Qarri paralajmëron thellim të përçarjeve në LDK pas rikonfirmimit të Abdixhikut

Kuvendi i Jashtëzakonshëm i Lidhjes Demokratike të Kosovës u zhvillua të enjten. Delegatët i dhanë sërish besimin Lumir Abdixhikut, duke e rikonfirmuar atë në postin e kryetarit të LDK-së.

Votimi u mbajt pas paraqitjes së një mocioni që synonte largimin e Abdixhikut nga drejtimi i partisë.

Duke komentuar zhvillimet për “Bota sot”, analisti politik Gani Qarri e ka cilësuar të befasishme nismën për shkarkimin e kreut të LDK-së. Sipas tij, pavarësisht se Abdixhiku e kaloi votëbesimin, përplasjet e brendshme i kanë shkaktuar partisë dëme të rënda.

Qarri ka thënë se kërkesa për largimin e Abdixhikut u shfaq me shpejtësi dhe në mënyrë të papritur, ndërsa pakënaqësitë dolën “automatikisht” në sipërfaqe përmes përplasjes së një grupi konspirativ brenda LDK-së me mënyrën se si ai po e drejtonte partinë.

Ai ka kujtuar se Abdixhiku e kishte marrë më 31 janar të këtij viti votëbesimin për ta vazhduar udhëheqjen e LDK-së. Qarri ka shtuar se edhe rezultati i zgjedhjeve të 7 qershorit ishte më i mirë se ai i 28 dhjetorit, por, sipas tij, votimi i 30 korrikut për besueshmërinë ndaj Abdixhikut i dha LDK-së goditjen më të rëndë gjatë gjithë ekzistencës së saj si parti e fuqishme, unike dhe institucionale, si dhe si një ish-subjekt i njohur shtetformues.

Sipas analistit, kalimi i mocionit nga Abdixhiku nuk përbën një triumf të plotë, sepse konflikti i brendshëm ka cenuar unitetin e LDK-së dhe ka prodhuar pasoja të dukshme.

Qarri ka vlerësuar se mbijetesa politike e Abdixhikut pas votëbesimit nuk mund të quhet fitore. Përkundrazi, sipas tij, ajo dëshmon ndarjen faktike të këtij segmenti politik aspak stabil, ndërsa nga ajo mbrëmje qëndrueshmëria dhe bashkimi i partisë janë vendosur në një pikëpyetje të rrezikshme. Ai ka pohuar se kryetari aktual nuk do ta ketë më mbështetjen e krahut disident të LDK-së.

Ai ka shprehur dyshimin se një parti që ndodhet në kulmin e krizës së vet të brendshme mund të ofrojë zgjidhjen për ngërçin e zgjatur politik apo të ketë forcën e nevojshme për tejkalimin e krizës institucionale. Qarri ka theksuar se një pjesë e konsideruar e deputetëve të LDK-së, nga ajo mbrëmje, nuk do t’u binden më kërkesave të Abdixhikut, i cili, sipas tij, tashmë mbetet zyrtarisht një drejtues i kontestuar i partisë.

Në këtë situatë, Qarri ka kërkuar që Abdixhiku dhe Vjosa Osmani, e cila ishte e para që e uroi sinqerisht për rezultatin e votëbesimit, të bëjnë gjithçka që është e mundur për t’u koordinuar me kryeministrin Kurti. Sipas tij, me shumicën e deputetëve të LDK-së që i qëndrojnë besnikë Abdixhikut, ata duhet të bashkëpunojnë për zgjedhjen e presidentit/es së vendit dhe të sigurojnë institucione stabile e qeverisje të qëndrueshme gjatë 4 viteve të ardhshme.

Analisti ka deklaruar se një veprim i tillë do ta merrte përkrahjen e opinionit të gjerë dhe do të mbahej mend pozitivisht nga populli dhe të gjithë qytetarët e Kosovës. Ai ka nënvizuar se qytetarët janë lodhur nga kalimi i vazhdueshëm prej një pale zgjedhjesh në tjetrën, të cilat, përveç kostove të panevojshme, nuk po e zgjidhin as çështjen e presidentit/es.

Sipas Qarrit, përsëritja e ngërçeve vetëm sa e paraqet Kosovën para botës si një shtet politikisht jo stabil dhe të paqëndrueshëm në Ballkanin Perëndimor dhe në rajon.

