur të madh, përballë të cilit fjalët duken të kota, njësoj si në një mort për së gjalli.

Rama kujtoi se vazhdimisht përsëritet kërkesa për respektimin e vendimeve të gjykatave, por theksoi se çështja kryesore është tjetër: në emër të popullit nuk mund të pranohet varrosja për së gjalli e katër njerëzve, kur vetë populli nuk e gjen veten në atë vendim.

Sipas tij, Shqipëria në këtë situatë nuk mund të bëjë më shumë se të qëndrojë në krah të Kosovës. Rama deklaroi se të zgjedhurit e popullit të Kosovës do ta refuzojnë varrosjen për së gjalli të atyre katër burrave.

Ai shtoi se respektimi i detyruar i vendimit të gjykatës nuk nënkupton domosdoshmërisht pranimin e pasojave të tij si një realitet të pakthyeshëm. Për Ramën, respekti ndaj vendimit nuk e pengon refuzimin e tij si një fatalitet pa apel.