Pula: UÇK-ja përfaqëson një kapitull vendimtar të historisë së Kosovës

Kryetarja e Akademisë së Shkencave dhe Arteve të Kosovës, Justina Pula, ka reaguar pas vendimit dënues të Gjykatës Speciale në Hagë ndaj katër ish-drejtuesve të Ushtrisë Çlirimtare të Kosovës.

Në një postim të publikuar në Facebook, Pula theksoi se vendimi kërkon reflektim jo vetëm për përfundimin e procesit gjyqësor, por edhe për natyrën, mandatin dhe mënyrën e funksionimit të Dhomave të Specializuara.

“Vendimi i fundit ndaj katër ish-drejtuesve të Ushtrisë Çlirimtare të Kosovës na obligon të reflektojmë jo vetëm mbi verdiktin gjyqësor, por edhe mbi vetë natyrën, mandatin dhe mënyrën e funksionimit të Dhomave të Specializuara”, shkroi ajo.

Sipas Pulës, UÇK-ja është pjesë e një periudhe vendimtare të historisë së vendit. Ajo nënvizoi se ndjekja penale e individëve nuk duhet të shndërrohet në një gjykim të përgjithshëm ndaj një lëvizjeje, një etape historike apo aspiratës së një populli për liri.

“Respekti për të drejtën dhe për procedurat juridike nuk e përjashton të drejtën për kritikë institucionale. Përkundrazi, në një shoqëri demokratike, legjitimiteti i institucioneve të drejtësisë forcohet përmes transparencës, llogaridhënies dhe debatit të argumentuar publik. Ushtria Çlirimtare e Kosovës është pjesë e një kapitulli vendimtar të historisë sonë. Proceset penale ndaj individëve nuk duhet të shndërrohen në gjykim të përgjithshëm të një lëvizjeje, të një periudhe historike apo të aspiratës së një populli për liri”, ka shkruar Pula.