Ai ka thënë se, për herë të parë që nga mbrëmja e votimit, do ta mbështeste Abdixhikun nëse ky i fundit vendos t’i përdorë të gjitha mundësitë e tij dhe, së bashku me ish-presidenten, të kontribuojë për ngritjen e institucioneve dhe forcimin e stabilitetit të shtetit të pavarur të Kosovës. Qarri ka rikujtuar se ajo ishte e para që e përgëzoi Abdixhikun për kalimin e sprovës, e cila, sipas tij, iu imponua pothuajse pa asnjë arsye bindëse nga një grup aventurierësh dhe destruktivësh brenda LDK-së.

Megjithatë, Qarri ka paralajmëruar se rikonfirmimi i Abdixhikut mund të mos i japë fund konfliktit të brendshëm në parti.

Ai ka shprehur frikën se ajo që e ka quajtur “fitore e Pirros”, të cilën Abdixhiku e “materializoi” në mbrëmjen e 30 korrikut, nuk përfaqësonte realisht një fitore, por shënonte nisjen konkrete të ndarjes së vërtetë të LDK-së.

Sipas Qarrit, vazhdimi i mandatit të Abdixhikut në postin e kryetarit do t’i thellojë më tej ndasitë e brendshme dhe do t’i ashpërsojë përçarjet që tashmë janë bërë publike. Ai ka thënë se këto zhvillime tregojnë më qartë se asnjëherë drejtimin që ka marrë shpërbërja e pashmangshme e këtij segmenti të njohur institucional dhe ish-shtetformues në Kosovë.

Pas rikonfirmimit në krye të LDK-së, Abdixhiku, sipas Qarrit, duhet t’u qëndrojë me vendosmëri premtimeve të bëra para opinionit dhe të veprojë me më shumë rigorozitet se në çdo periudhë tjetër, në mënyrë që ta zgjerojë përkrahjen brenda partisë dhe ta fitojë besimin e qytetarëve.

Qarri ka kërkuar gjithashtu që Abdixhiku, së bashku me ish-presidenten Vjosa Osmani, të bëjë gjithçka që di dhe mundet për formimin sa më të shpejtë të institucioneve shtetërore. Sipas tij, kreu i LDK-së nuk duhet të pranojë të shndërrohet në “mashë” të askujt për ta dërguar sërish vendin në zgjedhje të parakohshme, në shërbim të interesave meskine të ndonjë opozitari tjetër.

Ai ka vlerësuar se është dëshmuar publikisht se zgjedhjet nuk janë formula për kapërcimin e ngërçit. Sipas Qarrit, zgjidhja qëndron te zgjedhja e një presidenti konsensual, krijimi i institucioneve stabile dhe sigurimi i një qeverisjeje të qëndrueshme, për të cilat Kosova dhe qytetarët e saj kanë aktualisht më shumë nevojë se për çdo gjë tjetër.

Në përfundim, Qarri ka theksuar se procesi i nisur për shkarkimin e Abdixhikut nuk ishte i nevojshëm, ndërsa Kosova ka nevojë që ngërçi institucional të marrë fund.

Ai ka rikujtuar se në Kuvendin e Jashtëzakonshëm të partisë, më 30 korrik, Abdixhiku e kaloi me sukses mocionin e paraqitur nga një grup kundërshtarësh që kërkonin largimin e tij nga kreu i LDK-së. Menjëherë pas njoftimit se ai do të vazhdonte ta drejtonte partinë, ish-presidentja e vendit, zonja Osmani, e cila në zgjedhjet e 7 qershorit ishte bartëse e listës së LDK-së, reagoi me gëzim duke deklaruar: “Jo çdo fitore është e zakonshme. Disa fitore bëhen frymëzim. Kjo është njëra prej tyre!”.

Qarri ka argumentuar se Abdixhiku ishte konfirmuar si kryetar në janar të këtij viti dhe se, vetëm pas pak muajsh, do të zhvillohej procesi i rregullt zgjedhor për përzgjedhjen e udhëheqjes së re të partisë. Për këtë arsye, sipas tij, mocioni ishte krejtësisht i panevojshëm, u ndërmor në mënyrë të njëanshme dhe u paraqit në një moment shumë të ndjeshëm për vendin.

Në deklaratën për “Bota sot”, Qarri ka përfunduar duke thënë se, pas disa palë zgjedhjesh, Kosova as nuk duhet dhe as nuk mund të humbasë më shumë kohë. Ai ka theksuar se vendi po pret me padurim konstituimin e Kuvendit të legjislaturës së 7 qershorit, krijimin e Qeverisë së re, zgjedhjen e presidentit dhe vijimin normal të proceseve politike të shtetit të Kosovës.